லூயிஸ் பெர்கர் வழக்கு: கோவா முன்னாள் அமைச்சரின் ஜாமீன் மனு தள்ளுபடி

அமெரிக்காவின் லூயிஸ் பெர்கர் நிறுவனத்திடம் இருந்து லஞ்சம் வாங்கியதாக தொடுக்கப்பட்ட வழக்கில் கைது செய்யப்பட்டுள்ள கோவா முன்னாள் அமைச்சர் சர்ச்சில் அலெமோவின் ஜாமீன் மனுவை மும்பை உயர் நீதிமன்றம் திங்கள்கிழமை தள்ளுபடி செய்தது.
 இதுதொடர்பாக மும்பை உயர் நீதிமன்றத்தில் அலெமோ தாக்கல் செய்த மனுவில், "இதே விவகாரம் தொடர்பாக கோவா முன்னாள் முதல்வர் திகம்பர் காமத் மீதும் குற்றப்பிரிவு போலீஸார் வழக்குப்பதிவு செய்துள்ளனர்; அவருக்கு கீழமை நீதிமன்றம் முன்ஜாமீன் அளித்துள்ளது. ஆதலால் எனக்கும் ஜாமீன் வழங்க வேண்டும்' என்று குறிப்பிட்டிருந்தார்.
 இந்த மனு, மும்பை உயர் நீதிமன்றத்தில் நீதிபதி கே.எல். வதானே முன்னிலையில் திங்கள்கிழமை விசாரணைக்கு வந்தது. அப்போது, அலெமோ ஜாமீன் கோரி தாக்கல் செய்த மனுவை நீதிபதி தள்ளுபடி செய்து உத்தரவிட்டார்.