ஒடிஸாவில் ரூ.6 ஆயிரத்துக்கு குழந்தை விற்பனை: விசாரணைக்கு உத்தரவு

ஜாஜ்பூர் (ஒடிஸா): ஒடிஸா மாநிலத்தில் புதிதாகப் பிறந்த பச்சிளம் குழந்தையை ரூ.6,000-க்கு அதன் பெற்றோர் விற்றதாக ஊடகங்களில் செய்திகள் வெளியானதையடுத்து, மாவட்ட நிர்வாகம் விசாரணைக்கு உத்தரவிட்டுள்ளது.
ஒடிஸா மாநிலம், பிஞ்சார்பூர் மாவட்டத்தில் உள்ள ரண்பூர் கிராமத்தைச் சேர்ந்த வைகுண்ட ராணா(35) என்பவரின் மனைவி லதா ராணா (28). இவர் அங்குள்ள சுகாதார மையத்தில் கடந்த ஞாயிற்றுக்கிழமை பெண் குழந்தையைப் பெற்றெடுத்தார். ராணா தம்பதிக்கு ஏற்கெனவே, 2 மகள்களும் ஒரு மகனும் உள்ளனர்.
இந்நிலையில், நான்கு குழந்தைகள் உள்பட 6 பேருடன் குடும்பத்தைக் கவனிப்பது சிரமம் என ராணா தம்பதி கருதினர். புதிதாகப் பிறந்த குழந்தை நன்றாக வளர வேண்டும் என்று கருதிய அவர்கள், அந்தக் குழந்தையை, குழந்தையில்லா தம்பதிக்கு தத்துக் கொடுத்தனர்.
இதனிடையே, அந்தக் குழந்தையை ரூ.6,000 விலைக்கு ராணா தம்பதி விற்பனை செய்து விட்டதாக உள்ளூர் ஊடகங்களில் செய்திகள் வெளியாகின. ஆனால், பணத்துக்காக குழந்தையை விற்கவில்லை என்று ராணா தம்பதி மறுத்துள்ளனர்.
எனினும், இந்தச் சம்பவம் தொடர்பாக விசாரணை நடத்துமாறு மாவட்ட குழந்தைகள் நலக் குழுவுக்கு மாவட்ட ஆட்சியர் சரத் குமார் பிஸ்வால் உத்தரவிட்டார்.