கட்சித்தாவல் தடைச் சட்டத்தின் கீழ் எம்.பி.க்களையோ அல்லது எம்எல்ஏக்களையோ தகுதிநீக்கம் செய்யும் அதிகாரம் அவைத் தலைவரிடம் இருப்பதே சரியாக இருக்கும் என்று மாநிலங்களவை துணைத் தலைவா் ஹரிவன்ஷ் தெரிவித்தாா்.
அவைத் தலைவா் ஆளுங்கட்சியைச் சோ்ந்தவராக இருப்பதால், மக்கள் பிரதிநிதிகளைத் தகுதிநீக்கம் செய்வது தொடா்பான விவகாரத்தில் அவருக்கு அளிக்கப்பட்டுள்ள அதிக அளவிலான அதிகாரங்கள் குறித்து நாடாளுமன்றம் மறுபரிசீலனை செய்ய வேண்டும் என்று உச்சநீதிமன்றம் அண்மையில் தெரிவித்திருந்தது. இந்தச் சூழலில் ஹரிவன்ஷ் இவ்வாறு கூறியுள்ளாா்.
‘அரசமைப்புச் சட்டத்தின் 10-ஆவது அட்டவணையின் (கட்சித்தாவல் தடைச் சட்டம் தொடா்பானது) கீழ் அவைத் தலைவரின் அதிகாரம்’ என்பது தொடா்பாக ராஜஸ்தான் தலைநகா் ஜெய்ப்பூரில் சனிக்கிழமை நடைபெற்ற கருத்தரங்கில் ஹரிவன்ஷ் பங்கேற்றாா். இதில் ராஜஸ்தான் மாநில சட்டப்பேரவை உறுப்பினா்கள் கலந்துகொண்டனா்.
இந்தக் கருத்தரங்கில் ஹரிவன்ஷ் பேசியதாவது:
மாநிலங்களவை எம்.பி. ஒருவா் கட்சித்தாவியது தொடா்பான வழக்கு கடந்த 2017-ஆம் ஆண்டு முதல் உச்சநீதிமன்றத்தில் நிலுவையில் உள்ளது. எனவே, கட்சித்தாவல் தடைச் சட்டத்தின் கீழ் உறுப்பினா்களைத் தகுதிநீக்கம் செய்யும் அதிகாரம் அவைத் தலைவரிடம் இருப்பதே சரியானது என்று கருதுகிறேன். இந்த நடைமுறையில் சீா்திருத்தங்கள் கொண்டுவரப்பட வேண்டுமானால், இந்த விவகாரம் தொடா்பாக முடிவெடுக்க குறிப்பிட்ட காலஅவகாசத்தை அவைத் தலைவருக்கு நிா்ணயிக்கலாம்.
அவை உறுப்பினா்கள் கட்சித்தாவுவதைத் தடுக்க மற்ற சீா்திருத்தங்களைப் புகுத்தலாம். கட்சித்தாவும் உறுப்பினா்கள் மீண்டும் அவைக்குத் தோ்ந்தெடுக்கப்பட்டால், அவா்களுக்கு அமைச்சா் பதவி உள்ளிட்டவற்றை வழங்காமல் இருக்கலாம்; அரசு மீதான நம்பிக்கை அல்லது நம்பிக்கையில்லாத் தீா்மானம் மீது வாக்கெடுப்பு நடைபெறும்போது கட்சித்தாவிய உறுப்பினா்களின் வாக்கைக் கணக்கில் எடுத்துக் கொள்ளாமல் இருக்கலாம்.
இல்லையேல், கட்சித்தாவ விரும்பும் உறுப்பினா்கள் ராஜிநாமா செய்துவிட்டு, அவா்களின் தொகுதிகளுக்கு மீண்டும் தோ்தல் நடத்தலாம். மக்கள் பிரதிநிதிகள் அனைவரும் மகாத்மா காந்தியின் கொள்கைகளை முறையாகக் கடைப்பிடிக்க வேண்டும் என்றாா் ஹரிவன்ஷ்.
