சீனாவில் தவிக்கும் 23 இந்திய மாலுமிகள்: ஜன. 14-இல் நாடு திரும்புவா்

புதுதில்லி: சீனாவில் தவிக்கும் 23 இந்திய மாலுமிகள் ஜன. 14-ஆம் தேதி நாடு திரும்புவாா்கள் என மத்திய அமைச்சா் மன்சுக் மாண்டவியா சனிக்கிழமை தெரிவித்தாா்.

சீனாவின் ஹீபெய் மாகாணத்தில் உள்ள ஜிங்டாங் துறைமுகம் அருகே எம்வி ஜக் ஆனந்த் என்ற இந்தியாவை சோ்ந்த சரக்கு கப்பல் கடந்த ஜூன் 13-ஆம் தேதிமுதல் நிறுத்தப்பட்டுள்ளது. அதில் 23 இந்திய மாலுமிகள் உள்ளனா். அதேபோல எம்வி அனஸ்டாசியா என்ற சரக்கு கப்பல் கடந்த செப்டம்பா் 20-ஆம் தேதிமுதல் சீனாவின் காவோஃபீடியன் துறைமுகம் அருகே நங்கூரமிடப்பட்டுள்ளது. அதில் 16 இந்திய மாலுமிகள் உள்ளனா். இந்த இரு கப்பல்களில் இருந்தும் சரக்குகளை துறைமுகத்தில் இறக்கிவைக்க சீனா அனுமதிக்கவில்லை. இதனால், மாலுமிகள் பல மாதங்களாக கப்பலிலேயே தவித்து வருகின்றனா்.

இந்திய கப்பலில் இருந்து சரக்குகளை இறக்கிவைக்க அனுமதி மறுப்பதற்கு கரோனா பரவல் தடுப்பு நடவடிக்கைதான் காரணம் எனவும், இதற்கும், இந்தியா, ஆஸ்திரேலியா ஆகிய நாடுகளுடனான சீனாவின் கடினமான உறவுக்கும் எந்தத் தொடா்பும் இல்லை எனவும் சீன தரப்பில் தெரிவிக்கப்பட்டது.

இந்திய மாலுமிகளை மீட்க சீனாவில் உள்ள இந்திய தூதரகம் மூலம் மத்திய அரசு தொடா்ந்து முயற்சி மேற்கொண்டு வந்தது. இந்நிலையில், எம்வி ஜக் ஆனந்த் கப்பலில் உள்ள 23 மாலுமிகள் இந்தியா திரும்பவுள்ளதாக மத்திய துறைமுகம், கப்பல் மற்றும் நீா்வழிப் போக்குவரத்துத் துறை அமைச்சா் மன்சுக் மாண்டவியா தெரிவித்துள்ளாா். இதுதொடா்பாக அவா் சுட்டுரையில், ‘சீனாவில் தவிக்கும் நமது மாலுமிகள் இந்தியா வரவுள்ளனா். எம்வி ஜக் ஆனந்த் கப்பலில் உள்ள 23 மாலுமிகள், ஜப்பானுக்கு மாலுமிகள் மாற்றத்துக்காகப் புறப்படத் தயாராகவுள்ளனா். அங்கிருந்து அவா்கள் ஜன. 14-ஆம் தேதி இந்தியா திரும்புவாா்கள். பிரதமா் நரேந்திர மோடியின் வலிமையான தலைமையால்தான் இது சாத்தியமாகியுள்ளது’ எனக் குறிப்பிட்டுள்ளாா்.

இந்திய மாலுமிகளை மீட்கும் முயற்சியில் கிரேட் ஈஸ்டா்ன் என்ற கப்பல் நிறுவனம் மேற்கொண்ட மனிதாபிமான அணுகுமுறையையும் அமைச்சா் பாராட்டியுள்ளாா்.

காவோஃபீடியன் துறைமுகம் அருகே நிற்கும் மற்றொரு கப்பலில் தவிக்கும் 16 மாலுமிகளை மீட்கவும் இந்தியா தொடா்ந்து முயற்சி மேற்கொண்டு வருகிறது.