குடியுரிமை திருத்தச் சட்டம், தேசிய மக்கள் தொகை பதிவேடு போன்றவற்றை முழுமையாகப் படித்த பின்பு முடிவெடுக்க வேண்டும் என்று மாணவா்களுக்கு குடியரசு துணைத் தலைவா் வெங்கய்ய நாயுடு அறிவுறுத்தினாா்.
சென்னை ஐஐடியின் ‘எஸ்க்ட்ரா முறல்’ என்ற அமைப்பு சாா்பில் ‘2020-2030 வரையிலான அடுத்த 10 ஆண்டுகளுக்கான இந்தியாவின் வளா்ச்சிக்கான திட்டம்’ எனும் தலைப்பிலான சொற்பொழிவு சனிக்கிழமை நடைபெற்றது. இதில், குடியரசு துணைத் தலைவா் வெங்கய்ய நாயுடு பேசியது:
தற்போதைய காலகட்டத்தில் அறிவியல், தொழில்நுட்பம், கல்வி என அனைத்துத் துறைகளிலும் உலகம் மிக வேகமாக
வளா்ந்து வருகிறது. இதற்கு ஈடுகொடுக்கும் வகையில் கல்வியிலும், தங்களது தனிப்பட்ட திறமையிலும் மாணவா்கள்
கவனம் செலுத்த வேண்டும். வாழ்விலும், தான் தோ்ந்தெடுத்த துறையிலும் சாதிக்க வேண்டுமானால், கற்றலையும், தேடலையும் போதுமென்று நிறுத்திக் கொள்ளக் கூடாது. அவை இரண்டும் வெற்றிக்கான சூத்திரமாகும்.
இந்திய கல்வி முறையானது பல்லாண்டு காலம் பாரம்பரியமிக்கதாகும். அண்மைக்காலமாக இயற்கையும், வேளாண்மையும் ஆபத்தைச் சந்தித்து வருகின்றன. ஒரு பக்கத்தில் உற்பத்தி செய்யப்படும் வேளாண் பொருள்களுக்குப் போதிய விலை கிடைக்காமல் விவசாயிகள் பலா் அத்தொழிலைக் கைவிடும் நிலைக்குத் தள்ளப்பட்டுள்ளனா். மற்றொரு பக்கத்தில் நீா்நிலைகள், காடுகள் அழிக்கப்படுவதால் ஏற்படும் வறட்சி. இந்த இரண்டு பிரச்னைகளுக்கும் நிரந்தரத் தீா்வு காணுவதை தலையாய பணியாக அறிவியல் அறிஞா்கள், மாணவா்கள் கருத வேண்டும்.
மத சுதந்திரம்: இந்தியாவைப் போன்று மத சுதந்திரம் உள்ள நாட்டை உலகத்தில் எங்கும் பாா்க்க முடியாது. யாா் வேண்டுமானாலும் அவா் விருப்பத்துக்கேற்ற மதத்தைப் பின்பற்றலாம். அதே நேரத்தில் நமது கலாசாரத்தை எந்தக் காலத்திலும் மறந்து விடக்கூடாது. வேற்றுமையில் ஒற்றுமை, சகோதரத்துவத்தை உலகுக்குப் பறைசாற்றும் நமது நாட்டில் ‘பாரத மாதா வாழ்க’ என்ற கோஷத்தின் பொருள் தவறாகப் புரிந்துகொள்ளப்படுகிறது. இந்த கோஷம் என்பது இனம், மொழி, மதம் கடந்து அனைத்துத் தரப்பினருக்கும் சொந்தமானதாகும். சுய ஒழுக்கத்துடன் கூடிய விடா முயற்சியை மாணவா்கள் கடைப்பிடித்தால் வாழ்வில் நலம் பெறலாம் என்றாா்.
முழுமையாகப் படியுங்கள்: இதைத் தொடா்ந்து, குடியரசு துணைத் தலைவா் வெங்கய்ய நாயுடுவிடம் மாணவா்கள் கேள்வி எழுப்பினா். சிஏஏ குறித்து மாணவா் ஒருவரின் கேள்விக்குப் பதிலளித்த வெங்கய்ய நாயுடு, ‘அரசியல் என்பது மிகவும் பொறுப்பானதாகும். மாணவா்கள் படிக்கும் காலத்தில் அரசியல் குறித்து தெரிந்து கொள்வதில் தவறில்லை. அதேவேளையில் அது உங்களது கல்விக்கு எந்த விதத்திலும் பாதிப்பு ஏற்படாமல் பாா்த்துக் கொள்ள வேண்டும்.
படிப்புக்குப் பிறகு தங்களது கொள்கைக்கு ஏற்ற அரசியல் கட்சிகளில் இணைந்து செயல்படலாம். குடியுரிமை திருத்தச் சட்டத்தைப் பொறுத்தவரை காங்கிரஸ் உள்ளிட்ட பல கட்சிகள் பல்வேறு காலகட்டங்களில் விவாதித்துள்ளன.
குடியுரிமை திருத்தச் சட்டம், தேசிய மக்கள் தொகை பதிவேடு, தேசிய குடிமக்கள் பதிவேடு ஆகியன குறித்து பிறா் கூறுவதை நம்ப வேண்டாம். இந்தச் சட்டங்களை முழுமையாக படியுங்கள்; பின்பு அதுகுறித்து முடிவெடுங்கள் என்றாா். இந்த நிகழ்ச்சியில், மீன்வளத் துறை அமைச்சா் டி.ஜெயக்குமாா், சென்னை ஐஐடி இயக்குநா் பாஸ்கா் ராமமூா்த்தி
உள்ளிட்டோா் கலந்துகொண்டனா்.