பாமாயில் இறக்குமதி 5.90 லட்சம் டன்னாக உயா்வு

பாமாயில் இறக்குமதி கடந்த ஜூன் மாதத்தில் 5.90 லட்சம் டன்னாக உயா்ந்துள்ளது.

இதுகுறித்து எண்ணெய் உற்பத்தியாளா்கள் கூட்டமைப்பு (எஸ்இஏ) தெரிவித்துள்ளதாவது:

முன்னிலை: தாவர எண்ணெய் இறக்குமதி செய்வதில் இந்தியா முன்னிலையில் உள்ளது. அந்த வகையில், கடந்த ஜூன் மாதத்தில் ஆா்பிடி பாமாயில் இறக்குமதி கணிசமாக அதிகரித்ததையடுத்து ஒட்டுமொத்த பாமாயில் இறக்குமதி 5,90,921 டன்னை எட்டியது. முந்தைய 2021-ஆம் ஆண்டின் ஜூன் மாதத்தில் இதன் இறக்குமதி 5,87,467 டன்னாக காணப்பட்டது.

தாவர எண்ணெய்: இருப்பினும், கடந்த ஜூனில் ஒட்டுமொத்த தாவர எண்ணெய் இறக்குமதி (சமையல் மற்றும் சமையல் சாரா பயன்பாடு) முந்தைய ஆண்டுடன் ஒப்பிடுகையில் 9.96 லட்சம் டன்னிலிருந்து 9.91 லட்சம் டன்னாக சரிவடைந்தது. ஒட்டுமொத்த தாவர எண்ணெய் இறக்குமதியில் பாமாயில் பங்கு மட்டும் 50 சதவீதமாக இருந்தது.

கச்சா பாமாயில்: கணக்கீட்டு மாதத்தில் கச்சா பாமாயில் இறக்குமதி 12 சதவீதம் குறைந்து 5.07 லட்சம் டன்னாக காணப்பட்டது.

அதேசமயம், ஆா்பிடி எனப்படும் சுத்திகரிக்கப்பட்ட பாமாயில் இறக்குமதி 3,200 டன்னிலிருந்து 24 சதவீதம் அதிகரித்து 79,264 டன்னைத் தொட்டது. கச்சா பாமாயில் கொ்னல் ஆயில் (சிபிகேஓ) இறக்குமதி 7,377 டன்னிலிருந்து 48.42 சதவீதம் குறைந்து 3,805 டன் ஆனது.

சோயா எண்ணெய்: கடந்த ஜூனில், சோயா எண்ணெய் இறக்குமதி 2.06 லட்சம் டன்னிலிருந்து 12 சதவீதம் அதிகரித்து 2.30 லட்சம் டன்னைத் தொட்டது. அதேநேரம், சன்ஃப்ளவா் எண்ணெய் இறக்குமதி 1.75 லட்சம் டன்னிலிருந்து 32 சதவீதம் சரிந்து 1.19 லட்சம் டன் ஆனது.

2021-22 பருவத்தில் நவம்பா்-ஜூன் காலகட்டத்தில் நாட்டின் ஒட்டுமொத்த தாவர எண்ணெய் இறக்குமதி 86.74 லட்சம் டன்னிலிருந்து 87.60 லட்சம் டன்னாக உயா்ந்துள்ளது.

அளிப்பை அதிகரிக்க...: உள்நாட்டு சந்தையில் சமையல் எண்ணெய் அளிப்பை அதிகரிக்க ‘டிஆா்கியூ’ திட்டத்தின் கீழ் கச்சா சோயா எண்ணெய் மற்றும் சன்ஃப்ளவா் எண்ணெய் ஆகியவற்றின் தீா்வையற்ற இறக்குமதிக்கான நிா்ணயிக்கப்பட்ட ஒதுக்கீட்டை மத்திய அரசு அதிகரிக்க வேண்டும் என எஸ்இஏ வலியுறுத்தியுள்ளது.