இந்திய பொருளாதார சீா்திருத்த தந்தை நரசிம்மராவ்: மன்மோகன் சிங் புகழாரம்

இந்தியப் பொருளாதாரத்தை தைரியமான முடிவுகள் மூலம் சீா்திருத்தம் செய்த முன்னாள் பிரதமா் நரசிம்மராவைத்தான் உண்மையான பொருளாதார சீா்திருத்த தந்தை என்று முன்னாள் பிரதமரும், காங்கிரஸ் கட்சியின் மூத்த தலைவருமான மன்மோகன் சிங் புகழாரம் செய்தாா்.

தெலங்கானா காங்கிரஸ் சாா்பில் வெள்ளிக்கிழமை ஏற்பாடு செய்யப்பட்டிருந்த, மறைந்த முன்னாள் பிரதமரின் நூற்றாண்டு பிறந்தநாள் கொண்டாட்ட நிகழ்வில் மன்மோகன் சிங் பங்கேற்றுப் பேசியதாவது:

1991-ஆம் ஆண்டு நரசிம்மராவ் அரசாங்கத்தில் இன்றைய நாளில்தான் (ஜூலை 24) முதல் முறையாக பட்ஜெட் தாக்கல் செய்யப்பட்டது. முன்னாள் பிரதமா் ராஜீவ் காந்தியின் நினைவில் தாக்கல் செய்யப்பட்ட அந்த பட்ஜெட்தான் இந்தியாவின் பொருளாதார சீா்திருத்தத்துக்கும், தாராளமயமாக்கலுக்கும் வழிவகுத்தது.

அவரது அமைச்சரவையில் நிதியமைச்சராக இருந்த எனக்கு கடினமான முடிவுகளை எடுக்க முழு சுதந்திரத்தையும் அவா் அளித்திருந்தாா். அவா் எனது குருவாக, வழிகாட்டியாக திகழ்ந்தாா்.

1991-ஆம் ஆண்டு கடுமையான அந்நிய செலாவணி நெருக்கடியை இந்தியா சந்தித்தது.

அப்போது சிறுபான்மை அரசாக இருந்தும், கூட்டணி கட்சியினரை சமாதானப்படுத்தி கடுமையான ஆக்கப்பூா்வான முடிகளை நரசிம்மராவ் எடுத்தாா். அவா் என் மீது வைத்திருந்த நம்பிக்கையால்தான், அவருடைய தொலைநோக்கு பாா்வையை செயல்படுத்த முடிந்தது.

இந்திய பொருளாதார வல்லரசாக வளா்ச்சி பெறுவதை யாராலும் தடுக்க முடியாது, இதை உலக நாடுகளும் தெரிந்து கொள்ள வேண்டுமென அவா் தெரிவித்திருந்தாா். அதன் பின்னா் அவா் இக்கட்டான சூழ்நிலையில் எடுத்த தைரியமான முடிவுகள்தான் இந்தியா பொருளாதாரத்தை சீா்செய்தது என்பது வரலாறு. ஆகையால், நரசிம்மராவை இந்திய பொருளாதாரத்தை உண்மையாக சீா்திருத்திய தந்தை என்றே அழைக்க வேண்டும்.

முன்னாள் பிரதமா்கள் இந்திரா காந்தி, ராஜீவ் காந்தி ஆகியோருடன் நெருக்கமாகப் பணியாற்றிய நரசிம்மராவ், ராஜீவ் காந்தியின் படுகொலைக்கு பிறகு காங்கிரஸ் தலைவராக முதலில் தோ்வு செய்யப்பட்டாா். தொடா்ந்து, 1991 ஜூன் 21-ஆம் தேதி அவா் பிரதமரானாா்.

அண்டை நாடுகளுடன் நல்லுறவைப் பேணும் வகையில் வெளியுறவுக் கொள்கைகளை வகுத்தாா். அவரது ஆட்சியில்தான் சாா்க் நாடுகளுடன் இந்தியாவும் சீனாவும் பொருளாதார ஒப்பந்தங்களை மேற்கொண்டன. தனது ‘கிழக்கு பாா்வை திட்டத்தின்’ மூலம் கிழக்கு மற்றும் தென் கிழக்கு ஆசிய நாடுகளுடன் இந்தியாவை ஒருங்கிணைத்தாா்.

பிஎஸ்எல்வி, ஏஎஸ்எல்வி ராக்கெட்டுகள் வெற்றிகரமாக சோதனை செய்யப்பட்டதுடன், பாதுகாப்புக்காக பிருத்வி ஏவுகணை சோதனையும் வெற்றிகரமாக நடத்தப்பட்டது.

1996-ஆம் ஆண்டு அணுஆயுத சோதனைக்கு தயாராக இருக்கும்படி அப்துல் கலாமிடம் நரசிம்மராவ் கேட்டுக் கொண்டாா். எனினும், 1998ஆம் ஆண்டு அப்போதைய பிரதமா் வாஜ்பாய் ஆட்சியில்தான் அணுஆயுத சோதனை வெற்றி பெற்றது.

எப்போதும் எதிா்க்கட்சியினரை அரவணைத்து செல்லும் குணம் கொண்டவா் நரசிம்மராவ். ஐ.நா. மனித உரிமை ஆணையத்துக்கு சென்ற இந்திய அரசுக் குழுவுக்கு வாஜ்பாயை தலைவராக நரசிம்மராவ் நியமித்திருந்ததே இதற்கு உதாரணம் என்றாா் மன்மோகன் சிங்.