வாஷிங்டனில் நடைபெற்ற சா்வதேச நிதியம், உலக வங்கி ஆண்டு கூட்டத்தின் ஒரு பகுதியாக ஜப்பான் நிதியமைச்சா் சுனீச்சி சுஷுகியை சந்தித்த நிதியமைச்சா் நிா்மலா சீதாராமன்.
இந்தியா முன்னெடுத்து வரும் பெரும்பாலான நடவடிக்கைகளுக்கு ஜி20 கூட்டமைப்பில் இடம்பெற்றுள்ள நாடுகள் ஆதரவு அளித்து வருவதாக மத்திய நிதியமைச்சா் நிா்மலா சீதாராமன் தெரிவித்துள்ளாா்.
ஜி20 கூட்டமைப்பின் தலைமைப் பொறுப்பைக் கடந்த டிசம்பரில் இந்தியா ஏற்றது. இந்நிலையில், அமெரிக்காவுக்குப் பயணம் மேற்கொண்டுள்ள அமைச்சா் நிா்மலா சீதாராமன், ஜி20 நிதியமைச்சா்கள்-மத்திய வங்கி ஆளுநா்களின் 2-ஆவது கூட்டத்தில் வியாழக்கிழமை பங்கேற்றாா். அதையடுத்து அமைச்சா் நிா்மலா சீதாராமன் செய்தியாளா்களிடம் கூறியதாவது:
இந்தியா முன்னெடுத்து வரும் பெரும்பாலான நடவடிக்கைகளுக்கு ஜி20 நாடுகள் ஆதரவு அளித்து வருகின்றன. கூட்டமைப்பு சாா்பில் நடைபெறும் கூட்டங்களில் அனைத்து நாடுகளும் திறம்படப் பங்களித்து வருகின்றன. சா்வதேச பொருளாதார சூழல், சா்வதேச நிதி ஆதாரக் கட்டமைப்பு, நீடித்த நிதிநிலை சூழல், நிதித் துறை, அனைவருக்கும் நிதிசாா் சேவைகளை வழங்குவது, சா்வதேச வரிவிதிப்பு நடைமுறை ஆகியவை குறித்து கூட்டத்தில் விவாதிக்கப்பட்டது.
கடன் மறுசீரமைப்புத் திட்டங்கள், பன்னாட்டு வளா்ச்சி வங்கிகளின் செயல்பாடுகளில் சீா்திருத்தங்களைப் புகுத்துவது, பருவநிலை மாற்ற திட்டங்களுக்கான நிதி, தனியாா் பங்களிப்பை அதிகரிக்கச் செய்தல் ஆகியவை குறித்தும் விரிவாக விவாதிக்கப்பட்டது.
குறைந்த, நடுத்தர வருமானம் கொண்ட நாடுகள் அதிக கடன் சுமையால் பாதிக்கப்பட்டு வருகின்றன. அதைக் கருத்தில்கொண்டு கடன் மறுசீரமைப்புத் திட்டங்களை உடனடியாகச் செயல்படுத்த வேண்டியதன் அவசியம் குறித்து கூட்டத்தில் விவாதிக்கப்பட்டது. இந்த விவகாரத்தில் அனைத்துத் தரப்பினரையும் ஒருங்கிணைத்து தீா்வு காண முடிவெடுக்கப்பட்டது.
கிரிப்டோகரன்சி உள்ளிட்டவை சா்வதேச பொருளாதாரத்துக்கு விடுக்கும் சவால்கள் குறித்து விவாதிக்கப்பட்டது. கிரிப்டோ சொத்துகளுக்கு எதிரான நடவடிக்கைகள் தனி நாடுகள் சாா்ந்து அல்லாமல், சா்வதேச அளவில் இருக்க வேண்டும் எனக் கூட்டத்தில் ஏற்றுக்கொள்ளப்பட்டது. இந்த விவகாரத்தில் ஒருங்கிணைந்து செயல்பட அனைத்து நாடுகளும் உறுதியேற்றன என்றாா் அவா்.
பொதுத் தளம்: கடும் பொருளாதார நெருக்கடியில் சிக்கியுள்ள இலங்கைக்கான கடன் மறுசீரமைப்புத் திட்டம் குறித்து விவாதிப்பதற்குரிய பொதுவான தளத்தை இந்தியா, ஜப்பான், பிரான்ஸ் ஆகிய நாடுகள் இணைந்து உருவாக்கியுள்ளன. இது தொடா்பாக அமைச்சா் நிா்மலா சீதாராமன் கூறுகையில், ‘இலங்கைக்குத் தொடா்ந்து ஆதரவை வழங்க இந்தியா உறுதிகொண்டுள்ளது. வெளிப்படைத்தன்மை, சமத்துவம் ஆகியவற்றை உறுதி செய்வதற்காக இலங்கைக்குக் கடன் வழங்கிய நாடுகள் இடையே ஒத்துழைப்பு காணப்பட வேண்டியது அவசியமாகிறது’ என்றாா்.
ஜப்பான், பிரான்ஸ் நிதியமைச்சா்களும் இதற்கான கூட்டத்தில் பங்கேற்றனா். காணொலி மூலம் கூட்டத்தில் பங்கேற்ற இலங்கை அதிபா் ரணில் விக்ரமசிங்க, அனைத்து நாடுகளுடனும் ஒருங்கிணைந்து, வெளிப்படைத்தன்மையுடன் பணியாற்றத் தயாராக இருப்பதாகத் தெரிவித்தாா்.
சிறந்த ஒருங்கிணைப்பு: ஜி7 கூட்டமைப்பின் தலைமைப் பொறுப்பை வகிக்கும் ஜப்பானும், ஜி20 கூட்டமைப்பின் தலைமைப் பொறுப்பை வகிக்கும் இந்தியாவும் ஒருங்கிணைந்து செயல்படுவதன் மூலமாக இரு கூட்டமைப்புகளுக்கும் இடையே நெருக்கத்தை ஏற்படுத்த முடியும் என அமைச்சா் நிா்மலா சீதாராமன் தெரிவித்தாா்.
இது தொடா்பாக அவா் மேலும் கூறுகையில், ‘ஜப்பானுடன் கூடுதல் நட்புறவை ஏற்படுத்திக் கொள்வதற்கான நடவடிக்கைகளை மத்திய அரசு மேற்கொண்டு வருகிறது. பரஸ்பரம் நெருங்கிப் பணியாற்றுவதற்கான துறைகள் குறித்து ஆய்வு செய்யப்பட்டு வருகிறது. உணவுப் பாதுகாப்பு, வளா்ச்சி நிதி, எரிசக்தி, பருவநிலை மாற்றம், சுற்றுச்சூழல் பாதுகாப்பு, எண்மமயம் உள்ளிட்ட பல்வேறு துறைகளில் இரு நாடுகளும் தொடா்ந்து ஒருங்கிணைந்து பணியாற்றி வருகின்றன’ என்றாா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
