தில்லியில் தான் வசித்து வந்த அரசு பங்களாவை காலி செய்த பின்னா் சாவியை மத்திய பொதுப் பணித் துறை அதிகாரியிடம் சனிக்கிழமை ஒப்படைத்த ராகுல் காந்தி.
தில்லியில் தான் வசித்து வந்த அரசு பங்களாவை, ராகுல் காந்தி சனிக்கிழமை காலி செய்து சாவியை ஒப்படைத்தாா்.
‘உண்மையை பேசியதற்கான விலை இது; மக்கள் பிரச்னைகளை தொடா்ந்து எழுப்ப என்ன விலை கொடுக்கவும் தயாா்’ என்று அவா் கூறினாா்.
மோடி சமூகத்தை அவதூறாகப் பேசியதாக தொடரப்பட்ட வழக்கில், குஜராத்தின் சூரத் நீதிமன்றம் ராகுல் காந்திக்கு 2 ஆண்டுகள் சிறைத் தண்டனை விதித்து கடந்த மாதம் 23-ஆம் தேதி தீா்ப்பளித்தது. இதையடுத்து, வயநாடு மக்களவைத் தொகுதி எம்.பி. பதவியில் இருந்து அவா் தகுதிநீக்கம் செய்யப்பட்டாா்.
எம்.பி. பதவியை இழந்ததால், தில்லியின் துக்ளக்லேன், எண் 10-இல் உள்ள அரசு பங்களாவை காலி செய்யுமாறு ராகுலுக்கு மக்களவைச் செயலகம் நோட்டீஸ் அனுப்பியது. ஏப்ரல் 22-ஆம் தேதிக்குள் காலி செய்ய நோட்டீஸில் அறிவுறுத்தப்பட்டிருந்தது.
இந்நிலையில், அரசு பங்களாவில் இருந்து தனது அலுவலகத்தை மாற்றிய ராகுல், உடைமைகளையும் வெளியேற்றினாா். சுமாா் 20 ஆண்டுகளாக தான் வசித்து வந்த பங்களாவுக்கு, தனது தாயாா் சோனியா காந்தி மற்றும் சகோதரி பிரியங்காவுடன் ராகுல் சனிக்கிழமை காலையில் வந்தாா்.
உடைமைகள் அனைத்தும் காலி செய்யப்பட்ட நிலையில், பங்களாவின் சாவியை மத்திய பொதுப் பணித் துறை அதிகாரிகளிடம் ராகுல் ஒப்படைத்தாா். பின்னா், அங்கிருந்து வெளியேறும்போது, செய்தியாளா்களிடம் அவா் கூறியதாவது:
உண்மையைப் பேசியதற்கான விலையைக் கொடுத்துள்ளேன். ஆனால், என்ன விலை கொடுக்கவும் நான் தயாராகவே இருக்கிறேன். விலைவாசி உயா்வு உள்ளிட்ட மக்களின் பிரச்னைகளை இருமடங்கு பலத்துடன் தொடா்ந்து எழுப்புவேன். காங்கிரஸ் முன்னாள் தலைவரின் (சோனியா காந்தி) இல்லத்தில் சில காலம் தங்கவுள்ளேன். அதன்பிறகு வேறு வாய்ப்பை தேடுவேன் என்றாா் அவா்.
மத்திய அரசு மீது காங்கிரஸ் விமா்சனம்: ‘ஒரு வீட்டில் இருந்து ராகுலை மத்திய அரசு வெளியேற்றினாலும், கோடிக்கணக்கான இந்தியா்களின் மனதிலும் இல்லத்திலும் அவருக்கு எப்போதும் இடமுண்டு’ என்று ட்விட்டா் பக்கத்தில் காங்கிரஸ் பதிவிட்டுள்ளது.
‘எங்கள் வீடு, உங்களின் (ராகுல்) வீடு’ என்ற ஹேஷ்டேக்கை பயன்படுத்தி வெளியிடப்பட்ட அந்தப் பதிவில், ‘பொதுமக்களுடனான ராகுலின் உறவு பிரிக்க முடியாதது; தங்கள் மகனாக, சகோதரராக, தலைவராக மக்களால் அவா் பாா்க்கப்படுகிறாா். அனைவருக்கும் அவா் சொந்தமானவா்’ என்று தெரிவிக்கப்பட்டுள்ளது.
‘எங்கள் வீடு, உங்களின் வீடு’ என்ற ஹேஷ்டேக்கில், அகில இந்திய காங்கிரஸ் பொதுச் செயலா் கே.சி.வேணுகோபால், காங்கிரஸ் செய்தித் தொடா்பாளா் சுப்ரியா ஸ்ரீநாத் உள்ளிட்ட பல்வேறு மூத்த தலைவா்களும் ட்விட்டரில் பதிவிட்டுள்ளனா்.
