சென்னை உயர் நீதிமன்ற தலைமை நீதிபதியாக விஜயா கே. தஹில்ரமாணி நியமனம்

சென்னை உயர் நீதிமன்ற தலைமை நீதிபதியாக மும்பை உயர் நீதிமன்ற நீதிபதி விஜயா கே தஹில்ரமாணி நியமனம் செய்யப்பட்டுள்ளார்.
சென்னை உயர் நீதிமன்ற தலைமை நீதிபதியாக இருந்த இந்திரா பானர்ஜி, உச்ச நீதிமன்ற நீதிபதியாக நியமிக்கப்பட்டுள்ளார். இதையடுத்து, அந்த பணியிடம் காலியானது.
இதைத் தொடர்ந்து, மும்பை உயர் நீதிமன்ற நீதிபதி விஜயா கே தஹில்ரமாணிக்கு, சென்னை உயர் நீதிமன்ற தலைமை நீதிபதியாக பதவி உயர்வு அளிக்கப்பட்டுள்ளது.
இதுகுறித்து மத்திய சட்ட அமைச்சகம் வெளியிட்டுள்ள அறிவிக்கையில் தெரிவிக்கப்பட்டிருப்பதாவது:
மும்பை உயர் நீதிமன்ற நீதிபதி விஜயா கே தஹில்ரமாணிக்கு, சென்னை உயர் நீதிமன்ற தலைமை நீதிபதியாக பதவி உயர்வு அளிக்கப்பட்டுள்ளது.
தில்லி உயர் நீதிமன்ற தலைமை நீதிபதியாக இருந்த கீதா மிட்டல் (பொறுப்பு), ஜம்மு-காஷ்மீர் உயர் நீதிமன்ற தலைமை நீதிபதியாக நியமிக்கப்பட்டுள்ளார். இதன்மூலம், ஜம்மு-காஷ்மீர் உயர் நீதிமன்ற தலைமை நீதிபதியாக நியமிக்கப்பட்டுள்ள முதல் பெண் நீதிபதி என்னும் பெருமையை அவர் பெறுகிறார்.
தில்லி உயர் நீதிமன்ற தலைமை நீதிபதியாக, பாட்னா உயர் நீதிமன்ற தலைமை நீதிபதி ராஜேந்திர மேனன் நியமிக்கப்பட்டுள்ளார்.
ராஜஸ்தான் உயர் நீதிமன்ற நீதிபதி கல்பேஷ் சத்யேந்திர ஜாவேரிக்கு, ஒடிஸா உயர் நீதிமன்ற தலைமை நீதிபதியாக பதவி உயர்வு அளிக்கப்பட்டுள்ளது. கொல்கத்தா உயர் நீதிமன்ற நீதிபதி அனிருத்தா போஸ், ஜார்க்கண்ட் உயர் நீதிமன்ற தலைமை நீதிபதியாக பதவி உயர்வு அளிக்கப்பட்டுள்ளது.
குஜராத் உயர் நீதிமன்ற நீதிபதி எம்.கே. ஷாவுக்கு, பாட்னா உயர் நீதிமன்ற தலைமை நீதிபதியாக பதவி உயர்வு வழங்கப்பட்டுள்ளது.
கேரள உயர் நீதிமன்ற நீதிபதி ரிஷிகேஷ் ராய்க்கு, அந்த உயர் நீதிமன்ற தலைமை நீதிபதியாக பதவி உயர்வு வழங்கப்பட்டிருக்கிறது என்று அந்த அறிவிக்கையில் மத்திய சட்ட அமைச்சகம் குறிப்பிட்டுள்ளது.