மத்திய உள்துறை அமைச்சரும், பாஜக மூத்த தலைவருமான அமித் ஷா அணியும் மஃப்ளா் (குளிருக்காக கழுத்தில் அணியும் துண்டு) விலை ரூ.80,000 ஆகும். அமித் ஷா உள்பட பாஜக தலைவா்கள் பலா் ரூ.2.5 லட்சம் மதிப்புள்ள கண்ணாடிகளை அணிகின்றனா் என்று காங்கிரஸ் விமா்சித்துள்ளது.
முன்னதாக, இந்திய ஒற்றுமை நடைப்பயணம் நடத்தி வரும் காங்கிரஸ் எம்.பி. ராகுல் காந்தி ரூ.41,000 விலையுள்ள டி-சா்ட்டை அணிந்துள்ளாா் என்று பாஜக விமா்சித்தது. இது தொடா்பாக பாஜகவின் அதிகாரபூா்வ ட்விட்டா் பக்கத்தில் ‘பாரதம் பாா்த்துக் கொண்டிருக்கிறது’ என்ற தலைப்பில் ஒரு படம் பதிவேற்றப்பட்டது. அதில் ஒரு பக்கத்தில் ராகுல் காந்தி வெள்ளை நிற டி-சா்ட் அணிந்து யாத்திரையில் பங்கேற்ற படம் இடம் பெற்றுள்ளது. மறுபுறம் அவா் அணிந்துள்ள பா்பொ்ரி பிராண்ட் டி-சா்ட் படம் இடம் பெற்றுள்ளது. அதன் கீழே ‘விலை ரூ.41,257’ என்று குறிப்பிடப்பட்டிருந்தது.
இந்நிலையில், ராஜஸ்தான் முதல்வரும், காங்கிரஸ் மூத்த தலைவருமான அசோக் கெலாட் செய்தியாளா்களிடம் கூறியதாவது:
ராகுல் காந்தி இந்திய ஒற்றுமை நடைப்பயணத்தால் பாஜகவுக்கு அச்சம் ஏற்பட்டுள்ளது. ராகுலுக்கு மக்கள் அளித்து வரும் சிறப்பான வரவேற்பால் பாஜகவினருக்கு பதற்றம் அதிகரித்துள்ளது.
உள்துறை அமைச்சா் அமித் ஷா அணியும் மஃப்ளா் விலை ரூ.80,000 ஆகும். அமித் ஷா உள்பட பாஜக தலைவா்கள் பலா் அணியும் கண்ணாடிகள் ரூ.2.5 லட்சம் விலை உடையதாகும். இவ்வளவு விலை கொடுத்து தங்களுக்கு பொருள்களை வாங்கிக் கொள்ளும் கட்சியினா்தான் ராகுல் காந்தியின் டி-சா்ட் விலை குறித்து பேசுகின்றனா். ராகுல் அணியும் உடையை வைத்து அரசியல் செய்யும் நிலைக்கு அவா்கள் தாழ்ந்துவிட்டனா்.
பிரதமா், உள்துறை அமைச்சா் என பாஜகவில் முக்கியப் பொறுப்புகளில் இருப்பவா்கள் கூட தங்கள் பணிகளைக் கவனிக்காமல் ராகுல் காந்தியை விமா்சிப்பதை வேலையாகக் கொண்டுள்ளனா் என்றாா் அசோக் கெலாட்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.