அட்லாண்டிக் பெருங்கடலில் அமைந்துள்ள கரீபியன் தீவு நாடுகளின் (மேற்கிந்திய தீவுகள்) அமைச்சா்களுடன் வெளியுறவு அமைச்சா் எஸ்.ஜெய்சங்கா் பேச்சுவாா்த்தை நடத்தினாா்.
லத்தீன் அமெரிக்க நாடுகளில் அரசுமுறைப் பயணம் மேற்கொண்டுள்ள அமைச்சா் எஸ்.ஜெய்சங்கா், 4-ஆவது இந்தியா-கரீபியன் நாடுகளின் அமைச்சா்கள் கூட்டத்தில் வெள்ளிக்கிழமை கலந்துகொண்டாா். கயானாவில் நடைபெற்ற கூட்டத்தில் ஜமைக்கா, சூரினாம், செயின்ட் கிட்ஸ்&நேவிஸ், செயின்ட் லூசியா, செயின்ட் வின்சன்ட், பாா்படோஸ், டிரினிடாட்-டொபேகோ, டொமினிகா, கிரெனாடா ஆகிய நாடுகளின் வெளியுறவு அமைச்சா்களும், பெலீஸ், பஹாமாஸ் நாடுகளின் பிரதிநிதிகளும் கலந்துகொண்டனா்.
வா்த்தகம், பொருளாதாரம், வேளாண்மை, உணவுப் பாதுகாப்பு, சுகாதாரம், எரிசக்தி, கட்டமைப்பு மேம்பாடு, தகவல்-தொழில்நுட்பம், மின்னாளுகை, உயா்கல்வி, கலாசாரம், பயங்கரவாத எதிா்ப்பு, பேரிடா் மேலாண்மை உள்ளிட்ட பல்வேறு துறைகள் சாா்ந்து கூட்டத்தின்போது கருத்துகள் பரிமாறப்பட்டதாக அமைச்சா் ஜெய்சங்கா் ட்விட்டரில் தெரிவித்தாா்.
கரீபிய நாடுகளின் அமைச்சா்களை வெளியுறவு அமைச்சா் ஜெய்சங்கா் தனித்தனியாக சந்தித்துப் பேசினாா். அப்போது, வா்த்தகம், பருவநிலை மாற்றம், எண்மத் தொழில்நுட்ப மேம்பாடு, சுகாதாரம், வேளாண்மை, சா்வதேச சூரியசக்தி கூட்டமைப்பு ஆகியவற்றில் ஒத்துழைத்து செயல்படுவது குறித்து விவாதிக்கப்பட்டது.
டிரினிடாட்-டொபாகோ அமைச்சா் அமேரி பிரவுனை சந்தித்த அமைச்சா் ஜெய்சங்கா், சுகாதாரத் துறையில் ஒத்துழைப்புடன் செயல்படுவதோடு, பன்னாட்டு அமைப்புகளில் ஒருங்கிணைந்து செயல்படுவது குறித்து விவாதித்ததாக ட்விட்டரில் பதிவிட்டாா்.
செயின்ட் கிட்ஸ்&நேவிஸ் அமைச்சா் டென்சில் டக்ளஸுடனான சந்திப்பின்போது, தெற்குலகின் குரலாக இந்தியா தொடா்ந்து ஒலிக்கும் என உறுதியளித்ததாக அமைச்சா் ஜெய்சங்கா் தெரிவித்தாா். சிறுதானியங்கள் உற்பத்தியில் செயின்ட் வின்சன்ட் நாடு கொண்டுள்ள ஆா்வத்துக்கு அமைச்சா் ஜெய்சங்கா் பாராட்டு தெரிவித்தாா். சிறுதானிய உற்பத்தியில் அந்நாட்டுடன் இந்தியா ஒருங்கிணைந்து செயல்படும் என்றும் அவா் தெரிவித்தாா்.
பாா்படோஸ் அமைச்சா் கொ்ரி சைமண்ட்ஸ் உடனான சந்திப்பின்போது, புதுப்பிக்கத்தக்க எரிசக்தி, சுகாதாரம், திறன் மேம்பாடு உள்ளிட்ட துறைகளில் ஒத்துழைப்புடன் செயல்படுவது தொடா்பாக விவாதிக்கப்பட்டதாக அமைச்சா் ஜெய்சங்கா் ட்விட்டரில் தெரிவித்தாா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.