பதாஞ்சலி நூடூல்ஸ்- மேகிக்கு போட்டியாக பாபா ராம்தேவ் அறிமுகம்

நெஸ்லே நிறுவனத்தின் மேகி நூடூல்ஸ்  தடை செய்யப்பட்டு மறுபடியும் விற்பனைக்கு வந்துள்ள நிலையில் யோகா குரு பாபா ராம்தேவால் அறிமுகப்படுத்தப்பட்டுள்ள பதாஞ்சலி நுடூல்ஸ் இன்று முதல் விற்பனைக்கு வந்துள்ளது.

முழு கோதுமை மாவால் தயாரிக்கப்பட்டுள்ள, இந்த நூடூல்ஸ் 70 கிராம் பாக்கெட் ரூ. 15க்கு விற்பனை செய்யப்படுகிறது. இந்தியா முழுவதும் உள்ள பிக் பசார், நீலகிரி பல்பொருள் அங்காடிகள் மூலம் பதாஞ்சலி நூடூல்ஸ் விற்பனை செய்யப்படும்.

நூடூல்ஸ் அறிமுக விழாவுக்கு பின் செய்தியாளர்களிடம் பேசிய பாபா ராம் தேவ், நூடூல்ஸ் விற்பனையில் கிடைக்கும் லாபம் கல்வியில் பின்தங்கியுள்ள குழந்தைகளின் மேம்பாட்டுக்காக செலவிடப்படும் என்றார்.

இந்தியர்களுக்காக இந்தியாவிலே தயாரிக்கப்படும் சத்தான உணவு என்ற நோக்கத்தின் அடிப்படையில் இந்த நூடூல்ஸ் அறிமுகப்படுத்தப்பட்டுள்ளது என்றார் ராம்தேவ்.

அடுத்த ஆண்டுக்குள் இந்தியா முழுவதும் ஆறு உற்பத்தி நிலையங்கள் தொடங்கப்படும். தலைநகர் தில்லியில் தொடங்கப்படும் உற்பத்தி நிலையம் மூலம் 100 முதல் 200 டன் நூடூல்ஸ் உற்பத்தி செய்யப்படும் என்றார்.

பன்னாட்டு நிறுவனங்களுக்குப் போட்டியாக தொடங்கப்பட்டுள்ள பதஞ்சலி நிறுவனம் மூலம் பழச்சாறுகள், ஆரோக்கிய பானங்கள் மற்றும் அழகு சாதனப் பொருள்கள் இந்தியாவிலேயே தயாரிக்கப்பட்டு விற்பனை செய்யப்பட்டு வருகின்றன.