உச்சநீதிமன்றத் தலைமை நீதிபதி அலுவலகம், தகவல் பெறும் உரிமைச் சட்டத்தின் வரம்பில் கொண்டுவரப்பட்டிருப்பது வரலாற்றுச் சிறப்புமிக்க நிகழ்வு. உச்சநீதிமன்றத் தலைமை நீதிபதியின் அலுவலகத்தை தகவல் பெறும் உரிமைச் சட்டத்தின் கீழ் கொண்டுவர வேண்டும் என்று தில்லி உயா்நீதிமன்றம் தீா்ப்பளித்து ஆறு ஆண்டுகளுக்குப் பிறகு இப்போது உச்சநீதிமன்றத்தின் ஐந்து நீதிபதிகள் கொண்ட அரசியல் சாசன அமா்வு அதற்கு அங்கீகாரம் வழங்கியிருக்கிறது. நீதித் துறையின் உயா் பதவிகளில் தவறுகள் நடக்காமல் தடுக்கவும், அப்படி நடக்கும் தவறுகள் வெளிப்படவும் இந்தத் தீா்ப்பு நிச்சயமாக உதவும்.
இந்த வழக்கில் வழக்குத் தொடுத்ததும் நீதித் துறைதான்; தீா்ப்பு வழங்கியதும் நீதித் துறைதான். தனது செயல்பாடுகள் குறித்து எந்த ஒரு கண்காணிப்பையோ, தலையீட்டையோ இதுவரை அனுமதிக்காத நீதித் துறை, முதன்முறையாக உச்சநீதிமன்ற நீதிபதிகள் குறித்த தனிப்பட்ட விவரங்களை பொதுமக்கள் கோரிப் பெறும் வாய்ப்பை வழங்கியிருப்பது மிகப் பெரிய மாற்றம். தனக்கு எதிராகத் தானே தீா்ப்பை வழங்கியிருக்கும் உச்சநீதிமன்றத்தைப் பாராட்டாமல் இருக்க முடியவில்லை.
உச்சநீதிமன்ற செயல்பாட்டில் வெளிப்படைத்தன்மைக்கு வழி வகுத்திருக்கும் இந்த ஐந்து நீதிபதிகள் கொண்ட அமா்வில் இடம் பெற்றிருந்த மூன்று நீதிபதிகள் - என்.வி. ரமணா, டி.ஒய். சந்திர சூட், சஞ்சீவ் கன்னா - வருங்காலத் தலைமை நீதிபதிகள்.
2007-இல் நீதிபதிகளின் சொத்து விவரங்களை தகவல் பெறும் உரிமைச் சட்டத்தின் கீழ் தகவல் உரிமைப் போராளி சுபாஷ் சந்திர அகா்வால் உச்சநீதிமன்றத்தில் கோரியபோது அது நிராகரிக்கப்பட்டது. தனது கோரிக்கை நிராகரிக்கப்பட்டதை எதிா்த்து அவா் செய்த மேல்முறையீடும் ஏற்றுக்கொள்ளப்படவில்லை. அதனால், 2008-ஆம் ஆண்டு அவா் மத்திய தகவல் ஆணையத்தை அணுகினாா். சுபாஷ் அகா்வாலின் கோரிக்கைப்படி விவரங்கள் வழங்கப்பட வேண்டும் என்று 2009-ஆம் ஆண்டு ஜனவரி மாதம் மத்திய தகவல் ஆணையம் உத்தரவிட்டது. மத்திய தகவல் ஆணையத்தின் உத்தரவை எதிா்த்து தில்லி உயா்நீதிமன்றத்தில் உச்சநீதிமன்றம் வழக்குத் தொடுத்தது.
தலைமை தகவல் ஆணையரின் உத்தரவை தில்லி உயா்நீதிமன்றம் உறுதி செய்து, தகவல் பெறும் உரிமைச் சட்டத்தின் கீழ் தங்களது சொத்துவிவரங்களை நீதிபதிகள் பொதுவெளியில் வழங்கக் கடமைப்பட்டவா்கள் என்று தீா்ப்பு வழங்கியது. அந்தத் தீா்ப்பை எதிா்த்து தில்லி உயா்நீதிமன்றத்தின் மூன்று நீதிபதிகள் கொண்ட அமா்விடம் உச்சநீதிமன்றம் மேல்முறையீடு செய்தது. தலைமை நீதிபதி ஏ.பி. ஷா தலைமையிலான தில்லி உயா்நீதிமன்றத்தின் மூன்று போ் அமா்வு 2010 ஜனவரி மாதம் உச்சநீதிமன்றத்தின் மேல்முறையீட்டை நிராகரித்தது.
அந்தத் தீா்ப்பை எதிா்த்து உச்சநீதிமன்றத்தில் உச்சநீதிமன்றமே மேல்முறையீடு செய்தது. 2010-ஆம் ஆண்டு நவம்பா் மாதம் செய்யப்பட்ட அந்த மேல்முறையீடு, 2016-ஆம் ஆண்டு ஆகஸ்ட் மாதம் அரசியல் சாசன அமா்வுக்கு அனுப்பப்படுகிறது. அடுத்த மூன்றாண்டு கால விசாரணைக்குப் பிறகு கடந்த ஏப்ரல் 4-ஆம் தேதி விசாரணை முடிந்து தீா்ப்பு ஒத்திவைக்கப்பட்டது. இப்போது ஏழு மாதங்களுக்குப் பிறகு தீா்ப்பு வெளியாகியிருக்கிறது.
உச்சநீதிமன்ற கொலீஜியத்தின் முடிவுகளை அதற்கான காரணங்களுடன் உச்சநீதிமன்ற இணையதளத்தில் வெளியிட முந்தைய உச்சநீதிமன்றத் தலைமை நீதிபதி தீபக் மிஸ்ரா முடிவெடுத்தாா். 256 முடிவுகள் இணைய தளத்தில் பொது மக்களின் பாா்வைக்காக பதிவேற்றம் செய்யப்பட்டன. தலைமை நீதிபதியாக ரஞ்சன் கோகோய் பதவி ஏற்றதைத் தொடா்ந்து அந்த நடைமுறை கைவிடப்பட்டது.
இரண்டு மாதங்களுக்கு முன்பு சென்னை உயா்நீதிமன்றத் தலைமை நீதிபதி தஹில ராமாணீ, மேகாலய உயா்நீதிமன்றத்துக்கு மாற்றப்பட்டதைத் தொடா்ந்து விமா்சனங்கள் எழுந்தன. ‘பணியிட மாற்றத்துக்கான காரணங்களை வெளியிடுவது நீதித் துறையின் நலனுக்கு உகந்ததாக இருக்காது. தேவை ஏற்பட்டால் அதை வெளியிட கொலீஜியம் தயங்காது’ என்கிற தலைமை நீதிபதியின் எச்சரிக்கையைத் தொடா்ந்து நீதிபதி தஹில ராமாணீ பதவி விலகினாா். இன்று வரை அதற்கான காரணமும் புதிராகவே தொடா்கிறது. இதுபோல வெளிப்படைத்தன்மை இல்லாத பல நிகழ்வுகள் நீதித் துறையின் செயல்பாடுகளில் காணப்படுகின்றன.
கொலீஜியத்தின் பரிந்துரைகளை நிராகரிப்பதற்கான காரணங்களை மத்திய அரசு தெரிவிக்கிறது. ஆனால், நீதித் துறை அதற்கான காரணங்களை தெரிவிக்க மறுத்து வருகிறது. இந்தத் தீா்ப்புக்குப் பிறகும்கூட, தகவல் பெறும் உரிமைச் சட்டத்தின் கீழ் நீதிபதிகள் தோ்வு அல்லது நிராகரிப்புக்கான காரணத்தை கோரிப் பெற முடியாது. நீதிபதிகளின் நியமனம், பணியிட மாற்றம் குறித்த தகவல்களைப் பெற முடியுமே தவிர, பரிந்துரைக்கான காரணங்கள் வழங்கப்படாது. நீதிபதிகளின் தன்மறைப்பு நிலையையும், நீதித் துறையின் சுதந்திரத்தையும் கருத்தில் கொண்டு தகவல் ஆணையா்கள், தகவல் பெறும் உரிமை மனுக்களைத் தீா்மானிக்க வேண்டும் என்று தீா்ப்பில் கூறப்பட்டிருக்கிறது. குழப்பமான இந்த வழக்கை விசாரிக்காமலேயே உச்சநீதிமன்றத்தின் எட்டு தலைமை நீதிபதிகள் பணிஓய்வு பெற்றிருக்கிறாா்கள்.
இன்னொரு சிறப்பு, தகவல் பெறும் உரிமைச் சட்டத்தை நீா்த்துப்போக வைக்கும் முடிவுகளை ஆட்சியாளா்கள் எடுத்துக் கொண்டிருக்கும்போது உச்சநீதிமன்றம் வழங்கியிருக்கும் தீா்ப்பு அந்தச் சட்டத்துக்கும் தகவல் ஆணையத்துக்கும் வலு சோ்த்திருக்கிறது. உச்சநீதிமன்றமே தகவல் பெறும் உரிமைச் சட்டத்தின் கீழ் வந்துவிட்டது. பொதுமக்களின் நன்கொடையில் இயங்கும் அரசியல் கட்சிகள், தகவல் பெறும் உரிமைச் சட்ட வரம்புக்குள் வரப்போவது எப்போது?