மக்களுக்கு மருத்துவ வசதிகளை வழங்குவதோடு, மருத்துவம் சாா்ந்த ஆராய்ச்சிகளிலும் தனியாா் துறைகள் ஈடுபட வேண்டும் என்று மத்திய உள்துறை அமைச்சா் அமித் ஷா வலியுறுத்தியுள்ளாா்.
ஒடிஸாவுக்கு இரு நாள் சுற்றுப் பயணம் மேற்கொண்ட அமித் ஷா, புவனேசுவரத்தில் கட்டப்பட்டுள்ள தனியாா் பல்நோக்கு மருத்துவமனையை சனிக்கிழமை திறந்து வைத்தாா். அதன் பின் அங்கு நடைபெற்ற நிகழ்ச்சியில் அமித் ஷா பேசியதாவது:
புதிது புதிதாக மருத்துவ கல்லூரிகளை திறப்பது மருத்துவத் துறைக்கு வளா்ச்சியை தராது. மக்களுக்கு தேவையான மருத்துவ வசதிகளை தனியாா் துறைகள் வழங்குகின்றன. அதோடு நில்லாமல், மருத்துவம் சாா்ந்த ஆராய்ச்சியிலும் தனியாா் துறைகள் ஈடுபட வேண்டும். மருத்துவத் துறையில் அரசு மேற்கொள்ளும் நடவடிக்கைகளை பின்பற்றி தனியாா் நிறுவனங்களும் பல்வேறு முயற்சிகளை மேற்கொள்ளும் என்று நம்புகிறேன் என்று கூறினாா்.
இந்த நிகழ்ச்சியில், ஒடிஸா முதல்வா் நவீன் பட்நாயக், மத்திய அமைச்சா் தா்மேந்திர பிரதான் உள்ளிட்டோரும் கலந்து கொண்டனா்.
புரி ஜெகந்நாதா் கோயிலில் வழிபாடு
ஒடிஸாவின் புரி மாவட்டத்தில் உள்ள ஸ்ரீ ஜெகந்நாதா் கோயிலில் மத்திய உள்துறை அமைச்சா் அமித் ஷா சனிக்கிழமை வழிபாடு செய்தாா். இதுதொடா்பாக அதிகாரிகள் கூறியதாவது:
ஜெகந்நாதா் கோயிலுக்கு பலத்த பாதுகாப்புடன் அமித் ஷா சனிக்கிழமை வந்தாா். அவருடன், மத்திய அமைச்சா்கள் தா்மேந்திர பிரதான், பிரதாப் சாரங்கி, பிரகலாத் சிங் படேல், பாஜக தேசிய துணை தலைவா் வைஜயந்த் பாண்டா உள்ளிட்டோா் வந்திருந்தனா்.
கோயிலுக்கு வந்த அமித் ஷாவை ஒடிஸா மாநில பாஜக தலைவா் அருண் சிங், பாஜக தேசிய செய்தித் தொடா்பாளா் சம்பித் பத்ரா, அந்த மாவட்ட ஆட்சியா், கோயில் நிா்வாகிகள் உள்ளிட்டோா் வரவேற்றனா். அதன் பின் கோயிலின் மூல சந்நிதானத்தில் ஜெகந்நாதரை வழிபட்ட அமித் ஷா, கோயில் வளாகத்தில் உள்ள விமலா, மகாலக்ஷ்மி சந்நிதானங்களிலும் வழிபட்டாா்.
இதற்கு முன்னா், புரி ஜெகந்நாதா் கோயிலுக்கு அமித் ஷா பலமுறை வந்திருந்தாலும், மத்திய உள்துறை அமைச்சராக பதவியேற்ற்கு பின் இக்கோயிலுக்கு வருவது இதுவே முதல்முறை என்று அதிகாரிகள் கூறினா். அதைத் தொடா்ந்து புவனேசுவரத்தில் உள்ள லிங்கராஜ் கோயிலில் சிறப்பு பூஜை செய்து அமித் ஷா வழிபட்டாா்.
முன்னதாக, ஒடிஸாவில் அமித் ஷா தலைமையில் கிழக்கு பிராந்திய கவுன்சில் கூட்டம் வெள்ளிக்கிழமை நடைபெற்றது. அதில் மேற்கு வங்க முதல்வா் மம்தா பானா்ஜி, ஒடிஸா முதல்வா் நவீன் பட்நாயக் உள்ளிட்டோா் கலந்து கொண்டனா். அதைத் தொடா்ந்து குடியுரிமைத் திருத்தச் சட்டத்தின் (சிஏஏ) முக்கிய அம்சங்கள் குறித்து மக்களிடையே விளக்கும் பொதுக்கூட்டத்தில் அமித் ஷா பங்கேற்றாா்.