புது தில்லி/லக்னௌ: தீபாவளிப் பண்டிகை கொண்டாட்டத்துக்கு உள்நாட்டில் தயாரிக்கப்பட்ட பொருள்களையே மக்கள் வாங்க வேண்டும் என்று பிரதமா் நரேந்திர மோடி வேண்டுகோள் விடுத்துள்ளாா்.
பிரதமா் மோடி தனது சொந்தத் தொகுதியான வாராணசியில் ரூ.614 கோடி மதிப்பிலான திட்டங்களைக் காணொலிக் காட்சி வாயிலாக திங்கள்கிழமை தொடக்கி வைத்தாா். அப்போது அவா் பேசியதாவது:
தீபாவளிப் பண்டிகை கொண்டாட்டத்துக்காக உள்நாட்டில் தயாரிக்கப்பட்ட பொருள்களை வாங்க வேண்டும் என்ற எண்ணம் மக்களிடையே அதிகரித்துள்ளதைப் பாா்க்க முடிகிறது. தீபாவளியை உள்ளூா் பொருள்களுடன் கொண்டாடுவது நாட்டின் பொருளாதார வளா்ச்சியையும் ஊக்குவிக்கும்.
வாராணசி மட்டுமல்லாது நாடு முழுவதும் உள்ள மக்கள் அனைவரும் தீபாவளிக்கு உள்நாட்டில் உற்பத்தி செய்யப்பட்ட பொருள்களையே வாங்க வேண்டும். உள்ளூா் பொருள்களுக்கான ஆதரவை அனைத்து மக்களும் நல்கினால் அப்பொருள்களின் மதிப்பு உயரும்.
தீபாவளிக்கு உள்நாட்டில் தயாரிக்கப்பட்ட பொருள்களை வாங்க வேண்டும் என்பதால், வெறும் அகல்விளக்குகளை மட்டும் வாங்கக் கூடாது. தீபாவளிக்குப் பயன்படுத்தும் அனைத்துப் பொருள்களும் உள்நாட்டில் தயாரிக்கப்பட்டதாக இருக்க வேண்டும். இது உள்நாட்டு உற்பத்தியாளா்களை ஊக்கப்படுத்தும்.
உள்நாட்டுப் பொருள்களை வாங்குவதால், அப்பொருள்களுக்கான அங்கீகாரம் அதிகரிப்பதோடு, அப்பொருள்களை உற்பத்தி செய்வோா் தீபாவளியை சிறப்பாகக் கொண்டாடவும் வழிவகுக்கும்.
விவசாயிகளுக்குப் பெரும் பலன்: மத்திய அரசு அண்மையில் இயற்றிய வேளாண் சட்டங்களானது விவசாயிகளை சந்தைகளுடன் நேரடியாகத் தொடா்புபடுத்தும். இதன் மூலமாக இடைத்தரகா்களின் தொல்லையில் இருந்து விவசாயிகள் தப்ப முடியும். வேளாண் துறையில் மேற்கொள்ளப்பட்டு வரும் சீா்திருத்தங்களால் விவசாயிகள் பெரும் பலனை அடைவா்.
மத்திய அரசு செயல்படுத்தி வரும் ‘ஸ்வமித்வா’ திட்டத்தின் கீழ் விவசாயிகளுக்கு அவா்களுக்குச் சொந்தமான நிலம் தொடா்பான தகவல்கள் அட்டையாக வழங்கப்படும். அதன் மூலமாக விவசாயிகள் வங்கிகளில் கடன் பெற முடியும். மேலும், அத்திட்டத்தின் மூலமாக விவசாயிகளிடமிருந்து நிலத்தை முறைகேடாகப் பறிக்கும் செயலுக்கும் முற்றுப்புள்ளி வைக்கப்பட்டுள்ளது.
முதல்வருக்குப் பாராட்டு: வாராணசி நகரில் பல்வேறு வளா்ச்சித் திட்டங்கள் செயல்படுத்தப்பட்டு வருகின்றன. அதன் காரணமாக பல்வேறு விவகாரங்களுக்கு தில்லி சென்று தீா்வு காண வேண்டும் என்ற கட்டாயம் நீங்கியுள்ளது. வாராணசி நகரின் வளா்ச்சிக்காக உத்தர பிரதேச அரசு முக்கியப் பங்காற்றி வருகிறது. அதற்கான பாராட்டுகள் அனைத்தும் மாநில முதல்வா் யோகி ஆதித்யநாத்துக்கும் அவரின் அமைச்சரவை சகாக்களுக்கும் தான் சென்றுசேர வேண்டும்.
கரோனா நோய்த்தொற்றுக்கு எதிரான போராட்டத்தில் வாராணசி மக்கள் ஒற்றுமையுடன் முன்னின்றனா். கரோனா நோய்த்தொற்று பரவல் கட்டுக்குள் வரத் தொடங்கியுள்ளது. இனி வாராணசி நகருக்கு வருகை தரும் சுற்றுலாப் பயணிகளின் எண்ணிக்கை தொடா்ந்து அதிகரிக்கும். அவா்கள் வாராணசியின் அழகைக் கண்டு ஆச்சரியமடைவா் என்றாா் பிரதமா் மோடி.
வாராணசியில் கழிவுநீா் சுத்திகரிப்பு, அடிப்படைக் கட்டமைப்பு வசதிகள் மேம்பாடு, பசுக்கள் பாதுகாப்பு, வீட்டு வசதி உள்ளிட்டவை தொடா்பான திட்டங்களை பிரதமா் மோடி திங்கள்கிழமை தொடக்கி வைத்தாா். மேலும் சில திட்டங்களுக்கான அடிக்கல்லையும் அவா் நாட்டினாா். இந்நிகழ்ச்சியில் உத்தர பிரதேச முதல்வா் யோகி ஆதித்யநாத் உள்ளிட்டோா் கலந்து கொண்டனா்.