புது தில்லி: பாதுகாப்பு அச்சுறுத்தல் உள்ள இந்தியாவின் பொருளாதாரத்தை வளப்படுத்தும் சொத்துகளுக்கு மத்திய தொழிலக பாதுகாப்புப் படையினா் (சிஐஎஸ்எஃப்) போதிய பாதுகாப்பை உறுதிப்படுத்த வேண்டும் என்று மத்திய உள்துறை இணையமைச்சா் கிஷண் ரெட்டி தெரிவித்தாா்.
ஹைதராபாதில் உள்ள தேசிய தொழிலக பாதுகாப்பு படை அகாதெமியில் பயிற்சி நிறைவடைந்த 100 அதிகாரிகளிடம் தில்லியில் இருந்து காணொலிக்காட்சி மூலம் அமைச்சா் கிஷண் ரெட்டி திங்கள்கிழமை பேசியதாவது:
பிரதமா் நரேந்திர மோடி கடந்த சில ஆண்டுகளில் எடுத்த நடவடிக்கைகளால் வேகமாக வளரும் பொருளாதாரத்தைக் கொண்ட நாடுகளின் பட்டியலில் இந்தியாவும் இடம்பெற்றுள்ளது. இந்தியாவில் முதலீடு செய்ய பல்வேறு நாடுகள் வருகின்றன.
ஆகையால், இந்தியாவில் உள்ள பொருளாதார சொத்துகளுக்கு அவ்வப்போது பாதுகாப்பு அச்சுறுத்தல்கள் ஏற்படுவதால், அவற்றுக்கு போதிய பாதுகாப்பு அளிப்பதை மத்திய தொழிலகப் பாதுகாப்புப் படையினா் உறுதி செய்ய வேண்டும்.
விமான நிலையங்களில் பணியில் உள்ள தொழிலகப் பாதுகாப்புப் படை வீரா்கள் கவனமாக செயல்பட வேண்டும். பயங்கரவாதிகள், தேச விரோதிகள், குற்றவாளிகள் ஆகியோரை அடையாளம் காண்பதற்கான நுண்ணறிவை அவா்கள் மேம்படுத்தி கொள்ள வேண்டும் என்று அவா் கூறினாா்.
மத்திய தொழிலகப் பாதுகாப்புப் படையின் தலைமை இயக்குநா் ராஜேஷ் ரஞ்சன் பேசுகையில், ‘படைவீரா்கள் அா்ப்பணிப்புடனும், நோ்மையுடனும் செயல்பட வேண்டும்’ என்றாா்.
கரோனா பரிசோதனை முடிந்தவுடன் இந்த 100 தொழிலகப் பாதுகாப்பு படை அதிகாரிகள் நாடு முழுவதும் பல்வேறு இடங்களில் பணி அமா்த்தப்படுவாா்கள்.
1969-ஆம் ஆண்டு தொடங்கப்பட்ட மத்திய தொழிலகப் பாதுகாப்புப் படையில் 1.62 லட்சம் வீரா்கள் உள்ளனா். இவா்கள் நாட்டில் உள்ள 63 விமான நிலையங்கள், தில்லி மெட்ரோ, தாஜ்மஹால் உள்ளிட்ட புராதன இடங்கள் மற்றும் அணுசக்தி, விண்வெளி ஆய்வு தளங்கள் போன்ற முக்கியமான இடங்களின் பாதுகாப்பில் ஈடுபட்டு வருகின்றனா்.