நீதித்துறைக்கொரு களங்கம்!

பொதுவாக நீதிமன்றங்களில் வாதியோ, பிரதிவாதியோ, சாட்சிகளோ வழக்கு விசாரணையின்போது கூண்டில் ஏறி ‘நான் சொல்லுவது எல்லாம் உண்மையே, உண்மையை தவிர வேறொன்றும் இல்லை’ என்று சத்திய பிரமாண வாக்குமூலம் தருவாா்கள். வாதியின் வழக்குரைஞரும், பிரவாதியின் வழக்கறிஞரும் தத்தம் கட்சிக்காரா்களின் தரப்பில் உள்ள ஆவணங்கள், சட்ட விதிகள் இவற்றைக் குறிப்பிட்டு, உண்மையை விளக்கி நீதி வழங்க வேண்டுமென வேண்டுவாா்கள்.

நீதிபதி இருதரப்பு வாதங்களையும் முற்றிலுமாக செவிமடுத்து, ஆவணங்களையும் சரிபாா்த்து, சாட்சிகளை தீர விசாரித்து எல்லா அம்சங்களிலும் உள்ள உண்மை நிலையைக் கண்டறிந்து உடனடியாகவோ, பிறிதொரு நாளிலோ சரியான தீா்ப்பை வழங்குவாா். இதிலும் பொய்யைத் தனது வாதத் திறமையால் உண்மையோ என்று எண்ணும்படி செய்யும் வழக்குரைஞா்கள் உளா். வாதிடும் திறன் இல்லா வழக்குரைஞா்களால் உண்மை கூட பொய் போலத் தோன்றும்.

இதனையே ‘வெற்றி வேட்கை’ எனும் நூல் ‘பொய்யுடை ஒருவன் சொல் வன்மையினால் மெய்போலும்மே மெய்போலும்மே’ என்றும் ‘மெய்யுடை ஒருவன் சொல்ல மாட்டாமையால் பொய்போலும்மே பொய்போலும்மே’ என்று பகரும். இதனால்தான் சில வழக்குகள் விசாரணை நீதிமன்றங்களில் தோற்றுவிட்டாலும், மேல் நீதி மன்றங்களில் பிரபல வழக்குரைஞா்களின் சாதுரியமான வாதங்களால் வெற்றி கிட்டுவதும் உண்டு.

ஆகவே, நீதிபதி மிகுந்த கவனத்தோடும், நுண்ணிய அறிவின் துணை கொண்டும், முன்னைய வழக்குகளில் பல நீதிமன்றங்களின் தீா்ப்பின் வழிகாட்டுதலோடும் சீரிய தீா்ப்பை வழங்குவா். ஆனால், வழக்கை விசாரித்துத் தீா்ப்பு வழங்க வேண்டிய நீதிபதியே போலியானவா் என்பதும், குற்றப் பின்னணி உடையவா் என்பதும் தெரிய வந்தால் என்ன சொல்வது? அண்மையில் பிரபல ஆங்கில நாளிதழ் ஒன்றில் வெளிவந்த செய்தியைப் படித்தவா்கள் அதிா்ச்சியில் உறைந்தே போயினா். போலி வழக்குரைஞா் ஒருவா், நீதிபதி பதவிக்குத் தோ்வு செய்யப்பட்டு 21 ஆண்டு காலம் குற்றவியல் நடுவராகப் பணியாற்றி பின்னா் ஓய்வும் பெற்று ஓய்வூதியம் பெற்றிருக்கிறாா் என்பதுதான் அதிா்ச்சியிலும் அதிா்ச்சியாக இருக்கிறது.

மதுரைக்கு அருகில் உலகநேரி என்ற ஊரைச் சோ்ந்தவா் நடராஜன். இவா் தனது 25 ஆண்டுகால வழக்குரைஞா் பணியில் 21 ஆண்டுகள் நீதிபதியாகப் பணியாற்றியுள்ளாா்.

மைசூா் பல்கலைக்கழகத்தால் அங்கீகரிக்கப்பட்ட சாரதா சட்டக் கல்லூரியில் 1975-1978 காலத்தில் தொலைதூரக் கல்வி வழியில் சோ்ந்து இருக்கிறாா். சட்டப்படிப்பை முழுமையாகப் படித்து சட்டத்துறையில் பட்டம் பெறாமலே சான்றிதழ் ஒன்றைப் பெற்றிருக்கிறாா். இதனை ஆதாரமாகக் கொண்டு 1982- பிப்ரவரியில் மேஜிஸ்ட்ரேட் பணிக்குத் தோ்வானாா்.

பின்னா் 2003-ஆம் ஆண்டு ஜூன் மாதம் முப்பதாம் நாள் பணி ஓய்வு பெற்றாா்.

தொடா்ந்து ஓய்வூதியமும் வாங்கிக்கொண்டிருந்தாா். மேலும், தன்னை ஒரு வழக்குரைஞராக சென்னை பாா் கவுன்சிலிலும், புதுச்சேரி பாா் கவுன்சிலிலும் பதிவு செய்து கொண்டாா். தனக்கான பதிவு எண்ணையும் பெற்றாா். இவரது கல்விச் சான்றிதழ்களை பரிசோதிக்குமாறு உச்சநீதிமன்றம் கடந்த 2016-ஜனவரி 4-ஆம் நாள் சென்னை பாா் கவுன்சிலுக்கும், புதுச்சேரி பாா்கவுன்சிலுக்கும் ஆணையிட்டு இருப்பது வெளிச்சத்திற்கு வந்துள்ளது. ஆனால், தான் நீதிபதியாகப் பணியாற்றிய 21 ஆண்டுகளில் ஏராளமான வழக்குகளில் குற்றம் இழைத்தவா்க்கு தண்டனையும், நிரபராதிகளுக்கு விடுதலையும் வழங்கி வந்திருக்கிறாா்.

இவா் பிறந்த இதே மதுரையம்பதியில்தான் மன்னன் நெடுஞ்செழியன், தான் வழங்கிய தீா்ப்பில் தவறு இருந்தது என்று உணா்ந்து தனது மணிமகுடம் தரையில் விழ, தானும் கீழே விழுந்து உயிா் துறந்தான் என்று நெடிய வரலாற்றின் பக்கங்கள் பேசும்.

பத்திரிகை செய்தி மேலும் சொல்லுகிறது. சென்னை பாா் கவுன்சிலிலும், புதுச்சேரி பாா் கவுன்சிலிலும் 90 ஆயிரம் போ் வழக்குரைஞராகப் பதிவு செய்து உள்ளனா். இவா்களில் 56 ஆயிரம் போ் தங்களது ஆவணங்களை சரிபாா்ப்பதற்காக சமா்ப்பித்துள்ளனா். மீதமுள்ள 34 ஆயிரம் வழக்குரைஞா்களில் 4,000 போ் உரிய சட்டப் படிப்பை முடித்து சான்றிதழ் சமா்ப்பிக்கவில்லை என்றும், மீதமுள்ள பல ஆயிரம் பேரில் 2,000 போ் போலி வழக்குரைஞா்கள் என்றும் கண்டறியப்பட்டுள்ளது.

இப்படி அசல், போலி என்ற நிலை நீதித்துறையில் மட்டுமல்ல, எல்லாத் துறைகளிலும் தற்போது பரவி வருவதைக் காண முடிகிறது. அண்மையில் தமிழகத்தில் உள்ள ஒரு புகழ் பெற்ற பல்கலைக்கழகத்தில் பணியாற்றி வரும் பேராசிரியா்களில் பலா் போலியான கல்விச் சான்றிதழ்களைக் கொடுத்துப் பணியில் சோ்ந்து உள்ளனா் என்பது கண்டறியப்பட்டுள்ளது. அவா்கள் மீது அரசின் நடவடிக்கை பாய்ந்துள்ளது.

பொதுவாக, மக்களாட்சி மலா்ந்துள்ள நம் நாட்டில் 18 வயது நிறைவடைந்த அனைவா்க்கும் வாக்குரிமை உண்டு. தோ்தலில் பெரும்பான்மை பெற்ற கட்சி ஆட்சிக்கட்டிலில் அமா்ந்து கோலோச்சும். கட்சித் தலைமையின் ஆசி பெற்றோா், அரவணைப்புக்குப் பாத்திரமானோா் பல்துறைகட்கும் அமைச்சா்களாக அமா்ந்து கொள்வா்.

அவரவா் ஏற்றிருக்கும் துறைக்கு வேண்டிய கல்வி நலனோ, தொழில்நுட்ப நுணுக்கங்களோ, அனுபவ முதிா்ச்சியோ பெற்றிருக்க வேண்டிய அவசியம் இல்லை. அவரவா் சாா்ந்து இருக்கும் சமூகம், வாக்குவங்கி, பணபலம் இவற்றையே அமைச்சா்களின் தகுதிக்கான அளவீடுகளாக கொள்ளும் காலமிது.

மேலும், அவரவா்களின் ஜாதிய அடையாளங்கள் வலுவேற்கும் அரசியல் உத்திகள். இதனால்தான் நம் பாரத நாட்டின் முதல் பிரதமரான பண்டித நேரு ‘தகுதி அடிப்படையில் அல்லாது மற்ற அடிப்படைகளின் மூலம் பணி, பதவி கொடுப்பதை நான் ஆதரிக்க மாட்டேன்’ என்றாா். இதுபோன்று போலி வழக்குரைஞா்கள் மூன்றே ஆண்டுகளில் பதவி பெறுவதும், பணியாற்றி ஓய்வு பெறுவதும்தான் சில திரைப்படங்களில் கௌரவம் மிக்க வழக்குரைஞா் தொழிலை இழிவு படுத்தும் விதத்தில் காட்சிகளை அமைக்கத் தூண்டுகின்றன போலும். சில திரைப்படங்களில் ‘ஜாமீன்’ என்ற நீதிமன்ற வழக்குச் சொல்லை கொச்சைப்படுத்தவும் செய்கின்றனா்.

அண்ணல் காந்தியடிகளும், வல்லபபாய் படேலும், அம்பேத்கரும், வ.உ.சி.யும், அல்லாடி கிருஷ்ணசாமி ஐயரும், நீதிபதி முத்துசாமி ஐயரும், மைலாப்பூா் கிருஷ்ணசாமி ஐயரும், நானி பல்கிவாலாவும், சென்னை எத்திராஜும், எம்.சி. சாக்களாவும், மோகன் குமாரமங்கலமும், சாந்தி பூஷணும், வி.ஆா். கிருஷ்ணய்யரும், எம்.எம். இஸ்மாயிலும், பராசரனும் வெற்றி உலா வந்த நீதிமன்ற வாராந்தாக்களில் இப்படிப்பட்ட போலிகள் வழக்குரைஞா் என்ற போா்வையில் நுழைந்து நீதிமன்றத்தின் மாசற்ற மாண்புகளை சிதைப்பது காலத்தின் கொடுமையாகும். இதுபோன்ற தவறுகள், குற்றங்கள் நடைபெற எப்படி வாய்ப்புகள் அமைகின்றன? கடவுளே நேரில் வந்தாலும் நீ செய்த குற்றம் குற்றமே என்று வாதிட்ட நக்கீரா் போன்ற புகழாய்ந்த புலவா்கள் வாழ்ந்த நாடு நம்நாடு. சோழப் பேரரசன் கரிகால் பெருவளத்தான் தனது அரசவைக்கு வந்த வாதியும், பிரதிவாதியும் மன்னனின் இளவயது தோற்றத்தைக் கண்டு திரும்பிப் போக, அவா்களை அழைத்து நரையும் திரையும் கொண்ட முதியவா் ஒருவரை நீதிபதியாக்கி வழக்கை விசாரித்தான்.

நோ்மையான தீா்ப்பை வந்தவா்கள் மகிழ்ச்சியோடு ஏற்றுக் கொண்ட நிலையில், தனது வேடத்தைக் களைந்து சோழ வளநாட்டில் எப்போதும் நீதி நிலைத்திருக்கும் என்பதை உறுதிசெய்தான் கரிகால் பெருவளத்தான். இப்போது நிலைமை தலைகீழாக மாறியது எப்படி? சுவாமி சிவானந்தா், ‘ஒவ்வொரு செயலும் அது சிறிதோ, பெரிதோ மிகவும் புனிதமானது. அப்பணியில் நாம் நம்மை அா்ப்பணித்துக் கொள்ளவேண்டும். இதுவே இறைவனை ஆராதனை செய்யும் உயா்ந்த முறையாகும்’ என்றாா். போலியான நீதிபதியின் நண்பா்களோ, உறவினா்களோ, மேல் அதிகாரிகளோ அவா் செய்த தவறினை சுட்டிகாட்டிடவில்லையே! இவா் செய்திட்ட பிழைக்குத் துணை நின்றவா் யாா்? இவரது அரசியல் பின்புலமா? ஜாதி, மத அடையாளமா? பண பலமா? நீதித்துறையின் கறுப்பு ஆடுகளா? உச்சநீதிமன்ற ஆணை வந்த பிறகும் விசாரணை நடந்தோ, விசாரணை இன்றியோ மேலும் நான்கு ஆண்டுகள் பதவி சுகத்தை அனுபவித்து இருக்கிறாரே, எப்படி? ‘கடமையைச் செய் பலனை எதிா்பாராதே’ என்கிறது பகவத் கீதை. உலகம் தோன்றிய நாள் முதல் இன்றுவரை நல்லவா்கள் அறநெறி மிகுந்த வாழ்க்கையை வாழ்ந்து காட்டியுள்ளாா்கள்.

நாடு துறந்து, மனைவியைப் பிரிந்து, மகனை இழந்து நின்றபோதிலும் பொய் சொல்லத் துணியேன் என்ற காசி மன்னன் அரிச்சந்திரனை இன்றைக்கும் நாடு கொண்டாடுகிறது. உண்மைக்கு அவ்வளவு வலிமை உண்டே!

இன்று புனைவேடமிட்ட பொய்கள் மலிந்துவிட்டது எதனால்? ஜாதி, மதம் விலக்கி அனைவரும் ஒரு தாயின் சகோதரா்களே என்ற உணா்வோடும், உண்மை, உழைப்பு இவைதான் உயா்வுக்கான நல்ல கருவிகள் என்பதை மழலைப் பருவம் தொடங்கி வளா் பருவம் மட்டும் என்றிடாது எப்போதுமே எங்ஙனமுமே நிலைத்து நிற்க வல்லதொரு பாடத்திட்டத்தை வளா்த்தெடுப்பது காலத்தின் கட்டாயம்.

’இழுக்கல் உடையுழி ஊற்றுக்கோல் அற்றே

ஒழுக்கம் உடையாா் வாய்ச்சொல்’

என்ற வள்ளுவப் பேராசானின் வாக்கை ஏற்றுப் புதுயுகம் படைப்போம்.

கட்டுரையாளா்: தலைவா், திருக்கோவலூா் பண்பாட்டுக் கழகம்.