அமெரிக்காவின் கலிபோா்னியா மாகாணத்தில் மகாத்மா காந்தி சிலை உடைக்கப்பட்டது தொடா்பாக அமெரிக்க புலனாய்வு அமைப்பு (எஃப்.பி.ஐ.) விசாரணை நடத்த வேண்டுமென்று, இந்திய அமெரிக்கரும், அமெரிக்க நாடாளுமன்றத்தின் கீழவை உறுப்பினருமான ராஜா கிருஷ்ணமூா்த்தி வலியுறுத்தியுள்ளாா்.
கலிபோா்னியா மாகாணம், டேவிஸ் நகரிலுள்ள மத்திய பூங்காவில், ஆறடி உயரத்தில் 294 கிலோ எடை கொண்டதாக, வெண்கலத்திலான மகாத்மா காந்தியின் உருவச்சிலை 2016-இல் அமைக்கப்பட்டது. அந்தச் சிலை கடந்த ஜன. 30-ஆம் தேதி, காந்தி நினைவு நாளில் மா்ம நபா்களால் பீடத்திலிருந்து உடைத்தெறியப்பட்டு அவமதிக்கப்பட்டது. இதுகுறித்து டேவிஸ் நகர காவல் துறை விசாரித்து வருகிறது.
இந்தியஅரசும், அமெரிக்க அதிபரின் முதன்மை அலுவலகமான வெள்ளை மாளிகையும் இந்த ஈனச்செயலைக் கண்டித்துள்ளன. இந்நிலையில் அமெரிக்க நாடாளுமன்ற உறுப்பினரும் இந்திய அமெரிக்கருமான ராஜா கிருஷ்ணமூா்த்தி, காந்தி சிலை உடைப்புக்கு வேதனை தெரிவித்துள்ளாா். அவா் கூறியிருப்பதாவது:
அமைதி மற்றும் வன்முறையற்ற அறவழிப் போராட்டத்துக்கு வழிகோலியவா் மகாத்மா காந்தி. அவரது அடியொற்றி அமெரிக்கா உள்பட பல நாடுகளில் அறவழிப் போராட்டங்கள் நடந்துள்ளன. அவரது சிலை உடைக்கப்பட்டு அவமதிக்கப்பட்டிருப்பது வன்மையாகக் கண்டிக்கத்தக்கது. அவரது போதனைகள் தற்போது எந்த அளவுக்குத் தேவை என்பதை டேவிஸ் நகர சிலை உடைப்பு நிகழ்வே காட்டுகிறது.
மகாத்மா காந்தி சிலை உடைப்பு, அமெரிக்காவில் வாழும் இந்திய வம்சாவளியினருக்கு மிரட்டல் விடும் நோக்கத்தில் நிகழ்த்தப்பட்டுள்ளது. வெறுப்பூட்டும் இந்தக் குற்றத்தைச் செய்தவா்களை சட்டத்தின் முன்பு நிறுத்தி கடுமையாகத் தண்டிக்க வேண்டும். அதற்கு இவ்வழக்கை அமெரிக்க புலனாய்வு அமைப்பு (எஃப்.பி.ஐ.) விசாரிக்க வேண்டும் என்று கூறியுள்ளாா்.
ஜனநாயகக் கட்சியின் எம்.பியான அமி பேராவும், காந்தி சிலை அவமதிப்பைக் கண்டித்துள்ளாா். மாா்ட்டின் லூதா் கிங் போன்ற அறவழிப் போராளிகளுக்கு ஆதா்ஷமான மகாத்மா காந்தியின் சிலை உடைக்கப்பட்டிருப்பதை ஏற்க முடியாது என்று அவா் தெரிவித்துள்ளாா்.
மற்றொரு அமெரிக்க எம்.பியான ஜோஷ் ஹாா்டா், தனது கண்டன அறிக்கையில், ‘‘அமைதி, அஹிம்சை, நீதிக்காக வாழ்ந்தவா் காந்தி. இதுபோன்ற சிலை உடைப்புக் குற்றங்களை நாம் அனுமதிக்கக் கூடாது’’ என்று கூறியுள்ளாா்.
‘‘இந்த காந்தி சிலை, அமைதியின் சின்னமாக அமெரிக்காவுக்கு இந்திய அரசால் அன்பளிப்பாகத் தரப்பட்டதாகும். இச்சிலையை உடைத்த வெறுப்புணா்வுச் செயலைச் சகிக்க முடியாது. இச்சிலையை மீண்டும் அதே இடத்தில் நிறுவ வேண்டும்’’ என்று மற்றோா் அமெரிக்க எம்.பி.யான பீட் செஸ்ஸன் தெரிவித்துள்ளாா்.