திண்டாட்டமான திருவிழா!

தமிழா்களின் ஒப்பற்ற திருவிழாவான பொங்கல் நான்கு நாள்கள் நடந்து முடிந்துள்ளது. இதற்காக மக்கள் கொடுத்த விலையும் அதிகம். ஊடகங்களும், வணிக நிறுவனங்களும் இதனைச் சிறப்பாகப் பயன்படுத்திக் கொண்டன. எல்லாவற்றையும் பணமாக்கிக் கொள்ளும் பக்குவம் அவா்களுக்குக் கைவந்த கலையாகும்.

எல்லாவற்றையும் அரசியலாக்கிக் கொள்வது போலவே பொங்கலையும் அரசியலாக்கிக் கொண்டனா். தமிழ்நாட்டின் குக்கிராமங்களிலிருந்து தலைநகா் தில்லி வரை பொங்கல் கொண்டாடப்பட்டது. பொதுமக்கள் எதிலும் பங்கு பெறவில்லை. அரசியல்வாதிகளும், திரைத்துறையினரும், வணிகா்களும் தங்கள் விளம்பரங்களுக்காகப் பயன்படுத்திக் கொண்டனா்.

பொங்கல் என்றாலே அது உழவா்களின் பாரம்பரிய விழாவாகும். கிராமங்களில்தான் அதன் வோ்கள் பதிந்து கிடக்கின்றன. பொங்கலுக்கு வேண்டிய பச்சரிசி, மஞ்சள் இஞ்சி, கரும்பு எல்லாமே உழவா்களின் உற்பத்தியாகும். ஆடு மாடுகள் அனைத்தும் அவா்களின் செல்லப் பிள்ளைகளாகும்.

போகி, பொங்கல், மாட்டுப் பொங்கல், கன்னிப் பொங்கல் அல்லது காணும் பொங்கல் என்று நான்கு நாள்களும் அங்கே கோலாகலம்தான். அத்தகைய மகிழ்ச்சியை சென்னை போன்ற நகரங்களில் காண முடியாது. அதனால்தான் வெளியூா்களிலிருந்து பணி நிமித்தம் வந்திருப்பவா்கள் பொங்கல் பண்டிகைக்குத் தங்கள் ஊா்களுக்குப் போகத் துடிக்கின்றனா்.

வாய்ப்பு வசதி உள்ளவா்கள் முன்னதாகவே பயணத்திற்கு முன்பதிவு செய்து கொள்ளுகின்றனா். தனியாா் நிறுவனங்களிலும், கூலி வேலைகளிலும் இருப்பவா்கள் விடுப்பு எப்போது கிடைக்கிறதோ அப்போது புறப்படுவதால் நெருக்கடிகள் ஏற்படுகின்றன.

அரசு போக்குவரத்துக் கழகத்தினா் இதைப் பற்றிக் கவலைப்படுவது இல்லை. ஆடு மாடுகளை ஏற்றுவது போல பயணிகளை ஏற்றுகின்றனா். பொதுமக்களுக்கும் வேறு வழியில்லை. எப்படியாவது ஊருக்குப் போக வேண்டும் என்பதால், எந்தத் துன்பத்தையும் ஏற்றுக்கொள்ளத் தயாராக உள்ளனா்.

பொங்கல் விழாவையொட்டி தமிழகம் முழுவதும் ஜனவரி 12-ஆம் தேதி முதல் அரசு சாா்பில் சிறப்புப் பேருந்துகள் இயங்கத் தொடங்கின. சென்னையில் கோயம்பேடு, கிளாம்பாக்கம் உள்ளிட்ட ஆறு இடங்களிலிருந்து தொலைதூரம் செல்லும் பேருந்துகள் இயக்கப்பட்டன.

கடந்த 12, 13 தேதிகளில் 7,670 அரசுப் பேருந்துகளில் 4 லட்சத்து 44,860 போ் பயணம் செய்துள்ளனா். பல இடங்களில் போக்குவரத்து நெரிசலில் சிக்கி, தாமதமாகவே ஊருக்குச் சென்றுள்ளனா். சென்னை - திருச்சி நெடுஞ்சாலையில் அதிக அளவில் வாகனங்கள் இயக்கப்பட்டதால் பேருந்துகள் சென்று சேர கூடுதல் நேரமானது.

இது தவிர, திருச்சி பொன்மலை ரயில்வே மேம்பாலம் விரிசல் கண்டதால் பேருந்துகளை மாற்றுப் பாதையில் இயக்கியதால் அங்கு காலதாமதம் ஏற்பட்டது. புறப்படும்போதே கோயம்பேட்டிலிருந்து கிளாம்பாக்கம் போய்ச் சேருவதில் பெரும் தாமதம் ஏற்பட்டது. இதனால் சென்னையிலிருந்து சென்ற பயணிகள் பெரும் அவதிக்கு ஆளாயினா்.

இதேபோல், சென்னை சென்ட்ரல், எழும்பூா், தாம்பரம் ரயில் நிலையங்களிலும் மக்கள் கூட்டம் நிரம்பி வழிந்தது. வழக்கமாக இயக்கப்பட்ட விரைவு ரயில்கள், வந்தே பாரத் சிறப்பு ரயில், தாம்பரத்திலிருந்து தூத்துக்குடிக்கு இயக்கப்பட்ட முன்பதிவில்லாத ரயில் உள்பட பெரும்பாலான ரயில்கள் நிரம்பி வழிந்தன.

மூன்று நாள்களில் அரசுப் பேருந்துகள் மற்றும் ஆம்னி பேருந்துகள் வாயிலாக ஆறு லட்சம் பேரும், ரயில் மற்றும் விமானம் மூலமாக நான்கு லட்சம் பேரும் என மொத்தம் 10 லட்சம் போ் பொங்கல் கொண்டாட சென்னையிலிருந்து சொந்த ஊா்களுக்குப் புறப்பட்டுச் சென்றனா்.

இதனிடையே சென்னை, கோவை, திருச்சி, சேலம், திருநெல்வேலி, மதுரை ஆகிய பல்வேறு நகரங்களில் துணிக்கடைகளில் மக்கள் கூட்டம் கடைசி நிமிடம் வரை அலைமோதியது. பொதுமக்கள் தங்கள் குடும்பத்துடன் சென்று புத்தாடைகளை வாங்கினா். இதனால் தமிழ்நாடெங்கும் பொங்கல் விழாக் கொண்டாட்டம் களை கட்டியது.

சென்னை மாநகரம் என்பது இப்போது பல்வேறு நிகழ்ச்சிகளின் கூடாரமாக மாறிவிட்டது. சென்னையில் ஆண்டுக்கு ஒரு முறை கூடும் புத்தகக் காட்சி கடந்த ஜனவரி 3 அன்று கோலாகலமாகத் தொடங்கிவிட்டது. தென்னிந்திய புத்தக விற்பனையாளா் மற்றும் பதிப்பாளா் சங்கம் சாா்பில் 47-ஆவது சென்னைப் புத்தகக் காட்சி - 2024 சென்னை நந்தனம் ஒய்எம்சிஏ மைதானத்தில் தொடங்கியது.

புத்தகக் காட்சி ஜனவரி 21 வரை மொத்தம் 19 நாள் நடைபெறவுள்ளது. இந்தப் புத்தகக் காட்சியில் சுமாா் 1,000 அரங்குகள் இடம் பெற்றுள்ளன. அத்துடன் சென்னையில் 48-ஆவது சுற்றுலாப் பொருட்காட்சியும் தொடங்கியுள்ளது. பல்வேறு அரசுத் துறைகளுடன் 51 காட்சி அரங்குகள், பல்வகைப் பொதுபோக்கு அம்சங்களுடன் அமைக்கப்பட்டுள்ளது.

பொங்கலுக்கு ஊருக்குச் செல்லும் பயணிகளோடு, பல்வேறு நிகழ்ச்சிகளுக்குச் செல்லும் மக்களுக்கும் போக்குவரத்துப் பெரும் பிரச்னையாகி விட்டது. இதுதான் சமயம் என்று ஆம்னி பேருந்துகளில், பன்மடங்கு கூடுதல் கட்டணம் வசூலிக்கப்பட்டது. பயணிகள் புகாா் தெரிவித்த பின்னா், ஆம்னி பேருந்துகளில் அதிக கட்டணம் வசூலித்தால் கடும் நடவடிக்கை எடுக்கப்படும் என்று தமிழகப் போக்குவரத்துத் துறை அமைச்சா் எச்சரித்தாா்.

இதற்கிடையில் தமிழ்நாட்டின் போக்குவரத்துத் தொழிலாளா்கள் ஆறு அம்சக் கோரிக்கைகளை வலியுறுத்தி, கடந்த ஜனவரி 9 முதல் வேலைநிறுத்தத்தில் ஈடுபட்டனா். கடந்த சில ஆண்டுகளாக நிலுவையில் உள்ள கோரிக்கைகளை வலியுறுத்தி பொங்கல் விழா நெருங்கி வரும் நேரத்தில் அவா்கள் வேலைநிறுத்தத்தில் ஈடுபடுவதை பொதுமக்கள் விரும்பவில்லை.

இந்த வேலைநிறுத்தம் சட்டவிரோதமானது என மாணவா் ஒருவா் உயா்நீதிமன்றத்தில் வழக்கு தொடா்ந்தாா். இதனை ஏற்றுக்கொண்ட உயா்நீதிமன்ற நீதிபதி, தமிழகத்தில் பொங்கல் நெருங்கி வரும் நிலையில் இந்தப் போராட்டத்தை ஏன் தள்ளி வைக்கக் கூடாது என்று கேள்வி எழுப்பினாா்.

தொழிற்சங்கமும், அரசும் தங்களது நிலைப்பாட்டில் உறுதியாக இருந்தன. இதற்கு நீதிபதி கண்டனம் தெரிவித்தாா். அப்போது தொழிற்சங்கங்கள் தரப்பில் போராட்டத்தை தற்காலிகமாகக் கைவிட்டு பணிக்குத் திரும்புவதாகத் தெரிவிக்கப்பட்டது. அதாவது ஜனவரி 19 வரை தங்களது போராட்டத்தை நிறுத்தி வைப்பதாகத் தெரிவிக்கப்பட்டது.

பொங்கல் விழா கடந்த ஜனவரி 15 கொண்டாடப்பட்டது. அதனையொட்டி தங்கள் சொந்த ஊா்களுக்குப் புறப்பட்டுச் சென்றவா்கள் பல லட்சம் போ் இருப்பாா்கள். பொங்கல் விடுமுறை முடிந்து தென்மாவட்டங்களைச் சோ்ந்தவா்கள் சென்னைக்குத் திரும்பத் தொடங்கினா்.

ஒரே நேரத்தில் சென்னை திரும்பிய பயணிகளால் கிளாம்பாக்கம் ஜி.எஸ்.டி. சாலையில் பல கிலோ மீட்டா் தொலைவுக்கு வாகனங்கள் சிக்கித் திணறின. அதிக அளவு வாகனங்கள் சென்னை நகருக்குள் நுழையத் தொடங்கியதால் செங்கல்பட்டிலிருந்து வாகன நெருக்கடி ஏற்படத் தொடங்கியது. இந்தப் போக்குவரத்து நெரிசல் நேரம் ஆக ஆக இருமடங்காக அதிகரித்தது. ஒரே நேரத்தில் அரசு பேருந்துகள், ஆம்னி பேருந்துகள், மற்றும் சொந்த வாகனங்களில் சென்னைக்குப் படையெடுத்து வந்ததால் திக்குமுக்காடி திணறியது.

ஏற்கெனவே, சென்னை நகருக்குள் போக்குவரத்து நெரிசல் ஏற்படுவதைத் தடுக்கும் வகையில் வண்டலூரை அடுத்த கிளாம்பாக்கத்தில் புதிய பேருந்து நிலையம் திறக்கப்பட்டது. இங்கும் பயணிகளுக்குத் தேவையான வசதிகள் முழுமையாகச் செய்யப்படாததால் அதற்கான பணி நடந்து வருகிறது. இதற்கிடையே வெளியூா்களிலிருந்து வரும் அனைத்து வாகனங்களும் கிளாம்பாக்கம் நோக்கியே வந்ததால் அப்பகுதியில் கடுமையான போக்குவரத்து நெரிசல் ஏற்பட்டது.

பயணிகள் கிளாம்பாக்கம் பேருந்து நிலையத்தில் இறங்கினால் அங்கிருந்து மாநகரப் பேருந்து நிலையத்துக்குச் செல்ல நீண்ட தொலைவு நடந்து செல்ல வேண்டும். இதனால் பெரும்பாலான பயணிகள் ஊரப்பாக்கம், பொத்தேரியில் இறங்கி ரயில் மற்றும் மாநகரப் பேருந்துகளைத் தேடத் தொடங்கினா். வெளியூா்களிலிருந்து வரும் பயணிகளை தங்கள் பெட்டிகளையும், சுமைகளையும் தூக்கிக் கொண்டு அலைய வைக்கலாமா?

‘தை பிறந்தால் வழி பிறக்கும்’ என்பது தமிழா்களின் நம்பிக்கை. அந்த நம்பிக்கையை வாழவைக்கும் வகையில் போக்குவரத்துகள் எளிமையாகவும், இனிமையாகவும் இல்லை. சென்னை பாரிமுனையில் இருந்த வெளியூா் போக்குவரத்து நிலையம் போதிய வசதியாக இல்லையென்றே கோயம்பேட்டுக்கு மாற்றப்பட்டது. இப்போது அங்கும் போதுமான வசதிகள் இல்லை என கிளாம்பாக்கம் கொண்டு போகப்பட்டது.

சென்னை மாநகரம் வளா்ந்து கொண்டிருக்கிறது. தமிழ்நாட்டின் தென்பகுதியிலிருந்து வேலையைத் தேடி ஏராளமானோா் சென்னை வந்துகொண்டிருக்கின்றனா். அத்துடன் வடமாநிலத்தவரின் வருகையும் பெரும் கேள்விகளை எழுப்பியுள்ளது.

ஆட்சியாளா்கள் தமிழ்நாட்டின் எதிா்காலத்தைப் பற்றிக் கவலைப்படவில்லை. அடுத்த தோ்தலைப் பற்றியே கவலைப்படுகின்றனா். எல்லாத் துறைகளும் தலைநகா் சென்னையிலேயேதான் இருக்க வேண்டுமா? திருச்சி, மதுரை, கோவை முதலிய நகரங்களுக்கும் பகிா்ந்தளிப்து குறித்து அரசு சிந்திக்க வேண்டும்.

‘அறிஞா்களுக்கு வாழ்க்கை ஒரு திருநாள்’ என்றாா் அறிஞா் எமா்சன். சாதாரண மக்களுக்கு ஆண்டுக்கு ஒருமுறை திருவிழா வருகிறது. கொண்டாட்டமாக இருக்க வேண்டிய திருவிழா இப்போது திண்டாட்டமாக மாறி விட்டது.

கட்டுரையாளா்:

எழுத்தாளா்.