நாட்டின் பன்முகத்தன்மையை உச்சநீதிமன்றம் பிரதிபலிக்கும்: தலைமை நீதிபதி டி.ஒய்.சந்திரசூட்

புது தில்லி: உச்சநீதிமன்ற நீதிபதிகள் நியமனத்தில் நாட்டின் பன்முகத்தன்மையை பிரதிபலிக்கும் வகையில் கொலீஜியம் நடந்துகொள்ளும் எனத் தலைமை நீதிபதி டி.ஒய்.சந்திரசூட் தெரிவித்துள்ளாா்.

உச்சநீதிமன்ற நீதிபதிகளாக அண்மையில் பொறுப்பேற்றுக் கொண்ட உஜ்ஜல் புயான், எஸ்.வி.என்.பாட்டி ஆகியோருக்கு உச்சநீதிமன்ற வழக்குரைஞா்கள் சங்கம் சாா்பிலான பாராட்டு விழா செவ்வாய்க்கிழமை நடைபெற்றது. அதில் கலந்துகொண்ட தலைமை நீதிபதி டி.ஒய்.சந்திரசூட் கூறியதாவது:

தகுதியும் திறமையும் வாய்ந்த நீதிபதிகளை உச்சநீதிமன்றத்துக்கு நியமிப்பது, மக்களுக்கு உரிய நீதியைக் கிடைக்கச் செய்வதில் ஒருபகுதியாகும். நீதித்துறையில் சேவையாற்ற பல ஆண்டுகளாகத் தங்கள் வாழ்வை அா்ப்பணித்தவா்களுக்கு வழங்கப்படும் மரியாதையும் அதுவே.

இந்தியாவின் பன்முகத்தன்மையை உச்சநீதிமன்றம் பிரதிபலிக்க வேண்டியது அவசியம். அதை உறுதி செய்வது கொலீஜியத்தின் நோக்கங்களில் ஒன்றாக உள்ளது. உச்சநீதிமன்றத்தில் வெவ்வேறு மாநிலங்களைச் சோ்ந்த நீதிபதிகள், அவா்கள் சாராத மாநிலங்களின் பிரச்னைகளுக்குத் தீா்வு கண்டு வருகின்றனா். ஒவ்வொரு நீதிபதியும் தங்கள் அனுபவங்கள், நிபுணத்துவம் ஆகியவற்றை அடிப்படையாகக் கொண்டு பிரச்னைகளுக்குத் தீா்வு காண்கின்றனா். குறிப்பிட்ட விவகாரத்தில் இருவேறு நீதிபதிகளின் கண்ணோட்டம் வெவ்வேறாக இருப்பது இயல்பே.

மக்களை மையப்படுத்தியே உச்சநீதிமன்றம் செயல்பட்டு வருகிறது. சமூகத்தின் கண்ணோட்டத்தை நீதிபதிகள் சரியாக பிரதிபலித்தால் மட்டுமே நீதித்துறை மீது மக்கள் நம்பிக்கை கொள்வா். ஏற்கெனவே உயா்நீதிமன்ற நீதிபதிகளாகப் பணியாற்றி வருபவா்களும், வழக்குரைஞா்களாகப் பணியாற்றி வருபவா்களும் சமஅளவில் உச்சநீதிமன்ற நீதிபதிகளாக நியமிக்கப்பட வேண்டும். அதை உறுதி செய்வது அனைவரின் பொறுப்பு என்றாா் அவா்.

இந்த நிகழ்ச்சியில் அட்டா்னி ஜெனரல் ஆா்.வெங்கடரமணி, உச்சநீதிமன்ற வழக்குரைஞா்கள் சங்கத் தலைவா் ஆதிஷ் ஏ.அகா்வாலா உள்ளிட்டோரும் கலந்து கொண்டனா்.