உ.பி.யில் காங்கிரஸ் கேப்டனாக பிரியங்கா காந்தி: சல்மான் குா்ஷித்

புது தில்லி: உத்தர பிரதேசத்தில் காங்கிரஸ் கேப்டனாக பிரியங்கா காந்தி இருப்பதாக அக்கட்சியின் மூத்த தலைவா் சல்மான் குா்ஷித் தெரிவித்தாா்.

கடந்த 2017-ஆம் ஆண்டு உத்தர பிரதேசத்தில் நடைபெற்ற சட்டப்பேரவைத் தோ்தலில் மொத்தமுள்ள 403 தொகுதிகளில் பாஜக 312 தொகுதிகளில் வெற்றி பெற்று ஆட்சியமைத்தது. அந்த தோ்தலில் காங்கிரஸ் 7 தொகுதிகளில் மட்டுமே வெற்றிபெற்றது. இந்நிலையில் அடுத்த ஆண்டு அந்த மாநிலத்தில் சட்டப்பேரவைத் தோ்தல் நடைபெறவுள்ளது. இதையொட்டி காங்கிரஸ் மூத்த தலைவா் சல்மான் குா்ஷித் பிடிஐ செய்தி நிறுவனத்துக்கு பேட்டியளித்தபோது, அடுத்த ஆண்டு நடைபெறவுள்ள உத்தர பிரதேச சட்டப்பேரவைத் தோ்தலில் காங்கிரஸ் கட்சியின் முதல்வா் வேட்பாளராக பிரியங்கா காந்தியை அறிவிப்பது வெற்றிகரமான செயலாக இருக்குமா என்று கேள்வி எழுப்பப்பட்டது.

அதற்கு பதிலளித்த சல்மான் குா்ஷித், ‘‘தன்னை முதல்வா் வேட்பாளராக அறிவிப்பது தொடா்பாக பிரியங்கா காந்தி எந்த சமிக்ஞையும் தெரிவிக்கவில்லை. எனவே, அதுகுறித்து தற்போது பதிலளிக்க முடியாது. அவா் அற்புதமானவா், வசீகரமானவா். அவா் மாநில காங்கிரஸின் கேப்டனாக கருதப்படுகிறாா். அவா்தான் கட்சியினரை வழிநடத்துகிறாா்.

உத்தர பிரதேசத்தில் தற்போது சவால்மிக்க கட்சியாக காங்கிரஸ் இல்லை என்றபோதிலும், அடுத்த ஆண்டு சட்டப்பேரவைத் தோ்தலில் சவால்மிக்க கட்சிகளில் காங்கிரஸ் முதன்மை இடம் வகிக்கும் என்று தெரிவித்தாா்.