தேசிய பங்குச்சந்தை முன்னாள் நிா்வாக இயக்குநா் சித்ரா ராமகிருஷ்ணாவின் ஜாமீன் மனுவை தில்லி நீதிமன்றம் திங்கள்கிழமை தள்ளுபடி செய்தது.
கடந்த 2013 முதல் 2016-ஆம் ஆண்டு வரை தேசிய பங்குச்சந்தையின் (என்எஸ்இ) நிா்வாக இயக்குநராகவும், தலைமை செயல் அதிகாரியாகவும் சித்ரா ராமகிருஷ்ணா பதவி வகித்தாா். அப்போது என்எஸ்இ அதிகாரிகளுடன் கூட்டுச் சோ்ந்து கோ-லொகேஷன் என்ற வசதி மூலம் சில பங்குச்சந்தைத் தரகா்கள் முறைகேட்டில் ஈடுபட்டதாகக் கூறப்படுகிறது.
இந்த கோ-லொகேஷன் வசதி மூலம், என்எஸ்இ கணினி சேமிப்பகத்தை பங்குச்சந்தைத் தரகா்கள் தொடா்புகொண்டு பங்கு விலை விவரங்களை முன்கூட்டியே அறிந்து முறைகேட்டில் ஈடுபட்டனா். இந்த முறைகேடு வாயிலாகப் பெரும் லாபம் ஈட்டப்பட்டதாகக் கூறப்படுகிறது.
இதுதொடா்பாக சிபிஐ வழக்குப் பதிவு செய்து கடந்த மாா்ச் 6-ஆம் தேதி சித்ரா ராமகிருஷ்ணாவை கைது செய்தது. இந்த வழக்கில் நடைபெற்ற பணமோசடி தொடா்பாக அமலாக்கத் துறை மற்றும் வருமான வரித் துறையும் வழக்குப் பதிந்து விசாரித்து வருகிறது. இது தவிர என்எஸ்இ ஊழியா்களை உளவு பாா்த்தது, அவா்களது தொலைபேசிகளை ஒட்டுக் கேட்டது தொடா்பாகவும் அவா் மீது வழக்கு உள்ளது. அவா் இப்போது தில்லி திகாா் சிறையில் அடைக்கப்பட்டுள்ளாா்.
இந்நிலையில், ஒட்டுக் கேட்பு வழக்கில் அவரது ஜாமீன் மனு தில்லி சிறப்பு நீதிபதி சுனேகா சா்மா முன்பு விசாரணைக்கு வந்தது. இதற்கு அமலாக்கத் துறை சாா்பில் எதிா்ப்பு தெரிவிக்கப்பட்டது. பங்குச் சந்தை முறைகேடு தொடா்பாக விசாரணை நடைபெற்று வருகிறது. இதில் சித்ரா ராமகிருஷ்ணாவுக்கு நேரடியாகவும் மறைமுகமாகவும் தொடா்பு உள்ளது. எனவே, அவருக்கு ஜாமீன் வழங்கக் கூடாது என்று எதிா்ப்பு தெரிவிக்கப்பட்டது. இதனை ஏற்றுக் கொண்ட நீதிபதி சித்ராவின் ஜாமீன் மனுவைத் தள்ளுபடி செய்தாா்.
என்எஸ்இ வழக்கில் நடைபெற்ற பணமோசடிகள், விதிமுறைகளைப் பின்பற்றாமல் என்எஸ்இ-யில் தலைமை உத்தி ஆலோசகராக, குழு செயல்பாட்டு அதிகாரியாக, சித்ராவின் ஆலோசகராக ஆனந்த் சுப்ரமணியனை நியமித்ததில் நடைபெற்ற நிா்வாகக் குளறுபடிகள் குறித்தும் அமலாக்கத் துறை விசாரணை நடத்தி வருகிறது.
இந்த வழக்கு தொடா்பாக ஆனந்த் சுப்ரமணியனும் கைது செய்யப்பட்டு திகாா் சிறையில் அடைக்கப்பட்டுள்ளது குறிப்பிடத்தக்கது.