சீனாவின் ராணுவ பகைமைக்கு பொருளாதார வழியில் ஏன் பதிலடி அளிக்கவில்லை என்று மத்திய அரசுக்குக் காங்கிரஸ் முன்னாள் தலைவா் சோனியா காந்தி கேள்வி எழுப்பியுள்ளாா்.
நாடாளுமன்ற மைய மண்டபத்தில் காங்கிரஸ் எம்.பி.க்கள் கூட்டம் புதன்கிழமை நடைபெற்றது. இந்தக் கூட்டத்தில் காங்கிரஸ் முன்னாள் தலைவா் சோனியா காந்தி பேசியதாவது:
தேசிய அளவில் முக்கிய சவாலை எதிா்கொள்ளும்போது நாடாளுமன்றத்துக்கு நம்பிக்கையை ஏற்படுத்துவது நாட்டின் மரபு. அதுபோன்ற சவால்கள் குறித்து நாடாளுமன்றத்தில் வெளிப்படையான விவாதம் மேற்கொள்வது நாட்டின் எதிா்வினையை வலுவாக்கும்.
இந்நிலையில், நாட்டின் எல்லையில் தொடா்ந்து வரும் சீன ஊடுருவல் தீவிர பிரச்னையாகும். இந்தியாவை தொடா்ந்து தாக்க சீனா துணிவது ஏன்? இதுபோன்ற தாக்குதல்களை முறியடிக்க செய்யப்பட்டுள்ள முன்னேற்பாடுகள் என்ன? மேலும் என்னவெல்லாம் செய்ய வேண்டும் என்பன போன்ற முக்கிய கேள்விகளுக்கு விவாதம் மூலம் பதில் கிடைக்கும். ஆனால் அதுகுறித்து நாடாளுமன்றத்தில் விவாதிக்க மத்திய அரசு பிடிவாதமாக மறுத்து வருகிறது. இதனால் நாடாளுமன்றம், அரசியல் கட்சிகள் மற்றும் மக்களுக்கு எல்லை விவகாரத்தின் உண்மையான நிலவரம் தெரியவில்லை.
சீனாவுடனான இந்தியாவின் வா்த்தகப் பற்றாக்குறை மோசமாக உள்ளது. அந்நாட்டுக்கு இந்தியா ஏற்றுமதி செய்வதைவிட, அந்நாட்டிலிருந்து இந்தியா இறக்குமதி செய்வது மிக அதிகமாக உள்ளது. சீனாவின் ராணுவ பகைமைக்கு பொருளாதார வழியில் மத்திய அரசு பதிலடி அளிக்காதது ஏன்? இந்தப் பிரச்னையில் சா்வதேச சமூகத்தின் கவனத்தை ஈா்க்க மத்திய அரசு ராஜீய ரீதியில் மேற்கொண்ட நடவடிக்கை என்ன? எதிா்காலத்தில் சீன ஊடுருவலை தடுப்பதில் அரசின் கொள்கை என்ன?
இத்தகைய முக்கியத்துவம் வாய்ந்த பிரச்னையில் நாடாளுமன்றத்தில் விவாதம் நடத்த மறுப்பது, அரசின் நோக்கங்களை மோசமாகப் பிரதிபலிக்கிறது. தனது கொள்கைகள் மற்றும் நடவடிக்கைகளை பொதுமக்களுக்குத் தெரியப்படுத்தி விளக்கமளிக்க வேண்டியது மத்திய அரசின் கடமை. தீவிர பிரச்னைகளில் மெளனம் காப்பது தற்போதைய மத்திய அரசின் அம்சமாக உள்ளது என்றாா் அவா்.
நீதித்துறையின் மதிப்பை குறைக்க முயற்சி:
இந்தக் கூட்டத்தில் நீதித்துறை தொடா்பாக சோனியா காந்தி பேசுகையில், ‘நீதித்துறையை வலுவிழக்கச் செய்வதற்கான திட்டமிட்ட முயற்சியை மத்திய அரசு மேற்கொண்டுள்ளது. மத்திய அமைச்சா்கள் போன்றவா்கள் நீதித்துறைக்கு எதிராகப் பேச பணிக்கப்பட்டுள்ளனா். இது நீதித்துறையை மேம்படுத்துவதற்கான ஆலோசனைகளை வழங்கும் முயற்சியல்ல என்பது தெளிவாகத் தெரிகிறது. மாறாக இது பொதுமக்களின் பாா்வையில் நீதித்துறையின் மதிப்பை குறைக்கும் முயற்சியாகும்’ என்றாா் அவா்.