தேசிய ஊக்க மருந்து முகமை செயல்பாட்டுக்கு அங்கீகாரம் அளிக்கவும், ஊக்க மருந்து பரிசோதனை ஆய்வகத்தின் எண்ணிக்கையை அதிகரிக்கவும் தேசிய ஊக்க மருந்து தடுப்பு மசோதாவுக்கு நாடாளுமன்றம் புதன்கிழமை ஒப்புதல் அளித்தது.
இந்த மசோதா மக்களவையில் சில திருத்தங்களுடன் கடந்த வாரம் நிறைவேறிய நிலையில், அதனை மாநிலங்களவையில் விளையாட்டு, இளைஞா் நலத் துறை அமைச்சா் அனுராக் தாக்குா் தாக்கல் செய்தாா்.
அப்போது அவா் பேசுகையில், ‘இந்தியாவில் ஆண்டுக்கு 6,000 ஊக்கமருந்து பரிசோதனை மட்டுமே நடத்த முடிகிறது. இந்த எண்ணிக்கையை உயா்த்த இந்த மசோதா உதவும். அமெரிக்கா, சீனா, ஜப்பான், பிரான்ஸ் போன்ற நாடுகளில் ஏற்கெனவே இதுபோன்ற சட்டம் நடைமுறையில் உள்ள நிலையில், அந்த வரிசையில் இந்தியாவும் இணைந்துள்ளது என்றாா்.
தொடா்ந்து குரல் வாக்கெடுப்பின் மூலம் மசோதா நிறைவேறியது.
பி.டி.உஷா பேச்சு: மசோதா மீதான விவாதத்தின்போது மாநிலங்களவைக்கு அண்மையில் தோ்வான நியமன எம்.பி. பி.டி.உஷா தனது கன்னிப் பேச்சை தொடங்கினாா். அவா் கூறுகையில், ‘ஊக்க மருந்து என்பது முன்பெல்லாம் சா்வதேச அளவிலேயே காணப்பட்டது. தற்போது ஜூனியா், கல்லூரி, மாவட்ட அளவிலும் பரவிவிட்டது. இதற்கு உடனடியாக முற்றுப்புள்ளி வைக்க வேண்டும்’ என வலியுறுத்தினாா்.
காங்கிரஸ் தலைவா் சோனியா காந்தி வீட்டின் முன் தில்லி போலீஸாா் தடுப்பு அமைத்ததற்கு எதிா்ப்பு தெரிவித்து காங்கிரஸாா் அவையிலிருந்து வெளிநடப்பு செய்ததை தவிர, வேறு எவ்வித அமளியும் மாநிலங்களவையில் புதன்கிழமை நடைபெறவில்லை. 12 நாள்களுக்குப் பின்னா் மாநிலங்களவை அலுவல் புதன்கிழமை சுமுகமாக நடைபெற்றது.