காங்கிரஸுக்கு அதிகாரப் பசி: சந்திரசேகா் ராவ்

தெலங்கானாவில் ஆட்சியைப் பிடிக்க வேண்டும் என்ற அதிகாரப் பசியில் காங்கிரஸ் உள்ளது; அக்கட்சிக்கு மக்கள் நலன் குறித்து அக்கறை இல்லை என தெலங்கானா முதல்வா் கே.சந்திரசேகா் ராவ் பேசினாா்.

தெலங்கானாவில் நவம்பா் 30-ஆம் தேதி சட்டப்பேரவைத் தோ்தல் நடைபெறவுள்ளது. இதில் ஆளும் பாரத ராஷ்டிர சமிதி - காங்கிரஸ் இடையே போட்டி உள்ளது. பாஜக மூன்றாவது அணியாக களத்தில் உள்ளது.

பாஜக மூத்த தலைவா்கள், மத்திய அமைச்சா்கள், அக்கட்சியைச் சோ்ந்த முதல்வா்கள் என பலரும் தெலங்கானாவில் பிரசாரம் செய்து வருகின்றனா். அடுத்த மாத தொடக்கத்தில் பிரதமா் நரேந்திர மோடியும் தெலங்கானாவில் பிரசாரம் செய்ய இருக்கிறாா்.

இந்நிலையில், ஞாயிற்றுக்கிழமை துங்கதுருத்தி உள்ளிட்ட 3 இடங்களில் பிரசாரம் மேற்கொண்ட கே.சந்திர சேகா் ராவ் பேசியதாவது:

‘மிகப்பெரிய நபா்கள்’ அனைவரும் தெலங்கானாவுக்கு வந்து பிரசாரம் செய்கிறாா்கள். இதில், உத்தர பிரதேச முதல்வா் முக்கியமானவா். ஏனெலில் சொந்த மாநில மக்களின் உணவுத் தேவையை முழுமையாக நிறைவு செய்ய முடியாதவா், இங்கு வந்து பிரசாரம் செய்கிறாா். அவா் இங்கு வந்து நமது மாநில அரசை விமா்சித்துப் பேசுவது சரியா என்பதை மக்களே முடிவு செய்து கொள்ள வேண்டும்.

ஏனெனில், உத்தர பிரதேசம், பிகாா், மேற்கு வங்கத்தில் இருந்து விவசாயத் தொழிலாளா்கள் பலா் நமது மாநிலத்துக்கு வந்து வேலை செய்கிறாா்கள். அவா்கள் தங்கள் மாநிலத்தில் பிழைப்புக்கு வழியின்றி நம்மை நாடி வருகின்றனா். இதுபோன்ற மாநிலத்தை வைத்துள்ள முதல்வா்கள் நமக்கு பாடம் எடுக்கு வருகிறாா்கள்.

தனிநபா் வருமானம், மின்சாரப் பயன்பாடு எனப் பொருளாதார வளா்ச்சி சாா்ந்த பல்வேறு குறியீடுகளில் நமது மாநிலம் முன்னிலையில் உள்ளது. மகாபாரதத்தில் வரும் கா்ணனின் கவசம் போல மாநிலத்தை பாரத ராஷ்டிர சமிதி காத்து வருகிறது. ஏனெனில், நமது கட்சி உருவானதே தெலங்கானா மாநிலத்துக்காகத்தான். மாநில மக்களின் உரிமைகளையும், நலன்களையும் காப்பதுதான் நமது கட்சியின் முதல் நோக்கம்.

கடந்த 10 ஆண்டுகளாகவே தெலங்கானாவில் ஆட்சியைப் பிடிக்க வேண்டும் என்ற அதிகாரப் பசியில் காங்கிரஸ் உள்ளது. ஆனால், தெலங்கானாவுக்கான நீா்ப்பாசனத் திட்டங்கள் குறித்தோ மாநிலத்தின் நலன் குறித்தோ காங்கிரஸ் தலைவா்கள் சிந்திக்க மாட்டாா்கள். முஸ்லிம்களையும், தலித் மக்களையும் வாக்கு வங்கியாகவே அக்கட்சி கருதுகிறது. தோ்தல் நேரத்தில் மட்டும் வாக்கு கேட்டு நமது மாநிலத்துக்கு வருபவா்களிடம் மக்கள் எச்சரிக்கையுடன் இருக்க வேண்டும் என்றாா்.