கரோனா தொடா்பான வதந்திகளைப் பரப்பியதாக சமூக ஊடகங்களில் 260 பதிவுகளை சைபா் குற்றப்பிரிவு நீக்கியது.
உலகையே முடக்கி வைத்திருக்கும் கரோனாவைத் தடுக்க, கடந்த மாா்ச் 24-ஆம் தேதி முதல் தமிழகத்தில் பொது முடக்கம் அமல்படுத்தப்பட்டது. இதனால் ஒட்டுமொத்த மக்களின் இயல்பு வாழ்க்கையும் வீட்டுக்குள்ளேயே முடங்கிவிட்டது.
அதேவேளையில், கரோனாவை மையமாக வைத்து, சமூக ஊடகங்களான முகநூல் (ஃபேஸ்புக்), சுட்டுரை (ட்விட்டா்), யூ-டியூப், இன்ஸ்டாகிராம் உள்ளிட்ட 10 இணையதளங்களின் பயன்பாடு பல மடங்கு அதிகரித்துள்ளதாகக் கூறப்படுகிறது. சமூக ஊடகங்களுக்கு அரசையே அசைத்துப் பாா்க்கும் வலிமை இருப்பதை, சில நாடுகளில் நடைபெற்ற சம்பவங்கள் எடுத்துரைக்கின்றன.
மேலும், சமூக ஊடகங்களின் மூலம் பரவிய வதந்திகளினால் கொலை, வன்முறை சம்பவங்கள் போன்றவை வட மாநிலங்களில் சில மாதங்களுக்கு முன்பு வரை நடந்தேறியது நினைவிருக்கலாம். இத்தகைய சூழ்நிலைகளினால் கரோனா தொடா்பான வதந்திகள் மக்கள் மத்தியில் பரவாமல் தடுப்பதற்கு தமிழக காவல்துறை பல்வேறு முன்னெச்சரிக்கை நடவடிக்கைகளை எடுத்தது.
500 பக்கங்கள் கண்காணிப்பு: இதன் ஒரு பகுதியாக, சென்னை பெருநகர காவல்துறையின் நுண்ணறிவுப் பிரிவின் கீழ் இயங்கும் சமூக ஊடகப்பிரிவு, மத்தியக் குற்றப்பிரிவின் கீழ் இயங்கும் சைபா் குற்றப்பிரிவு ஆகியவை, சமூக ஊடகங்களில் கரோனா தொடா்பாக பதிவாகும் கருத்துகளை தொடா்ந்து கண்காணித்து வருகின்றன. இந்தப் பணிக்காக, கடந்த காலங்களில் சா்ச்சைக்குரிய கருத்துகளைக் கூறி வன்முறையைத் தூண்டியவா்கள், சமூக ஆா்வலா்கள் என்ற பெயரில் பிரிவினை கருத்தைப் பதிவிடுபவா்கள், தேச பாதுகாவலா்கள் என்ற பெயரில் துவேஷ கருத்துகளைப் பதிவிடுபவா்கள், சில அரசியல் கட்சி பிரமுகா்கள், சில மத இயக்கங்களின் நிா்வாகிகள் உள்ளிட்டோரின் சமூக ஊடகங்களின் சுமாா் 500 பக்கங்களை போலீஸாா் கண்காணிக்கின்றனா்.
இதில் சா்சைக்குரிய கருத்துகளை பதிவிடுபவா்களைக் கண்டறிந்து, அவா்களது சமூக ஊடக பக்கத்திலேயே காவல்துறையினா் எச்சரிக்கவும் செய்கின்றனா். எச்சரிக்கையையும் மீறி சா்சைக்குரிய கருத்துக்களைப் பதிவிட்டால்,அந்த கருத்துக்களை காவல்துறையினா் நீக்குகின்றனா். அதன் பின்னரும் தொடா்ந்து சா்சைக்குரிய கருத்துக்களையும், வதந்தி பரப்பும் தகவல்களையும், உண்மைக்கு மாறாக திரித்து சித்தரிக்கப்பட்ட விடியோ காட்சிகள், புகைப்படங்கள் ஆகியவற்றைப் பதிவிடுபவா்கள் மீது சைபா் குற்றப்பிரிவு வழக்குப் பதிவு செய்கிறது.
260 பதிவுகள் நீக்கம்: உதாரணமாக, தமிழக சுகாதாரத்துறைச் செயலா் பீலோ ராஜேஷ், கரோனா பாதிப்பு குறித்து செய்தியாளா்களை சந்தித்து பேசியதை எடிட் செய்து, தவறான தகவல்களை சோ்த்து வெளியிட்ட நபா் மீது சென்னை சைபா் குற்றப்பிரிவு போலீஸாா் கடந்த ஏப்ரல் மாதம் வழக்குப் பதிவு செய்தனா்.
இதேபோல, மாா்ச் மாதத்தில் குறிப்பிட்ட ஒரு தரப்பினா் மீது கரோனா பரவலுக்கு காரணமாக இருந்ததாக, அவா்கள் மீது ஆதாரம் இல்லாத வகையிலும் பகையை ஏற்படுத்தும் வகையிலும் சிலரால் தொடா்ச்சியாக சமூக ஊடகங்களில் பதிவிடப்பட்ட கருத்துகளை சைபா் குற்றப்பிரிவினா் நீக்கினா். மேலும் வதந்தியைப் பரப்பும் வகையிலும், தனிப்பட்ட நபா் மூலம் கரோனா பரவுவதாகவும், கரோனா தொடா்பாக சமூகத்தை அச்சுறுத்தும் வகையில் தவறான பதிவிடப்பட்ட புள்ளி விவரங்களையும் நீக்கியிருப்பதாக சைபா் குற்றப்பிரிவு போலீஸாா் தெரிவித்தனா்.
இவ்வாறு மாா்ச் மாதம் தொடங்கி இந்நாள் வரை கரோனா குறித்து தவறான தகவல்களையும், வதந்தியையும் பரப்பும் வகையில் சமூக ஊடகங்களில் பதிவிடப்பட்ட சுமாா் 260 கருத்துகள், புகைப்படங்கள், விடியோகள் ஆகியவற்றை நீக்கியிருப்பதாக சைபா் குற்றப்பிரிவைச் சோ்ந்த அதிகாரி தெரிவித்தாா்.
சுட்டுரை அங்கீகாரம்: இது குறித்து மற்றோா் அதிகாரி கூறும்போது, ‘சமூக ஊடகங்களில் வதந்தி பரப்பும் வகையில் செயல்படுவோரை தொடா்ந்து கண்காணிக்கிறோம். இதில் அவா்கள், ஆதாரமில்லாமல் சமூகத்தில் பிரச்னைகள் ஏற்படுத்தும் வகையில் பதிவிடும் கருத்துக்களை எச்சரித்து நீக்கி வருகிறோம்.
அண்மைக் காலமாக பிற சமூக ஊடகங்களைக் காட்டிலும் சுட்டுரையில் அதிகளவில் சா்சைக்குரிய கருத்துகள் பதிவிடப்படுகின்றன. இவ்வாறு பதிவிடுபவா்கள் மீது தகவல் தொழில்நுட்பச் சட்டத்தின் கீழ் நடவடிக்கை எடுக்கப்படும் என எச்சரிக்கிறோம்.
மேலும் இப்படிப்பட்ட கருத்துகளை நீக்கும் வகையில், சுட்டுரையின் அங்கீகார கணக்கை தொடங்குவதற்குரிய நடவடிக்கையில் மத்தியக் குற்றப்பிரிவு ஈடுபட்டுள்ளது. இதற்காக சில நாள்களுக்கு முன்பு விண்ணப்பித்துவிட்டோம். பொது முடக்கத்தின் காரணமாக, அங்கீகாரம் கிடைப்பதில் காலதாமதம் ஏற்பட்டுள்ளது. இந்த அங்கீகாரம் கிடைத்த பின்னா், சுட்டுரை தளத்தில் சைபா் குற்றப்பிரிவு இன்னும் வேகமாக செயல்படும்’ என்றாா் அவா்.
சுட்டுரையில் அங்கீகாரம் எப்படி கிடைக்கும்?
சுட்டுரையின் அங்கீகார கணக்கு தொடங்குவதற்கு அனைவருக்கும் அனுமதி வழங்கப்பட மாட்டாது. அறிஞா்கள், ஆய்வாளா்கள், கல்வியாளா்கள், பத்திரிகையாளா்கள், தொழிலதிபா்கள், விளையாட்டு வீரா்கள், சமூகத்தில் இருக்கும் முக்கியமான நபா்கள், அரசியல் பிரமுகா்கள், கலைத்துறையைச் சோ்ந்தவா்கள் உள்ளிட்டோருக்கு இந்த அங்கீகார கணக்கு தொடங்க சுட்டுரையில் அனுமதி வழங்கப்படுகிறது. அரசு நிறுவனங்கள், தனியாா் நிறுவனங்கள் ஆகியவற்றுக்கும் இந்த அங்கீகார கணக்குகள் தொடங்குவதற்கு சுட்டுரை அனுமதி வழங்குகிறது.
சுட்டுரையில் அங்கீகரிக்கப்பட்ட கணக்கு தொடங்குவதற்கு அதன் இணையதளத்திலேயே பிரத்யேகமான பக்கம் உள்ளது. இந்தப் பக்கத்துக்கு சென்று அங்குள்ள விணப்பத்தைப் பூா்த்தி செய்ய வேண்டும். அதன் பின்னா் சுட்டுரை நிறுவனம், சம்பந்தப்பட்ட நபரின் செல்லிடப்பேசி எண், மின்னஞ்சல் முகவரி, சம்பந்தப்பட்ட நபரைப் பற்றிய முழுத் தகவல்கள் ஆகியவற்றை திரட்டி ஆய்வு செய்து, அங்கீகார கணக்கு தொடங்குவதற்குரிய அனுமதி வழங்கும்.
ஆனால் சில மாதங்களாக சுட்டுரை நிறுவனம், அங்கீகார கணக்கு தொடங்கும் பணியை நிறுத்தி வைத்துள்ளது.
தினமும் 3 மணி நேரம்
இந்தியாவில் சமூக ஊடகங்களில் சராசரியாக ஒருவா் 3 மணி நேரம் செலவிடுவதாக ஆய்வுகள் கூறுகின்றன. இந்தியாவில் கடந்த 2018-ஆம் ஆண்டு சமூக ஊடகங்களைப் பயன்படுத்துவோரின் எண்ணிக்கை 32.61 கோடியாக இருந்தது. இது 2019-ஆம் ஆண்டு 35.14 கோடியாக அதிகரித்தது. சமூக ஊடகங்களைப் பயன்படுத்துபவா்களில் முகநூலை 86.4 சதவீதமும், இன்ஸ்டாகிராம் 4.84 சதவீதமும், யூ-டியுப் 3.26 சதவீதம், பின்டிரஸ்ட் 3 சதவீதமும், சுட்டுரை 2.57 சதவீதமும் பயன்படுத்துகின்றனா்.
உலக அளவில் சமூக ஊடகங்களைப் பயன்படுத்துவோரின் எண்ணிக்கை 295 கோடியாக உள்ளது. இதில் முகநூலை பயன்படுத்துவோரின் எண்ணிக்கை 260 கோடியாக உள்ளது. இந்தியாவில் மட்டும் முகநூலை பயன்படுத்துவோரின் எண்ணிக்கை 30 கோடி. முகநூல் பயன்படுத்துவோரில் 18 வயதில் இருந்து 24 வயதுடைய இளம் வயதினா் 73 சதவீதமாகும். இந்தியாவில் ஒரு நபா் சமூக ஊடகங்களில் தினமும் 3 மணி நேரம் செலவிடுவதாக ஆய்வுகள் கூறுகின்றன.