ஜேஎன்யு: முதல் பெண் துணைவேந்தா் நியமனம்

ஜவாஹா்லால் நேரு பல்கலைக்கழகத்தின் முதல் பெண் துணைவேந்தராக சாந்திஸ்ரீ துளிப்புடி பண்டிட் நியமிக்கப்பட்டுள்ளதாக மத்திய கல்வி அமைச்சகம் திங்கள்கிழமை தெரிவித்துள்ளது.

மகாராஷ்டிர மாநிலம், புணே சாவித்ரிபாய் பூலே பல்கலைக்கழக அரசியல், பொது நிா்வாகத் துறை பேராசிரியராக சாந்திஸ்ரீ பண்டிட் (59) தற்போது பணியாற்றி வருகிறாா். ஜவாஹா்லால் நேரு பல்கலைக்கழகத்தின் முன்னாள் மாணவியான அவா், அங்கு எம்.பில். பட்டம், சா்வதேச உறவுகள் ஆய்வுக்காக பிஎச்.டி. பட்டம் பெற்றவா்.

அவரது நியமனம் குறித்து கல்வி அமைச்சக மூத்த அதிகாரி ஒருவா் கூறுகையில், ‘‘ஜவாஹா்லால் நேரு பல்கலைக்கழக பாா்வையாளரான குடியரசுத் தலைவா் ராம்நாத் கோவிந்த், சாந்திஸ்ரீ பண்டிட்டை பல்கலைக்கழகத்தின் துணைவேந்தராக நியமிப்பதற்கு ஒப்புதல் அளித்துள்ளாா். அவா் 5 ஆண்டுகள் இந்தப் பதவி வகிப்பாா்’’ என்றாா்.

சாந்திஸ்ரீ பண்டிட் முதன்முறையாக கடந்த 1988-இல் கோவா பல்கலைக்கழகத்தில் தனது ஆசிரியப் பணியைத் தொடங்கினாா். பின்னா், புணே பல்கலைக்கழகத்தில் கடந்த 1993-ஆம் ஆண்டில் இணைந்தாா். இதுதவிர, பல்வேறு கல்வி நிறுவனங்கள், அமைப்புகளில் நிா்வாக பொறுப்புகளையும் அவா் வகித்துள்ளாா்.

அந்த வகையில், பல்கலைக்கழக மானியக் குழு (யுஜிசி), இந்திய சமூக அறிவியல் ஆராய்ச்சி கவுன்சில் (ஐசிஎஸ்எஸ்ஆா்) ஆகிய அமைப்புகளில் உறுப்பினராகப் பொறுப்பு வகித்துள்ளாா். இதுவரை 29 பிஎச்.டி மாணவா்களுக்கு வழிகாட்டியுள்ளாா்.

இதற்கு முன்பு ஜவாஹா்லால் நேரு பல்கலைக்கழக துணைவேந்தராகப் பதவி வகித்த எம்.ஜகதீஷ்குமாரின் 5 ஆண்டுகால பதவிக் காலம் கடந்த ஆண்டில் நிறைவடைந்தது. பின்னா், கடந்த ஓராண்டாக அவா் பொறுப்பு துணைவேந்தராக இருந்த நிலையில், கடந்த வாரம் பல்கலைக்கழக மானியக் குழு (யுஜிசி) தலைவராக நியமிக்கப்பட்டாா்.

இந்த நிலையில், சாந்திஸ்ரீ பண்டிட்டின் நியமனத்துக்கு வாழ்த்து தெரிவித்து ஜகதீஷ்குமாா் விடுத்துள்ள செய்திக் குறிப்பில், ‘பேராசிரியா் சாந்திஸ்ரீ பண்டிட் ஜவாஹா்லால் நேரு பல்கலைக்கழகத்தின் அடுத்த துணைவேந்தராக நியமிக்கப்பட்டிருப்பது மகிழ்ச்சியளிக்கிறது. ஜேஎன்யு-வின் முதல் பெண் துணைவேந்தா் இவரே ஆவாா். இதற்கான பொறுப்பை அவரிடம் ஒப்படைத்து, அவரை வாழ்த்துகிறேன்’ என்று கூறியுள்ளாா்.

தேசிய கல்வித் திட்டம் அமல்படுத்த முன்னுரிமை: ஜவாஹா்லால் பல்கலைக்கழகத்தில் பாலின சமத்துவத்தை உறுதிப்படுத்துவதற்கும் தேசிய கல்வித் திட்டத்தை அமல்படுத்துவதற்கும் முன்னுரிமை அளிக்கப் போவதாக சாந்திஸ்ரீ பண்டிட் கூறினாா்.

ஜேஎன்யு துணைவேந்தராக நியமிக்கப்பட்டதையடுத்து அவா் வெளியிட்ட செய்திக்குறிப்பில், எனக்கு வாய்ப்பளித்த பிரதமருக்கும் மத்திய உயா் கல்வித் துறை அமைச்சருக்கும் நன்றி கூறக் கடமைப்பட்டுள்ளேன். ஜேஎன்யுவில் வெளிப்படையான நிா்வாகம், பாலின சமத்துவம் நிலவுவதை உறுதி செய்வதற்கும், தேசிய கல்வித் திட்டத்தை அமல்படுத்துவதற்கும் முன்னுரிமை அளிப்பேன் என்று தெரிவித்துள்ளாா்.