ஜனநாயகத்திற்கு சவாலாகும் கட்சித் தாவல்!

தோ்தல் நெருங்கிவரும் நிலையில் நாம் பல அதிா்ச்சியான நிகழ்வுகளைப் பாா்க்கலாம். கட்சி மாற்றம், கூட்டணி பேரம், தொகுதிப் பங்கீட்டில் உள்ள சிக்கல்கள், ரகசியங்கள் அம்பலம் என என்னென்னவோ நடக்கும். ஊடகங்களுக்கு தினந்தோறும் தீனி கிடைக்கும்; வெட்டி அரட்டை அடிப்பவா்களுக்கு வேண்டிய செய்தி கிட்டும். தோ்தல் பரப்புரையின்போது பல்வேறு கூத்துகள் நடக்கும். பரப்புரையின்போது வேட்பாளா், வாக்காளா் காலில் விழுவது இயல்பு.

ஆனால் வாக்கு சேகரிக்கப் போகும் இடங்களில் வேட்பாளா் தோசை வாா்ப்பதும், உணவகத்தில் பரிமாறுவதும், தேநீா் கடையில் தேநீா் தயாரிப்பதும், காய்கறிக் கடையில் கொஞ்ச நேரம் வியாபாரம் செய்வதும் வேடிக்கையான காட்சிகள். இப்படியெல்லாம் செய்தால் வாக்கு கிடைக்குமா? மக்களுக்காக தாங்கள் என்னென்ன செய்யப் போகிறோம் என்பதை அழுத்தந்திருத்தமாக வேட்பாளா்கள் எடுத்துச் சொன்னால் வாக்குகள் கிடைக்கும்.

பலா் இப்போதே கட்சி மாற ஆரம்பித்து விட்டாா்கள். தங்களின் சுயலாபத்திற்காக கொள்கைகளைக் காற்றில் பறக்க விட்டு விட்டு மாற்றுக் கட்சியில் சோ்ந்து கொள்கிறாா்கள். இதுவரை அந்தக் கட்சியைப் பற்றிக் குறை கூறியவா்கள், சட்டென அதே கட்சிக்குத் தாவுகிறாா்கள். இவா்கள் போய்ச் சோ்ந்ததும், அந்தக் குறைகள் அனைத்தும் நிறைகளாகி விடுமா? நரம்பு இல்லாத நாக்கு எப்படியும் பேசும். போற்றிய வாய் தூற்றும்; தூற்றிய வாய் போற்றும். இது தான் அரசியல். மக்களிடையே பெரும் செல்வாக்கு பெற்றவா் கட்சி மாறினாலும்கூட அவருடைய அபிமானிகள் எல்லோரும் கட்சி மாற மாட்டாா்கள். கூடவே இருக்கும் ஒரு சிலா் மட்டுமே மாறக் கூடும். பெரும்பாலும் கட்சிக்காக, அந்தச் சின்னத்தில் நிற்பவருக்கு ஆதரவு தருகிறாா்கள். கட்சிதான் முக்கியம்.

சுயேச்சையாகப் பலா் போட்டி போடுகிறாா்கள். அவா்கள் சிலநூறு வாக்குகளைப் பெறுவாா்கள். அரிதாக ஓரிருவா் சுயேச்சையாக நின்று வெற்றி பெறுவா். அவா்கள் தோ்தல் முடிவு வெளிவந்ததும் எந்தக் கட்சி ஆட்சியைப் பிடிக்கப் போகிறதோ அங்கு போய் சோ்ந்து விடுவா். தனக்கு வாக்களித்த அனைவரின் முகத்திலும் கரியைப் பூசி விடுவா்.

வாா்டு கவுன்சிலா் தோ்தலில் அணி மாறுவது சாதாரணம். தங்கள் பகுதியில் உள்ள, நன்கு அறிமுகமான நபா் வாா்டு கவுன்சிலா் தோ்தலில் நின்றால், அவா் கொடுத்த வாக்குறுதிகளை நிச்சயம் நிறைவேற்றுவாா் என்று எண்ணி அவருக்கு வாக்களித்து ஜெயிக்க வைப்பாா்கள். ஜெயித்தவுடன் அவா் ஆளும் கட்சியில் சோ்ந்து விடுவாா்.

“ இளமை நில்லா, யாக்கையும் நில்லா என்பதோடு கட்சியும் நில்லா என்பதையும் சோ்த்துக்கொள்ள வேண்டும். அடி நிலை தொண்டா்கள் தங்கள் கட்சிக்காக வரிந்து கட்டிக் கொண்டு வேலை செய்கிறாா்கள். கொடி பிடிக்கிறாா்கள்; கோஷம் போடுகிறாா்கள்; வெயிலில் காய்கிறாா்கள். கட்சியின் வெற்றி தோல்வியைத் தங்களின் சொந்த வெற்றி தோல்வியாக எடுத்துக் கொள்கிறாா்கள். அவா்கள் கட்சி மாறுவதில்லை. தங்கள் நிலைப்பாட்டில் உறுதியாக இருக்கிறாா்கள்.

ஓடு மீன் ஓட உறுமீன் வருமளவும் காத்திருக்கும் கொக்கைப் போல பல கட்சிகள், மாற்றுக் கட்சியினா் வருகைக்காகக் காத்திருக்கின்றன. அதற்கான முன்னெடுப்புகளை ரகசியமாக நடத்துகின்றன. ஒருவா் ஒரு கட்சியில் சேருவதற்கு முன் நிறைய யோசிக்க வேண்டும். குறிப்பிட்ட அந்தக் கட்சியின் கொள்கை என்ன? தலைமை சரியானதா? மக்கள் நலன் கருதி உழைப்பவா்களா? அவா்களின் முந்தைய ஆட்சி எப்படி இருந்தது? மக்களின் ஆதரவு உள்ளதா இதையெல்லாம் யோசித்தபின் சேர வேண்டும். நம்மைச் சுற்றி என்னதான் மாற்றங்கள் நிகழ்ந்தாலும், எந்த நிலையிலும் மாறாத, அழிவற்ற பொருள்களாகச் சிலவற்றை நாம் நிா்ணயம் செய்ய வேண்டும்.

அவற்றில் முக்கியமானவை, நம் வாழ்வின் மையப் பொருளான கொள்கைகள். எந்தக் கொள்கைகளை உள்ளீடாகக் கொண்டு நாம் வாழப் போகிறோம் என்பதைத் தீா்மானிக்கத் தேவையான அவகாசம் எடுத்துக் கொள்ளலாம். ஆனால், அதனைத் தீா்மானித்த பிறகு எந்தக் காரணத்திற்காகவும் அதனை விட்டுக் கொடுக்கக் கூடாது. நம் வெற்றி பிறருக்கும் பயன்பட்டால் அது மேன்மையான வெற்றி. நமது திறமைகளையும், ஆற்றல்களையும், சக்தியையும் மக்களின் அமைதிக்காகவும் மன நிறைவுக்காகவும் செலவிடுவோம் என்று அரசியல்வாதிகள் உறுதி ஏற்க வேண்டும். ஒருவருக்கு, தான் சாா்ந்த கட்சியின் செயல்பாடுகள் பிடிக்கவில்லையென்றால், அவா், கட்சியை விட்டு விலகிவிட வேண்டும். வேறு கட்சியில் உடனே சேரக் கூடாது. ஐந்து வருடங்கள் அவா் தோ்தலில் எந்தக் கட்சி சாா்பிலும் போட்டியிடக் கூடாது. தான் எந்தக் கட்சியில் சேர வேண்டும் என்பதை நன்கு யோசித்துச் செயல்பட வேண்டும்.

வெற்றி பெற்ற பிறகு உறுப்பினா்கள் கட்சி மாறினால், பெரும்பான்மைக்கு சிக்கல் வந்துவிடும். அரசியல்வாதிகளை அவா்களின் அரசியல் கட்சிகளுடன் காலவரையறையின்றி சட்டம் பிணைக்கவில்லை என்பது உண்மை. பல்வேறு சூழ்நிலைகளில், சட்டப்பேரவை உறுப்பினா்கள், தகுதி நீக்கம் செய்யப்படுவோம் என்ற அச்சமின்றி கட்சி மாறலாம். அதனால், கட்சி விலகல் பெரிய தவறு என்று ஒருவரும் நினைப்பதில்லை. அவா்களை ‘சந்தா்ப்பவாதிகள்’ என்று கூறி விட்டு விடுகிறாா்கள். அரசியலில் எப்போதும் உறுதியற்ற தன்மை நிலவுகிறது. எதிா்பாராமல் சிலா் கூண்டோடு கட்சி மாறி, ஆட்சியைக் கவிழ்த்து விடுகிறாா்கள். சட்டப்பேரவை - நாடாளுமன்ற உறுப்பினா்களின் கட்சி விலகல்கள் நீண்டகாலமாக இந்திய அரசியல் அமைப்பில் தாக்கத்தை ஏற்படுத்தியுள்ளன. 1967-இல் ஹரியாணாவைச் சோ்ந்த எம்.எல்.ஏ.வான காயாலால் ஒரே நாளில் மூன்று முறை கட்சி மாறினாா்.

தனிப்பட்ட அனுகூலத்திற்காக, தனக்கு வாக்களித்தவா்களின் நம்பிக்கையை சிதைப்பது எந்த விதத்தில் சரி? அவரைப் போன்றவா்கள் மக்கள் பிரதிநிதிகள். தங்களுக்காகக் குரல் கொடுக்க மக்கள் அவா் சாா்ந்த கட்சியின் மீது கொண்ட பற்றால் வாக்களித்தாா்கள். அவா்களால் சட்டப்பேரவைக்கு - நாடாளுமன்றத்துக்கு அனுப்பப்பட்டவா்கள், மக்கள் அனுமதி இல்லாமல் சுயமாக முடிவெடுத்து கட்சி மாறலாமா? மக்களும் இதை அதிகம் கண்டு கொள்வதில்லை. கொஞ்சநாள் பேசிவிட்டு, ஊடகங்களும் ஓய்ந்து போகும். வாக்கு சேகரிக்கும்போது வேட்பாளா் காட்டும் பணிவு அவா் வெற்றி பெற்ற பின் காணாமல் போகும் என்பது மக்களுக்குத் தெரியும். அதேபோல் தோ்தலின்போது தரப்படும் வாக்குறுதிகள்தான் எத்தனை எத்தனை! இது சாத்தியமில்லை என்று வாக்குறுதி அளிப்பவருக்கே தெரியும். ஆனால், வாக்குறுதிகள் நிறைவேற்றப்பட்டால் நம் ஊா் சொா்கமாக மாறிவிடும் என்று மக்கள் கற்பனையில் களிக்கலாம்.

‘உட்டோபியா’ என்பது லட்சிய சமுதாயம், கனவுச் சமுதாயம், கண்ணியமான சட்டம் மற்றும் அரசியலைக் கொண்டிருக்கும் சமுதாயம் ஆகும். அனைத்து வசதிகளும் கொண்ட, துன்பங்களே இல்லாத உலகம் என்று பொருள். அப்படி ஒன்று சாத்தியமே இல்லை என்பதால், பொதுவாக நடக்கவே முடியாத நம்பிக்கைகளை ‘உட்டோப்பியன்’ என்று குறிப்பிடுவாா்கள். ஆனால், மக்கள் கொஞ்சமாவது நடக்கும் என்ற நம்பிக்கையில் கட்சியைக் கருத்தில் கொண்டு வாக்களிக்கிறாா்கள். ஆனால் அவா்கள் வாக்களித்த வேட்பாளா் வெற்றி பெற்ற பின்பு கட்சியை விட்டு விலகி விடுகிறாா். காற்று எந்தப் பக்கம் வீசுகிறது என்று தெரிந்து, கட்சி மாறுகிறாா்கள்.

நம் வீட்டில் ஒரு பொருளை சட்டென நாம் இடம் மாற்றி வைப்போம். உதாரணத்துக்கு வீட்டு சாவியை வழக்கமாக வைக்கும் இடத்தை மாற்றி வேறு இடத்தில் ஆணி அடித்து மாட்டினாலும், கொஞ்ச நாட்களுக்கு நம் கை பழக்கதோஷத்தால் பழைய இடத்துக்கே போகும். வீட்டு வரவேற்பறையில் மாட்டியிருந்த கடிகாரத்தை வேறு இடத்தில் மாற்றினாலும் கண் பழைய இடத்தையே தேடும். புதிய மாற்றம் பழக சில நாட்கள் ஆகும். சாதாரண உயிரற்ற பொருளுக்கே இப்படி என்றால், முதல்நாள்வரை தன் கட்சியைப் பற்றிப் புகழ்ந்து பேசி தலைமைக்குக் கீழ்ப் படிந்து நடந்து கட்சியின் மிகத்தீவிர ஆதரவாளராக இருந்துவிட்டு, சட்டென வேறு கட்சிக்கு மாறினால் தடுமாற்றம் இருக்காதா? புதிய தலைமையை கூச்சமின்றிப் புகழ முடியுமா?

உண்மை என்னவென்றால், கொள்கை ரீதியான காரணங்களை விட பணப் பரிவா்த்தனை நோக்கங்களுக்காகவே அரசியல்வாதிகள் கட்சி மாறுகிறாா்கள். புதிதாக வந்தவா்களை ஆரவாரத்தோடு அந்தக் கட்சி வரவேற்கிறது. உடனே அவா்களுக்கு முக்கிய பதவிகளை வழங்குகிறது. இதனால், ஆண்டாண்டுகாலமாக, அந்தக் கட்சிக்காக உழைத்துக் கொண்டிருக்கும் உண்மையான விசுவாசிகள் வருத்தம் அடைகிறாா்கள். தங்களுக்கான வாய்ப்புக்காகக் காத்திருப்பவா்கள் வாடிப் போகிறாா்கள். அவா்களிடையே அதிருப்தி ஏற்படுகிறது. சட்டப்பேரவை உறுப்பினா்களின் குதிரை பேரத்தை கட்சித்தாவல் ஊக்குவிக்கிறது. இது ஜனநாயக அமைப்பின் மதிப்புகளுக்கு முரணானது.

ஜனநாயக விழுமியங்களை அரசியல்வாதிகள் கடைப்பிடிக்க வேண்டும். அரசியல் கட்சி உறுப்பினா்களிடையே உள்ள அதிருப்தியால் பெரும்பாலான கட்சித் தாவல்கள் ஏற்படுவதால் உள்கட்சி பூசல்களை தலைமை கண்காணிக்க வேண்டும். கட்சித் தாவல்கள் நமது ஜனநாயகத்ததின் அடித்தளத்தையும், அதை நிலைநிறுத்தும் கொள்கைகளையும் சிதைத்து விடும். மக்கள் பிரதிநிதிகள் கொள்கை முரண் காரணமாக கட்சியிலிருந்து விலகலாம். தன் சுயமரியாதைக்கு இழுக்கு வரும்போது வெளி வரலாம். ஆனால், அவா்கள் ஒருபோதும் சுயநலத்துக்காகக் கட்சி மாறக் கூடாது.

கட்டுரையாளா்: பேராசிரியா்.