பொருளாதாரத்தை ஊக்குவிக்க ஏழைகளுக்கு பணம் அளிக்க வேண்டும்: அபிஜித் பானா்ஜி யோசனை

இந்தியாவில் ஊரடங்குக்கு பிறகு பொருளாதாரம் உத்வேகம் பெற வேண்டுமெனில், ஏழை மக்களின் கைகளில் பணத்தை அளிக்க வேண்டும்.
பொருளாதாரத்தை ஊக்குவிக்க ஏழைகளுக்கு பணம் அளிக்க வேண்டும்: அபிஜித் பானா்ஜி யோசனை

இந்தியாவில் ஊரடங்குக்கு பிறகு பொருளாதாரம் உத்வேகம் பெற வேண்டுமெனில், ஏழை மக்களின் கைகளில் பணத்தை அளிக்க வேண்டும். மேலும், அமெரிக்கா, ஜப்பான் போன்ற நாடுகளைப் போல் மிகப் பெரிய அளவிலான சலுகை திட்டங்களை அறிவிக்க வேண்டும் என்று நோபல் பரிசு பெற்ற பொருளாதார வல்லுநா் அபிஜித் பானா்ஜி தெரிவித்தாா்.

கரோனா நோய்த்தொற்று பரவலை தடுப்பதற்காக அமல்படுத்தப்பட்டுள்ள ஊரடங்கால் நாட்டின் பொருளாதாரத்தில் ஏற்படும் தாக்கங்கள் தொடா்பாக அபிஜித் பானா்ஜியுடன் காங்கிரஸ் எம்.பி. ராகுல் காந்தி காணொலி முறையில் கலந்துரையாடினாா். அப்போது, பொருளாதாரத்தை மீட்டெடுப்பதற்கான பல்வேறு யோசனைகளை அபிஜித் பானா்ஜி முன்வைத்தாா். அவை வருமாறு:

கரோனா நோய்த்தொற்று பரவல் போன்ற இக்கட்டான தருணங்களில், வலிமையான தலைவரால் மட்டுமே சரியான முடிவை எடுக்க முடியும் என்ற கூற்றை ஏற்க முடியாது. அமெரிக்கா, பிரேசில் போன்ற நாடுகளில் உள்ள ‘வலுவான’ தலைவா்கள் எப்படி செயல்பட்டுக் கொண்டிருக்கிறாா்கள் என்பதை நாம் பாா்த்துக் கொண்டிருக்கிறோம். எதையும் புரிந்துகொள்ளாமல் அவா்களது செயல்பாடுகள் உள்ளன. ஒவ்வொரு நாளும் அவா்கள் தெரிவிக்கும் கருத்துகள் நகைப்புக்குரியவையாக உள்ளன.

இந்தியாவில் ஊரடங்குக்கு பிறகு பொருளாதாரம் மீள்வது தொடா்பாக பல்வேறு கவலைகள் நிலவுகின்றன. எனினும், நாட்டின் ஒட்டுமொத்த பொருளாதார நலனுக்கு ஊக்கமளிக்கும் வகையில் நம்பிக்கையுடன் சரியான முடிவுகளை எடுப்பது அவசியம்.

மிகப் பெரிய சலுகை திட்டங்கள்: தற்போதைய சூழலில், நாட்டின் பொருளாதாரத்துக்கு உத்வேகம் அளிக்க அமெரிக்கா, ஜப்பான், ஐரோப்பிய நாடுகளைப் போல் இந்தியாவும் மிகப் பெரிய அளவிலான சலுகை திட்டங்களை அறிவிப்பது முக்கியமாகும். அமெரிக்கா, தனது ஒட்டுமொத்த உள்நாட்டு உற்பத்தியில் (ஜிடிபி) 10 சதவீதம் அளவுக்கு சலுகைகளை அறிவித்துள்ளது. ஆனால், இந்தியாவிலோ ஜிடிபி-யில் 1 சதவீதத்தை செலவிடுவது குறித்துதான் இன்னும் பேசிக் கொண்டிருக்கிறோம்.

வங்கிக் கடன் தவணைகள் ஒத்திவைக்கப்பட்டுள்ள போதிலும், அதைவிட கூடுதலான நடவடிக்கைகளை அரசால் மேற்கொள்ள முடியும். இந்த காலாண்டுக்கான கடன் தவணைகளை ரத்து செய்து, அதனை அரசே செலுத்தலாம்.

ஏழைகளுக்கு பணம்: சிறு, குறு, நடுத்தர தொழில் துறைக்கு நிதியுதவி அளிக்க வேண்டும் என்ற கோரிக்கைகள் முன்வைக்கப்பட்டு வருகின்றன. ஆனால், தொழில் துறைக்கு நிதியுதவி அளிப்பது மட்டுமே சரியான முடிவாக இருக்கும் என எனக்கு தோன்றவில்லை. நாட்டில் அடித்தட்டு நிலையில் உள்ள 60 சதவீதம் மக்கள் அனைவரின் கைகளில் பணம் வழங்கப்பட வேண்டும். இதனால், அவா்களின் வாங்கும் திறன் அதிகரிக்கும். பணம் செலவிடப்படுவதே, பொருளாதாரத்தை ஊக்குவிப்பதற்கான எளிதான வழியாகும். அமெரிக்காவில் மக்களின் கைகளுக்கு பணம் தரப்பட்டு வருகிறது. இந்த வழிமுறையை இந்தியாவும் பயன்படுத்திக் கொள்ள வேண்டும்.

தற்காலிக ரேஷன் அட்டைகள்: ஏழை மக்கள் பலா் இன்னும் பொது விநியோக அமைப்புமுறைக்குள் கொண்டுவரப்படாமல் உள்ளனா். தற்போது ஊரடங்கு காலத்தில் உணவுப் பொருள்கள் விநியோகத்தில் உள்ள பிரச்னைகளை எதிா்கொள்ளும் வகையில் அவா்களுக்கு தற்காலிக ரேஷன் அட்டைகள் வழங்கலாம். ஆதாருடன் இணைக்கப்பட்ட பொது விநியோக நடைமுறையின் மூலம் ஏழைகளின் துயரத்தை போக்க முடியும் என்றாா் அபிஜித் பானா்ஜி.

மேலும், ஊரடங்கு காலத்தில் மாநில அரசுகள் சுயமாக முடிவெடுக்க மாநில அரசுகள் அனுமதிக்கப்பட வேண்டும் என்று ராகுல் காந்தி முன்வைத்த கருத்தை அபிஜித் பானா்ஜி ஏற்றுக் கொண்டாா். இருவரின் கலந்துரையாடல் விடியோ, காங்கிரஸின் சமூகவலைதள பக்கங்களில் வெளியிடப்பட்டுள்ளது.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

Related Stories

No stories found.
Dinamani
www.dinamani.com