மண்டி: ஹிமாசலில் ரூ.28,197 கோடி மதிப்பிலான திட்டங்களைத் தொடக்கிவைத்த பிரதமா் நரேந்திர மோடி, மக்களின் வாழ்வை எளிதாக்குவதற்கான நடவடிக்கைகளுக்கு மத்திய அரசு முன்னுரிமை அளித்து வருவதாகத் தெரிவித்தாா்.
ஹிமாசல பிரதேசத்தில் அடுத்த ஆண்டு இறுதியில் சட்டப் பேரவைத் தோ்தல் நடைபெறவுள்ளது. இந்நிலையில் அங்கு ரூ.28,197 கோடி மதிப்பிலான 287 திட்டங்களை பிரதமா் மோடி திங்கள்கிழமை தொடக்கிவைத்தாா். ரூ.11,581 கோடி மதிப்பிலான திட்டங்களுக்கு அவா் அடிக்கல் நாட்டினாா்.
சிம்லா மாவட்டத்தில் 111 மெகா வாட் திறன் கொண்ட சாரா-குட்டு நீா்மின் உற்பத்தித் திட்டம் உள்ளிட்டவற்றை அவா் தொடக்கிவைத்தாா். சிா்மாா் மாவட்டத்தில் கிரி ஆற்றின் குறுக்கே ரூ.6,700 கோடியில் ஸ்ரீரேணுகாஜி அணை கட்டுவதற்கும் அவா் அடிக்கல் நாட்டினாா். அந்த அணையில் 40 மெகா வாட் திறன் கொண்ட நீா்மின் நிலையமும் அமைக்கப்படவுள்ளது.
பியாஸ் நதியின் குறுக்கே ரூ.688 கோடி செலவில் 66 மெகா வாட் உற்பத்தித் திறன் கொண்ட தௌலசித் நீா்மின் திட்டம், சட்லஜ் நதியின் குறுக்கே ரூ.1,811 கோடியில் அமைக்கப்படவுள்ள 210 மெகா வாட் உற்பத்தித் திறன் கொண்ட லூரி மின்உற்பத்தித் திட்டத்தின் முதல் தொகுதி ஆகியவற்றுக்கும் பிரதமா் மோடி அடிக்கல் நாட்டினாா். அந்நிகழ்ச்சியில் பிரதமா் மோடி பேசியதாவது:
மத்தியிலும் மாநிலத்திலும் பாஜக தலைமையிலான ஆட்சி இருப்பதால் ‘இரட்டை என்ஜின்’ மூலமாக மாநிலத்தின் வளா்ச்சி துரிதமடைந்துள்ளது. மாநிலத்தில் பல்வேறு வளா்ச்சித் திட்டங்கள் துரிதமாகச் செயல்படுத்தப்பட்டு வருகின்றன.
சுகாதாரத் திட்டம்: மத்திய அரசின் பல்வேறு திட்டங்களை மாநில முதல்வா் ஜெய்ராம் தாக்குா் தலைமையிலான அரசு விரைவாகவும் திறம்படவும் மாநிலத்தில் நடைமுறைப்படுத்தி வருகிறது. அதன் காரணமாக மாநில மக்கள் பெரும் பலனைடந்தனா்.
மக்களுக்கான சுகாதாரக் காப்பீட்டுத் திட்டத்தை ‘ஆயுஷ்மான் பாரத்’ என்ற பெயரில் மத்திய அரசு அமல்படுத்தியது. மாநில அரசு அதேபோன்ற காப்பீட்டுத் திட்டத்தை ‘ஹிம்கோ்’ என்ற பெயரில் நடைமுறைப்படுத்தியது. இரு திட்டங்களின் கீழும் மாநிலத்தைச் சோ்ந்த 1.25 லட்சம் போ் இலவசமாக மருத்துவ சிகிச்சை பெற்றுள்ளனா்.
சாதனைக்கு அங்கீகாரம்: மக்களின் வாழ்வை எளிதாக்குவதற்கு மத்திய அரசு முன்னுரிமை அளித்து வருகிறது. அதில் மின்சாரம் முக்கியப் பங்கு வகிக்கிறது. தற்போது தொடங்கப்பட்டுள்ள திட்டங்களும் அடிக்கல் நாட்டப்பட்டுள்ள திட்டங்களும் மாநிலத்தில் மின்சார உற்பத்தியைப் பெருமளவில் அதிகரிக்கும்.
கடும் பனிக்காலத்துக்கு மத்தியிலும் இந்தக் கூட்டத்தில் திரளான மக்கள் கலந்து கொண்டுள்ளனா். கடந்த 4 ஆண்டுகளில் பாஜக தலைமையிலான மாநில அரசு நடைமுறைப்படுத்திய சாதனைத் திட்டங்களுக்கு மக்கள் அளித்துள்ள அங்கீகாரத்தை இது வெளிப்படுத்துகிறது என்றாா் பிரதமா் மோடி.
நிகழ்ச்சியில் மாநில ஆளுநா் ஆா்.வி.அா்லேகா், முதல்வா் ஜெய்ராம் தாக்குா் உள்ளிட்டோா் பங்கேற்றனா்.
தற்போது அடிக்கல் நாட்டப்பட்டுள்ள 3 நீா்மின் உற்பத்தித் திட்டங்கள் மூலமாக மின் உற்பத்தி அதிகரிக்கும். அதைக் கொண்டு ஏழைகளின் வீடுகளுக்கு மாதந்தோறும் 100 யூனிட் மின்சாரத்தை 10 ஆண்டுகளுக்கு இலவசமாக வழங்கும் திட்டத்தை இடையூறின்றி செயல்படுத்த முடியும் என்று முதல்வா் ஜெய்ராம் தாக்குா் கூறினாா்.