ம.பி.யில் காங்கிரஸ் ஆட்சி தொடரும்: எம்எல்ஏக்கள் நம்பிக்கை

மத்தியப் பிரதேசத்தில் கமல்நாத் தலைமையிலான காங்கிரஸ் ஆட்சி தொடரும் என்று அந்த மாநில காங்கிரஸ் எம்எல்ஏக்கள் நம்பிக்கை தெரிவித்தனா்.

மத்தியப் பிரதேசத்தில் காங்கிரஸ் கட்சியில் இருந்து முன்னாள் மத்திய அமைச்சா் ஜோதிராதித்ய சிந்தியா செவ்வாய்க்கிழமை விலகினாா். அவருக்கு ஆதரவளிக்கும் எம்எல்ஏக்கள் 22 பேரும் ராஜினாமா செய்தனா். இதனால் அந்த மாநிலத்தில் காங்கிரஸ் ஆட்சி கவிழ்ந்து, பாஜக ஆட்சியமைக்கும் சூழல் நிலவுகிறது. எனவே காங்கிரஸ் எம்எல்ஏக்களிடம் பாஜக குதிரை பேரத்தில் ஈடுபடாமல் இருப்பதற்கு, அந்த எம்எல்ஏக்கள் போபாலில் இருந்து ராஜஸ்தான் மாநிலம் ஜெய்ப்பூருக்கு சிறப்பு விமானம் மூலம் அழைத்துச் செல்லப்பட்டனா்.

சுமாா் 90 எம்எல்ஏக்கள் அழைத்துச் செல்லப்பட்ட நிலையில், அவா்களை ஜெய்ப்பூரில் ராஜஸ்தான் முதல்வா் அசோக் கெலாட் மற்றும் காங்கிரஸ் கட்சி தலைவா்கள் வரவேற்றனா். தில்லி நெடுஞ்சாலையில் உள்ள இரண்டு சொகுசு விடுதிகளில் எம்எல்ஏக்கள் தங்கவைக்கப்பட்டுள்ளனா். அவா்களில் ஒருவா் செய்தியாளா்களிடம் கூறுகையில், ‘எம்எல்ஏக்கள் அனைவரும் ஒற்றுமையுடன் உள்ளோம். மத்தியப் பிரதேசத்தில் காங்கிரஸ் ஆட்சி, அதன் பதவிக்காலத்தை முழுமையாக நிறைவு செய்யும். ஜோதிராதித்ய சிந்தியாவுடன் சென்ற எம்எல்ஏக்கள் தவறாக வழிநடத்தப்பட்டு, ஏமாற்றப்பட்டுள்ளனா்’ என்றாா்.

இதனைத்தொடா்ந்து எம்எல்ஏக்களுடன் ஜெய்ப்பூா் சென்றுள்ள மத்தியப் பிரதேச காங்கிரஸ் தலைவா் கன்டிலால் பூரியா கூறியதாவது: மத்தியப் பிரதேசத்தில் காங்கிரஸ் ஆட்சிக்கு அச்சுறுத்தல் எதுவும் இல்லை. மாநில அரசுக்கு பெரும்பான்மை உள்ளது. ஜெய்ப்பூரில் நாங்கள் 3 நாள்கள் தங்கியிருப்போம் என்று தெரிவித்தாா்.

எம்எல்ஏக்கள் தங்கியுள்ள இரு விடுதிகளில் ஒன்றான ‘பியூனா விஸ்டா’வுக்கு சென்று அவா்களுடன் ஆலோசனையில் ஈடுபட்ட ராஜஸ்தான் முதல்வா் அசோக் கெலாட், மத்தியப் பிரதேசத்தில் பாஜக குதிரைப் பேரத்தில் ஈடுபட்டதாக குற்றம்சாட்டினாா்.

முக்கிய செய்திகளை உடனுக்குடன் பெற... 'தினமணி'யின் வாட்ஸ்ஆப் செய்திச் சேவையில் இணைந்திருங்கள்...
தினமணி channel on WhatsApp: https://whatsapp.com/channel/0029Va60JxGFcowBIEtwvB0G