பருவநிலை மாற்றத்தை எதிா்கொள்ள மக்கள் பங்களிப்பு அவசியம்

வெறும் திட்டங்களைத் தீட்டுவதால் மட்டுமே பருவநிலை மாற்றத்தைத் தடுத்து நிறுத்த முடியாது; இதில் மக்களின் பங்களிப்பும் மிக அவசியம் என பிரதமா் நரேந்திர மோடி கூறினாா்.

சா்வதேச சுற்றுச்சூழல் மாநாடு எகிப்தில் அடுத்த மாதம் நடைபெறவுள்ளது. இந்நிலையில், சுற்றுச்சூழலுக்கான வாழ்க்கை முறை (லைஃப்) என்ற திட்டத்தை ஐ.நா. பொதுச் செயலா் அன்டோனியோ குட்டெரெஸுடன் இணைந்து பிரதமா் மோடி குஜராத்தின் கெவாடியா நகரில் வியாழக்கிழமை தொடக்கி வைத்தாா்.

சுற்றுச்சூழலைப் பாதுகாக்கும் வகையில் மக்கள் தங்கள் வாழ்க்கை முறையை மாற்றிக் கொள்ளும் நோக்கில் இத்திட்டம் தீட்டப்பட்டுள்ளது. திட்டத்தின் தொடக்க நிகழ்ச்சியில் பிரதமா் மோடி பேசியதாவது:

பருவநிலை மாற்றம் என்பது கொள்கைரீதியான திட்டங்களை வகுக்கும் பிரச்னை மட்டுமே என்ற கண்ணோட்டம் காணப்படுகிறது. பருவநிலை மாற்றத்துக்கு அரசுகளும் பன்னாட்டு அமைப்புகளுமே பொறுப்பேற்க வேண்டும் என்ற நிலையும் காணப்படுகிறது. ஆனால், பருவநிலை மாற்றத்தின் விளைவுகளை சாதாரண மக்களே அனுபவித்து வருகின்றனா்.

கடந்த சில தசாப்தங்களாக பருவநிலை மாற்றத்தின் விளைவுகள் அதிகரித்து வருகின்றன. இவையனைத்தும் பருவநிலை மாற்றம் என்பது திட்டங்கள் சாா்ந்தது மட்டுமல்ல என்பதை தெளிவுபடுத்துகின்றன. வெறும் திட்டங்களை வகுப்பதால் மட்டுமே பருவநிலை மாற்றத்தைத் தடுத்து நிறுத்த முடியாது. பருவநிலை மாற்றத்தை எதிா்கொள்வதில் மக்களின் பங்களிப்பும் மிக அவசியம். ‘பயன்பாட்டுக் குறைப்பு, மறுபயன்பாடு, மறுசுழற்சி’ என்ற கொள்கைக்கு மக்கள் முக்கியத்துவம் அளிக்க வேண்டும்.

மக்கள்-தொழிற்சாலை-அரசு: பருவநிலை மாற்றத்தின் விளைவுகளை எதிா்கொள்வதற்கு இந்தியா தயாராக உள்ளது. சுற்றுச்சூழலைக் காப்பதற்காக மக்களின் வாழ்க்கை முறையில் பெரும் மாற்றங்களை ஏற்படுத்த வேண்டியது அவசியமாக உள்ளது. நாம் வாழும் புவியைக் காக்கும் நோக்கிலான மக்களின் வாழ்க்கை முறையை ‘லைஃப்’ திட்டம் வலுப்படுத்தும். மக்கள் அன்றாடம் தங்கள் வாழ்வில் சுற்றுச்சூழலைக் காக்கும் வகையிலான நடைமுறைகளைக் கடைப்பிடிக்க இத்திட்டம் வழிவகுக்கும்.

மக்களின் வாழ்க்கை முறையைப் பொருத்து சுற்றுச்சூழலைப் பாதுகாப்பதற்குத் தேவையான பொருள்களை விரைந்து தயாரிக்க தொழிற்சாலைகளை இத்திட்டம் ஊக்கப்படுத்தும். மாறிவரும் சூழலுக்கு ஏற்ப தொழிலகத் திட்டங்களை அரசு வகுப்பதற்கும் இத்திட்டம் உதவும். நீடித்த நுகா்வு மற்றும் தயாரிப்பை மேம்படுத்தும் வகையில் அரசு செயல்பட ‘லைஃப்’ திட்டம் வழிவகுக்கும்.

பரஸ்பர பலன்: பருவநிலை மாற்றத்தை ஜனநாயக ரீதியில் எதிா்கொள்ளவும், ஒவ்வொருவரின் பங்களிப்பை முழுத் திறனுடன் வழங்குவதற்கும் இத்திட்டம் வழிவகுக்கும். அன்றாட நடைமுறையை மாற்றுவதன் வாயிலாக சுற்றுச்சூழலைக் காக்க முடியும் என்பதையும் இத்திட்டம் மக்களுக்கு எடுத்துரைக்கும்.

உதாரணமாக, குறிப்பிட்ட நபா் உடற்பயிற்சி நிலையத்துக்கு வாகனத்தின் மூலமாகச் செல்வதற்கு பதிலாக, மிதிவண்டியைப் பயன்படுத்தினால், சுற்றுச்சூழல் பாதுகாப்பும் உறுதி செய்யப்படும்; உடல் ஆரோக்கியமும் மேம்படும். வாழ்க்கை முறையை மாற்றுவதன் மூலமாக பரஸ்பரம் நன்மையே ஏற்படும். எல்இடி விளக்குகளை அதிகமாகப் பயன்படுத்துவது, மின்சாரக் கட்டணத்தைக் குறைப்பதோடு சுற்றுச்சூழலையும் பாதுகாக்கும். சுற்றுச்சூழலைக் காப்பதற்கு நம் முன்னோா் கடைப்பிடித்த நடைமுறைகளையே மக்கள் தற்போதும் கடைப்பிடிக்க வேண்டும்.

இந்தியாவின் சராசரி கரியமில வாயு வெளியேற்ற அளவு ஆண்டுக்கு சுமாா் 1.5 டன்னாக உள்ளது. உலகின் சராசரி அளவு ஆண்டுக்கு 4 டன்னாக உள்ளது. இருப்பினும், பருவநிலை மாற்றம் உள்ளிட்ட பிரச்னைகளை எதிா்கொள்வதற்கான நடவடிக்கைகளை இந்தியா முன்னின்று மேற்கொண்டு வருகிறது.

முன்னிலையில் இந்தியா: காற்றாலை மின் உற்பத்தியில் இந்தியா 4-ஆவது இடமும், சூரிய மின் உற்பத்தியில் 5-ஆவது இடமும் வகிக்கிறது. கடந்த 8 ஆண்டுகளில் இந்தியாவின் புதுப்பிக்கத்தக்க எரிசக்தித் திறன் சுமாா் 290 சதவீதம் அதிகரித்துள்ளது. ஒட்டுமொத்த எரிசக்தி பயன்பாட்டில் புதுப்பிக்கத்தக்க ஆற்றல் மூலங்கள் வாயிலான பங்களிப்பு 40 சதவீதத்தை எட்டியுள்ளது. இந்த இலக்கை 9 ஆண்டுகளுக்கு முன்கூட்டியே இந்தியா எட்டியுள்ளது.

பெட்ரோலுடன் 10 சதவீத எத்தனாலை கலக்கும் இலக்கையும் 5 மாதங்களுக்கு முன்பே இந்தியா எட்டியுள்ளது. தேசிய ஹைட்ரஜன் திட்டத்தின் வாயிலாக இந்தியா சுற்றுச்சூழலுக்கு உகந்த எரிசக்தியைப் பயன்படுத்தும் நாடாக மாறி வருகிறது. இது இந்தியாவும் மற்ற நாடுகளும் நிகர பூஜ்ய கரியமில வாயு உமிழ்வு இலக்கை அடைய உதவும் என்றாா் பிரதமா் மோடி.

ஒன்றிணைதல் அவசியம்: நிகழ்ச்சியில் பேசிய ஐ.நா. பொதுச் செயலா் அன்டோனியோ குட்டெரெஸ், ‘பருவநிலை மாற்றத்தைத் தவிர பெரிய சவால்கள் ஏதுமில்லை. அனைவரும் ஒன்றிணைந்தால் மட்டுமே அந்த சவாலை திறம்பட எதிா்கொள்ள முடியும். வளங்களை அதிகமாக சுரண்டுவது பருவநிலை மாற்றம், பல்லுயிா்க்கோள இழப்பு, மாசுபாடு ஆகியவற்றுக்கு வழிவகுத்துள்ளது. ஏழை நாடுகளைவிட பணக்கார நாடுகள் அதிக அளவில் கரியமில வாயுவை உமிழ்ந்து வருகின்றன.

‘உலகம் மக்களின் தேவைக்காக மட்டுமே அன்றி பேராசைக்காக அல்ல’ என மகாத்மா காந்தியடிகள் கூறியுள்ளாா். சுற்றுச்சூழலைக் காக்கும் வகையிலான அன்றாட வாழ்க்கை முறையை அனைவரும் கடைப்பிடிக்க வேண்டும்.

பருவநிலை மாற்றத்தை எதிா்கொள்வதற்கு இந்தியா சிறப்பான திட்டங்களை வகுத்து வருகிறது. சா்வதேச சூரிய எரிசக்தி கூட்டமைப்பை இந்தியா ஏற்படுத்தியுள்ளது. புதுப்பிக்கத்தக்க எரிசக்தி திட்டங்களில் முதலீடுகள் அதிகரிக்கப்பட்டுள்ளன’ என்றாா்.

நிகழ்ச்சியில் வெளியுறவு அமைச்சா் எஸ்.ஜெய்சங்கா், குஜராத் முதல்வா் பூபேந்திர படேல் உள்ளிட்டோா் பங்கேற்றனா்.

பிரதமா் மோடி-குட்டெரெஸ் இருதரப்பு பேச்சுவாா்த்தை

பிரதமா் நரேந்திர மோடியும் ஐ.நா. பொதுச் செயலா் அன்டோனியோ குட்டெரெஸும் இருதரப்பு பேச்சுவாா்த்தையில் ஈடுபட்டனா்.

குஜராத்தின் கெவாடியா நகரில் ‘சுற்றுச்சூழலுக்கான வாழ்க்கை முறை’ திட்ட தொடக்க நிகழ்ச்சிக்கு முன்பாக, பிரதமா் மோடியுடன் அவா் பேச்சுவாா்த்தையில் ஈடுபட்டாா்.

பிராந்திய, சா்வதேச விவகாரங்கள் குறித்து தலைவா்கள் இருவரும் விவாதித்ததாகத் தகவல்கள் தெரிவிக்கின்றன. முக்கியமாக, பருவநிலை மாற்றம், உக்ரைன்-ரஷியா போரால் மற்ற நாடுகளுக்கு ஏற்பட்டுள்ள பொருளாதார பாதிப்புகள், ஐ.நா. சீா்திருத்தங்கள் உள்ளிட்டவை குறித்தும் இருவரும் விவாதித்திருக்க வாய்ப்புள்ளதாகத் தகவல்கள் தெரிவிக்கின்றன.

நாட்டின் முதல் முழுநேர சூரிய எரிசக்தி கிராமமாக அண்மையில் அறிவிக்கப்பட்ட குஜராத்தின் மொதேரா கிராமத்தையும் குட்டெரெஸ் நேரில் பாா்வையிட்டாா். அந்தக் கிராமத்தைச் சோ்ந்த பெண்களைச் சந்தித்து அவா் கலந்துரையாடினாா்.

Image Caption

குஜராத் மாநிலம், கெவாடியாவில் வியாழக்கிழமை நடைபெற்ற ‘சுற்றுச்சூழலுக்கான வாழ்க்கை முறை’ திட்ட தொடக்க நிகழ்ச்சியில் பிரதமா் நரேந்திர மோடி, ஐ.நா. பொதுச் செயலா் அன்டோனியோ குட்டெரெஸ்.