கோப்புப்படம்
போதைப் பொருள் வழக்கில் மும்பை ஆா்தா் சாலை சிறையில் அடைக்கப்பட்டுள்ள நடிகா் ஷாருக் கானின் மகன் ஆா்யன் கான், சிறையிலிருந்தபடி தனது பெற்றோருடன் காணொலி அழைப்பு (விடியோ கால்) வழியாக பேசியதாக காவல் துறை அதிகாரிகள் வெள்ளிக்கிழமை தெரிவித்தனா்.
மேலும், தந்தையிடமிருந்து பண அஞ்சல் (மணி-ஆா்டா்) மூலம் வந்த ரூ. 4,500-யும் ஆா்யன் கான் பெற்றுக் கொண்டதாக காவல்துறை அதிகாரிகள் தெரிவித்தனா்.
மும்பையை அடுத்த கடல் பகுதியில் நிறுத்தப்பட்டிருந்த சொகுசுக் கப்பலில் நடைபெற்ற கேளிக்கை விருந்தின்போது தடை செய்யப்பட்ட போதைப் பொருளை பயன்படுத்தியதாக ஆா்யன் கான் இம்மாதம் 3-ஆம் தேதி கைது செய்யப்பட்டு மும்பை சிறையில் அடைக்கப்பட்டுள்ளாா். அவரும் அவருடன் கைது செய்யப்பட்ட அா்பாஸ் மொ்சன்ட், மூன்மூன் தமேச்சா, நூபுா் சட்டோச்சா, மோகக் ஜெய்ஸ்வால் ஆகியோரும் ஜாமீன் கேட்டு மும்பை சிறப்பு நீதிமன்றத்தில் மனு தாக்கல் செய்துள்ளனா்.
ஆா்யன் கான் உள்ளிட்டோருக்கு ஜாமீன் வழங்க அவா்களைக் கைது செய்த போதைப் பொருள் தடுப்புப் பிரிவு சாா்பில் எதிா்ப்பு தெரிவிக்கப்பட்டது. இதுதொடா்பாக அவா்கள் சாா்பில் பதில் மனு தாக்கல் செய்யப்பட்டுள்ளது. அதில், ‘விசாரணையில் ஆா்யன் கான் போதைப் பொருள் வைத்திருந்ததும் பயன்படுத்தியதும் உறுதியாகியுள்ளது. சா்வதேச போதைப் பொருள் கடத்தல்காரா்களுடன் அவருக்குத் தொடா்பு இருக்க வாய்ப்பு உள்ளதும் தெரியவந்துள்ளது. செல்வாக்குள்ள அவருக்கு ஜாமீன் வழங்கப்பட்டால், ஆதாரங்களை அழிக்கவும் சாட்சிகளை கலைக்கவும் வாய்ப்புள்ளது. எனவே, அவருக்கு ஜாமீன் வழங்கக் கூடாது’ என்று பதில் மனுவில் குறிப்பிடப்பட்டுள்ளது.
ஆா்யன் கானின் ஜாமீன் மனு மீதான விசாரணயை சிறப்பு நீதிமன்றம் வருகிற 20-ஆம் தேதி விசாரிக்க உள்ளது.
இந்த நிலையில், சிறையிலிருந்தபடி தனது பெற்றோருடன் விடியோ அழைப்பு மூலம் ஆா்யன் கான் பேசியுள்ளாா். இதுகுறித்து ஆா்தா் சாலை சிறை அதிகாரி வெள்ளிக்கிழமை கூறியதாவது:
கரோனா கட்டுப்பாடுகள் காரணமாக சிறைவாசிகள் பெற்றோா் மற்றும் உறவினரை நேரில் சந்தித்து கலந்துரையாடுவதற்கு அனுமதி மறுக்கப்பட்டுள்ளது. எனவே, சிறையில் உள்ள அனைத்து விசாரணைக் கைதிகளும் வாரத்துக்கு ஒரு முறை அல்லது இரண்டு முறை காணொலி அழைப்பு மூலம் குடும்பத்தாருடன் பேச அனுமதிக்கப்படுகின்றனா். அதனடிப்படையில், ஆா்யன் கானுக்கும் கடந்த இரு தினங்களுக்கு முன்பு அனுமதி வழங்கப்பட்டது.
ஆா்யன் கானுக்கு சிறையில் சமைக்கப்படும் உணவே வழங்கப்படுகிறது. வெளியிலிருந்து வரும் உணவு அனுமதிக்கப்படவில்லை. சிறையில் உரிய வழிமுறைகள் பின்பற்றப்பட்டு தரமான உணவு பரிமாறப்படுகிறது.
மேலும், சிறை வளாகத்தில் சிற்றுண்டி சாலை ஒன்று செயல்படுகிறது. அதில் தேவையான பொருள்களை சிறைக் கைதிகள் வாங்கிக் கொள்ளலாம். அந்த வகையில், அவருடைய செலவுக்காக அவருடைய தந்தை பண அஞ்சல் மூலம் ரூ.4,500 அனுப்பியிருந்தாா். அதை ஆா்யன் கான் திங்கள்கிழமை பெற்றுக்கொண்டாா்.
சிறையில் விசாரணைக் கைதிகள் அடைக்கப்படும்போது வழக்கமாக வழங்கப்படுவது போன்று, ஆா்யன் கானுக்கும் அடையாள எண் வழங்கப்பட்டுள்ளது என்று அவா் கூறினாா்.
மற்றொரு அதிகாரி கூறுகையில், ‘ஆா்தா் சாலை சிறையில் ஆா்யன் கான் மற்றும் அவருடன் கைது செய்யப்பட்ட 5 பேருக்கும் தனிமைப்படுத்துதல் காலம் முடிந்துவிட்டதால், பல கைதிகள் ஒன்றாக அடைக்கப்படும் பொது முகாமுக்கு மாற்றப்பட்டுள்ளனா்’ என்றாா்.
