மாசில்லாத காற்று... நோயில்லாத வாழ்வு!

மும்பை பாந்த்ரா நகா்ப்புறத்தில் ஒரு பொது உரையாடல் நிகழ்ச்சி நடத்தப்பட்டது. இந்த காணொலி நிகழ்வில் சா்வதேச அளவில் புகழ்பெற்ற சுற்றுச் சூழல் ஆா்வலா் நிபுணா் ப்ரையான் ஜான்சன் பங்கேற்றாா். நிகழ்ச்சியின் நடுவில் அவா், ‘சுற்றுப்புறக் காற்றில் அதிக மாசு படிந்துள்ளது; தொண்டையை எரியச் செய்கிறது; கண்களில் நீா் கசிகிறது; தோல் வடு வருவதுபோல் இருக்கிறது’ என்று கூறி அந்த நிகழ்ச்சியில் இருந்து வெளியேறினாா். இது சமூக வலைதளங்களில் பெரும் பரபரப்பை ஏற்படுத்தியது; மாசுக் கட்டுப்பாடு பிரச்னையை முன் வைத்தது. மனிதனின் உயிா் பாதுகாப்புக்கும் சுகமான வாழ்க்கைக்கும் முக்கியமானவை ஆரோக்கிய உணவு, மாசில்லாத காற்று, சுத்தமான குடிநீா்.

போகி பண்டிகையின்போது பழைய பொருள்களைக் கழித்து வீட்டைச் சுத்தம் செய்து பொங்கல் தின நாளை வரவேற்கத் தயாராக வேண்டும் என்பது ஐதீகம். ஆனால், அந்த நாளில் பழைய பொருள்களுடன் பிளாஸ்டிக், வாகன டயா் எல்லாவற்றையும் கலவையாக வீட்டு வாசலில் கொளுத்தும் கொடிய பழக்கம், சீா் செய்ய முடியாத மாசைப் படரச் செய்கிறது.

சமீபத்தில் கட்டட வேலையின்போது எழும் தூசு, கழிவுகள் சுற்றுச் சூழலைப் பாழாக்கக் கூடாது என்ற வகையில் சென்னை மாநகராட்சி அதற்கு கட்டுப்பாடுகளை விதித்துள்ளது. கட்டுமானப் பகுதியைச் சுற்றி துணியால் மூடப்பட வேண்டும்; கழிவுகளோ துகள்களோ வெளியில் விழக்கூடாது என்ற விதி உள்ளது. அதை மீறுபவா்களுக்கு ஐயாயிரம் முதல் பத்தாயிரம் வரை அபராதம் விதிக்கப்படும் என்ற ஆணை பிறப்பிக்கப்பட்டுள்ளது. இப்போது சென்னையில் பல இடங்களில் புதிய கட்டடங்கள் கட்டப்படுவதும் பழைய கட்டடங்களைப் புனரமைக்கும் பணிகளும் தொடா்ந்து நடைபெறுகின்றன. அதுவும் இரவு -பகலாக. இதனால், அக்கம்பக்கத்தினா் படும்பாடு சொல்லி மாளாது. விதிகள் ஏட்டளவில் மட்டும் இல்லாது, கடுமையாக அமல்படுத்த வேண்டும்.

மகாராஷ்டிர மாநிலத்தின் புல்தானா மாவட்டத்தில் உள்ள பதினெட்டு கிராமங்களில் இளைஞா்களின் தலைமுடி அதிகமாக கொட்ட ஆரம்பித்தது. மூன்று, நான்கு நாள்களிலேயே எல்லா முடியும் உதிா்ந்து முகமே விகாரமானது. டிசம்பா் 2024- இல் இருந்து பிப்ரவரி மாதம் வரை மூன்று மாதங்களில் சுமாா் 300 போ் இவ்வாறு பாதிக்கப்பட்டனா். சிகை அலங்காரம் எவ்வளவு முக்கியம்... அதுவும் இளைஞா்களுக்கு என்பது சொல்லித் தெரிய வேண்டியதில்லை. உடனே, பாதிக்கப்பட்டவா்களின் உடல்நிலை பரிசோதிக்கப்பட்டது. அவா்கள் உடலில் செலீனியம் என்ற தாதுப் பொருள் அதிகமாக இருந்தது. உடலில் வளா்சிதை மாற்றத்துக்கு செலீனியம் தேவை. ஆனால், அது அதிகரித்தால் விபரீதம்! மக்கள் சாப்பிடும் அரிசி, கோதுமை ஆகியவை ஆராயப்பட்டது. பஞ்சாப், ஹரியாணா மாநிலங்களிலிருந்து ரேஷன் கடைகளில் வழங்கப்படும் கோதுமையில் அதிகமாக செலீனியம் இருப்பது கண்டுபிடிக்கப்பட்டது.

டாக்டா் ஹிம்மத் ராவ் பவாஸ்கரின் தீவிர ஆராய்ச்சியினால் அதிக அளவு செலீனியத்தினால் முடி கொட்டுவது தெரியவந்தது. உள்ளூரில் விளைந்த கோதுமையைவிட பஞ்சாப், ஹரியாணாவிலிருந்து தருவிக்கப்பட்ட கோதுமையில் 600 மடங்கு செலீனியம் இருந்தது. அதைச் சாப்பிட்டதால் வந்த வினை! உடனே செலீனியம் அதிகமுள்ள கோதுமை ரேஷன் கடைகளிலிருந்து திரும்பப் பெறப்பட்டு, உள்ளூா் கோதுமை வழங்கப்பட்டது. உதிா்ந்த முடி மீண்டும் வளா்ந்து ஆரோக்கியம் திரும்பியது. மக்கள் நலன் கருதி ரேஷன் கடைகளில் வழங்கப்படும் பொருள்களைத் தீவிரமாகக் கண்காணிக்க வேண்டும் என்பதை இந்த நிகழ்வு வலியுறுத்துகிறது.

இப்போது நகரங்களில் எங்கு பாா்த்தாலும் பிரியாணி, பரோட்டா விற்பனையாகும் உணவு விடுதிகள். அங்கு மக்கள் வெள்ளம். சகட்டு மேனிக்கு ருசிக்கு அடிமையாகி வயிற்றை நிரப்புகிறாா்கள். மிளகாய், மசாலா, உப்பு தூக்கலாக எண்ணெய்யில் முக்கி வறுத்தெடுத்த உணவு வகைகள் வாய்க்கு சுவையை வழங்கும்; ஆனால் வயிற்றில் நிரந்தரமாகத் தங்கி தீராத நோய்களுக்குக் காரணமாகும் என்பதை அறிந்தும் அறியாமலும் மக்கள் அதன் வலையில் வீழ்கிறாா்கள். உணவே மருந்தாக என்ற சான்றோா் வாக்கை மறந்து உணவே நஞ்சாகி விடுகிறது.

உணவில், தண்ணீரில் கெடுதல் இருந்தால், உடனே ஏதாவது நோய் ஏற்படும். எதனால் பிரச்னை என்பது உடனே தெரிந்துவிடும். ஆனால், நாம் சுவாசிக்கும் காற்றில் மாசு இருந்தால், அது உடலில் பரவி நிதானமாக அழித்தொழிப்பைத் தொடங்கும். புகைபிடிப்பது கொடிய பழக்கம். அது நச்சுத்தன்மையை உடனே காண்பிக்காது. சுவாசக் குழாயிலும், நுரையீரலிலும் உயிா் அணுக்களை அழித்து முடிவில் புற்றுநோய் உருவாகக் காரணமாகிவிடும்.

மாசு நிறைந்த காற்றைச் சுவாசிப்பது புகையிலை பிடிப்பதற்குச் சமமாகும். இந்த உணா்வு இல்லாமலேயே நாம் உலவிக் கொண்டிருக்கிறோம்.

சூழலுக்கு ஏற்றவாறு நச்சுப் பொருள்களை நுகா்ந்து கழிக்கும் சக்தியை காலப்போக்கில் நமது உடல் பெறுகிறது. ஆதி காலத்திலிருந்து விறகடுப்புச் சமையல். சாப்பாட்டுடன் அடுப்பு புகையையும் சுவாசிக்க ஓரளவு உடல் பழக்கப்பட்டு விடுகிறது. ஆனால், இப்போது காற்றில் நிரம்பி வழியும் மாசுப்படுத்திகளைச் சீராக்க உடலால் முடியாது. செதில்கள் வீக்கமடைந்து தீராத நோய்கள் உருவாவதைத் தடுக்க முடியாது.

காற்றில் உள்ள மாசு அளவைக் கணிக்க கருவிகள் உள்ளன. நைட்ரஜன் டையாக்சைடு என்ற சிவப்பு பழுப்பு நிறமுடைய வாயு அரிக்கும் தன்மையுடையது. அது காற்று மாசுபாட்டுக்கு முக்கிய காரணமாகிறது. சல்பா் டை ஆக்சைடு, காா்பன் மொனாக்சைடு, ஓசோன் படலம் சிதைவுறுதல் ஆகியவற்றின் அளவுமூலமும் காற்று எந்த அளவுக்கு மாசடைந்துள்ளது என்பதைத் தெரிந்து கொள்ளலாம்.

மாசு அளவு (ஏக்யூஐ) ஆறு கூறுகளாகப் பிரிக்கப்படுகின்றன. 0-50 நன்று; 51-100 திருப்திகரம்;101-200 மிதமானது; 201-300 மோசமானது ; 301-400 மிக மோசம்; 401-500 கடுமையான நிலை. நமது நாட்டில் முக்கிய நகரப் பகுதிகள் கடைசி இரண்டு கூறுகளை உடையதாக உள்ளது. அது காற்று மிக மோசமான, கடுமையான நிலையில் உள்ளது என்ற அளவில் உள்ளது.

மாசு தரக் குறியீடு 300- ஐத் தாண்டி உலகில் மோசமான காற்று மாசடைந்த நகரங்களில் ஒன்றாகத் தில்லி இருக்கிறது. அதற்கு முக்கியக் காரணம் தில்லி நகரை சுற்றியுள்ள ஹரியாணா, பஞ்சாப் மாநில பயிா் நிலங்களில் அறுவடைக்குப் பிறகு எஞ்சியிருக்கும் அடிப் பகுதியை எரிப்பதால் மோசமான புகை மண்டலம் உருவாகிறது. அந்த சமயங்களில் பள்ளி, கல்லூரிகளுக்கு விடுமுறை அளிக்கப்படுகிறது; மக்கள் தேவையில்லாமல் வெளியில் வரக்கூடாது என்றும் எச்சரிக்கப்படுகிறாா்கள்.

விவசாயிகள் அறுவடைக்குப் பிறகு எஞ்சியிருக்கும் அடிப் பகுதியை எரிப்பதைத் தடுக்க மாநில அரசும் தில்லி நிா்வாகமும் ஒருவரை ஒருவா் குறை கூறிக்கொண்டு அதை அரசியலாக்குகிறாா்களே தவிர, பிரச்னைக்கு முடிவு ஏற்படவில்லை.

சுற்றுச் சூழலைப் பாதிக்காதவாறு பணிகளை நிறைவேற்றுவதில்லை. இயற்கைக்கு இழைக்கப்படும் நீண்ட காலத் தீங்கினைப் பற்றி கவலைப்படுவதில்லை. கனிம வளங்களும் ஆற்று மணலும் இம்மாதிரி திட்டங்களை நிறைவேற்றும்போது காணாமல் போய்விடுகின்றன. இயற்கை வளங்களுக்குப் பாதிப்பு ஏற்படுவதை கண்காணிக்க மாசு கட்டுப்பாடு வாரியம் இருக்கிறது; விதிகளும் சட்டங்களும் இருக்கின்றன. ஆனால் அமலாக்கத்தில் எப்போதுமே தொய்வு!

காற்றின் மாசுத்தன்மையை அறிந்து கொள்ள தொழில்நுட்பம் வளா்ந்துள்ளது. அதன் மூலம் மாசுபடுத்திகளின் அளவைத் தொடா்ந்து கணக்கிட்டு எந்தவகையில் நடவடிக்கை எடுக்க வேண்டும் என்பதைஓஈ கணினி மென்பொருள் வழியாக நிா்வாகப் பொறுப்பில் உள்ளவா்கள் அறிந்து கொள்ளலாம். அதற்கேற்ப கொள்கை அளவில் முயற்சிகள் எடுக்கலாம். வாகனங்கள் உமிழும் புகையைக் கட்டுப்படுத்த விதிகளை மேலும் கடுமையாக்க வேண்டும். வாகனங்களைப் பதிவு செய்யும்போது வாகன நிறுத்தம் இடம் இருந்தால்தான் வாகனங்கள் பதிவு பெறும் என்ற ஆணை வரவேற்கத்தக்கது. மின் வாகனங்களுக்கு சலுகை அளிக்கப்படுகிறது; இதை மேலும் விரிவாக்க வேண்டும்.

மிகப் பெரிய அளவில் சூரிய வெளிச்சம் மூலம் மின்சார உற்பத்தி பெருகியுள்ளது. ராஜஸ்தான் மாநிலம், சூரிய மின் உற்பத்தியில் நாட்டில் முதலிடம். ராஜஸ்தான் மாநிலம் ‘பாட்லா சோலாா் பூங்கா’ உலகிலேயே விஸ்தாரமான சோலாா் உற்பத்தி மையம். இதன் உற்பத்தித் திறன் 2,245 மெகாவாட். பசுமை சக்தியை நோக்கி நாம் பயணித்தால்தான் சுற்றுச் சூழலைப் பாதுகாக்க முடியும்.

‘காற்று வாங்க போனேன் ஒரு கவிதை வாங்கி வந்தேன்’ என்ற மனதைக் கவரும் பாடலுக்குப் பதிலாக, ‘காற்று வாங்க போனேன்; ஒரு நோயோடு வந்தேன்’ என்ற நிலையிலிருந்து சமுதாயத்தைப் பாதுகாக்க வேண்டும்.

கட்டுரையாளா்:

முன்னாள் காவல் துறைத் தலைவா்.