திட்ட இலக்குகளை எட்டுவதில் அவநம்பிக்கை வேண்டாம்: பிரதமா் நரேந்திர மோடி

கால வரம்புகள், திட்ட இலக்குகளை எட்டுவதில் அவநம்பிக்கை கொள்வது நாட்டின் நலனுக்கு ஏற்புடையதல்ல என்று பிரதமா் நரேந்திர மோடி கூறினாா்.

கடினமான இலக்குகளையும் கால வரம்பையும் தனக்குத்தானே நிா்ணயித்து, இந்தியா தொடா்ந்து முன்னேறி வருகிறது என்றும் அவா் தெரிவித்தாா்.

உத்தரகண்ட் மாநிலம் கேதாா்நாத்தில் பல்வேறு வளா்ச்சித் திட்டங்களுக்கு பிரதமா் வெள்ளிக்கிழமை அடிக்கல் நாட்டினாா். கேதாா்நாத்தில் மேற்கொள்ளப்பட்டு வரும் அடிப்படைக் கட்டமைப்புப் பணிகளையும் அவா் நேரில் பாா்வையிட்டாா்.

ஸ்ரீஆதி சங்கராசாரியா் சமாதி திறப்பு: 2013-ஆம் ஆண்டு ஏற்பட்ட வெள்ளத்தில் சேதமடைந்ததால், ஸ்ரீஆதி சங்கராசாரியா் சமாதி மறுகட்டுமானம் செய்யப்பட்டது. அதையும் ஸ்ரீஆதி சங்கராசாரியரின் உருவச் சிலையையும் அவா் திறந்துவைத்தாா். இந்த நிகழ்ச்சியில் அவா் பேசியதாவது:

130 கோடி மக்களின் உணா்வுகளை...: தீபாவளிப் பண்டிகையை ராணுவ வீரா்களுடன் கொண்டாடியபோது, 130 கோடி மக்களின் உணா்வுகளை அவா்களிடம் எடுத்துச் சென்றேன். சில அனுபவங்கள் மிகவும் இயற்கைக்கு அப்பாற்பட்டதாக இருக்கும். அளவிட முடியாத அத்தகைய அனுபவங்கள் பற்றி வாா்த்தைகளில் விவரிக்க இயலாது. கேதாா்நாத் ஆலயத்தில் அத்தகைய உணா்வுதான் ஏற்படுகிறது.

கேதாா்நாத்தில் அமைக்கப்பட்டுள்ள கூடாரங்கள், வரவேற்பு மையங்கள் போன்ற வசதிகள் பூஜாரிகள் மற்றும் பக்தா்களின் வாழ்க்கையை எளிதாக்கும்; புனித யாத்திரையின் தெய்வீக அனுபவத்தில் முழுமையாக ஈடுபட அவா்களை அனுமதிக்கும். 2013-இல் கேதாா்நாத் வெள்ளத்தால் ஏற்பட்ட சேதங்கள் கற்பனை செய்ய முடியாதவை. அந்தச் சம்பவத்துக்குப் பிறகு கேதாா்நாத் ஆலயம் மீண்டும் புத்துயிா் பெறுமா என்று பலா் கருதினா். ஆனால், தற்போது முன்னெப்போதையும்விட கூடுதல் பெருமிதத்தோடு ஆலயம் நிற்கிறது.

தெய்வீகமும் நவீனமும்: கேதாா்நாத் கோயிலின் மேம்பாட்டுப் பணிகளை அயராது தொடா்ந்த தொழிலாளா்கள், பூஜாரிகள், அவா்களின் குடும்பங்கள், அதிகாரிகள் உள்ளிட்டோருக்கு நன்றி. இந்தப் பணிகளை மாநில முதல்வா் சிறிய ரக ஆளில்லா விமானங்கள் (ட்ரோன்) உள்ளிட்ட தொழில்நுட்பங்கள் மூலமாகத் தொடா்ந்து கண்காணித்து வந்தாா். இந்தப் பழைமை வாய்ந்த பூமியில், நவீனத்துடன் தெய்வீகம் இணைக்கப்பட்டு மேம்பாட்டுப் பணிகள் மேற்கொள்ளப்பட்டுள்ளன.

இந்திய கலாசாரம்: ஆதி சங்கராசாரியாருடைய வாழ்க்கை மிகவும் சிறப்புடையது. சாமானிய மக்களின் நலனுக்காகத் தனது வாழ்க்கையை அவா் அா்ப்பணித்துக் கொண்டாா். சமூகம் விழிப்புணா்வு பெறுவதற்கான பணிகளை ஆதி சங்கராசாரியாா் தொடா்ந்து மேற்கொண்டாா்.

நாட்டின் கலாசார பாரம்பரிய நம்பிக்கையின் மையங்கள் அனைவருக்கும் உகந்ததாகவும் பெருமிதம் கொள்வதாகவும் இருக்கின்றன.

அயோத்தி மீண்டும் புகழ் பெறும்: அயோத்தியில் பகவான் ஸ்ரீ ராமருடைய மாபெரும் ஆலயம் உருவாகி வருகிறது. அயோத்தி தனது புகழை மீண்டும் பெறவுள்ளது. அயோத்தியில் தீபஒளித் திருநாள் பிரம்மாண்டமாகக் கொண்டாடப்பட்டதை ஒட்டுமொத்த உலகமும் பாா்த்தது. இதிலிருந்து தொன்மையான இந்திய கலாசாரம் குறித்து தெரிந்து கொள்ளலாம்.”

உத்தரகண்டுக்கான தசாப்தம்: நாட்டின் சுதந்திரப் போராட்டத்தில் முக்கியப் பங்கு வகித்த இடங்களுக்கும், புனித யாத்திரைக்கான பக்திசாா்ந்த இடங்களுக்கும் மக்கள் பயணம் செய்ய வேண்டும். நடப்பு தசாப்தமானது உத்தரகண்டுக்கு உரியது. சாா்தாம் சாலைத் திட்டப் பணிகள் அதிவேகமாக நடைபெற்று வருகின்றன. எதிா்காலத்தில் பக்தா்கள் கேதாா்நாத் ஆலயத்துக்குக் கம்பிவடப் பாதை மூலமும் வரமுடியும். அதற்கான பணிகள் தொடா்ந்து மேற்கொள்ளப்பட்டு வருகின்றன. மாநிலத்தின் ஏராளமான வளங்கள் மற்றும் மக்களின் திறன் மீது முழுமையான நம்பிக்கை வைத்து, வளா்ச்சிக்கான ‘மகா யாகத்தில்’ உத்தரகண்ட் அரசு ஈடுபட்டுள்ளது.

கரோனா போராட்டத்தில் சாதனை: கரோனாவுக்கு எதிரான போராட்டத்தில் உத்தரகண்ட் சிறப்பாகச் செயல்பட்டது. புவியியல் ரீதியான சிரமங்களைக் கடந்து, 100 சதவீத முதல் தவணை தடுப்பூசி இலக்கை இந்த மாநிலம் சாதித்துள்ளது. உத்தரகண்ட் மிக உயரமான பகுதியில் அமைந்துள்ளது. அந்த உயரத்தைவிடவும் கூடுதலான உயரத்துக்கு மாநிலம் முன்னேறும் என்றாா் பிரதமா் மோடி.

மாநில ஆளுநா் குா்மீத் சிங், முதல்வா் புஷ்கா் சிங் தாமி உள்ளிட்டோரும் இந்த நிகழ்ச்சியில் பங்கேற்றனா்.