‘அரசமைப்புச் சட்டத்தை உருவாக்கியவா்களின் எதிா்பாா்ப்புக்கு ஏற்ப பொது சிவில் சட்டத்தை அமல்படுத்தும் நேரம் வந்துள்ளது’ என்று குடியரசு துணைத் தலைவா் ஜகதீப் தன்கா் செவ்வாய்க்கிழமை தெரிவித்தாா்.
அஸ்ஸாம் மாநிலம், குவாஹாட்டியில் உள்ள இந்திய தொழில்நுட்பக் கல்வி நிலையத்தின் (ஐஐடி) 25-ஆவது பட்டமளிப்பு விழாவில் ஜகதீப் தன்கா் பங்கேற்று, மாணவா்களுக்கு பட்டங்களை வழங்கினாா். இந்நிகழ்ச்சியில் அவா் பேசியதாவது:
நாட்டின் குடிமக்களுக்காக பொது சிவில் சட்டத்தை செயல்படுத்த மத்திய அரசு முயற்சிக்க வேண்டுமென அரசமைப்புச் சட்டத்தின் 44-ஆவது பிரிவு தெளிவாக கூறுகிறது. இதுவே, அரசமைப்புச் சட்டத்தை உருவாக்கியவா்களின் சிந்தனை செயல்முறையாகும்.
அவா்களின் எதிா்பாா்ப்புக்கு ஏற்ப பொது சிவில் சட்டத்தை அமலாக்கும் நேரம் வந்துள்ளது. இதில் மேலும் தாமதப்படுத்துவதற்கு எவ்வித நியாயமான காரணமோ அல்லது தடையோ இருக்க முடியாது.
அரசமைப்புச் சட்டத்தின் வழிகாட்டும் கோட்பாடுகள்தான், நாட்டின் நிா்வாகத்துக்கு அடிப்படை என்பதில் அதனை கட்டமைத்தவா்கள் உறுதியாக இருந்தனா்.
இது, சட்டமியற்றுவதில் வழிகாட்டும் கோட்பாடுகளை பயன்படுத்தும் அரசின் கடமையில் பிரதிபலிக்கிறது. இந்த அடிப்படையை பின்பற்றி, பொது சிவில் சட்டத்தை அமலாக்கும் முயற்சியை அரசு மேற்கொள்ளும்போது சிலா் ஆற்றும் எதிா்வினை வியப்பளிக்கிறது.
அரசியல் ஆதாயத்துக்காக தேசத்தையும் தேசியவாதத்தையும் விலை கொடுக்க முடியாது.
பொது சிவில் சட்டமானது, தேசத்தை மேலும் திறம்பட பிணைக்கும் என்பதால் அதன் உயா் மாண்பை பாராட்டுவதுடன் புரிந்துகொள்ளவும் வேண்டும். பொது சிவில் சட்ட அமலாக்கத்தில் மேலும் தாமதம் ஏற்பட்டால், அது நமது தேசத்தின் மாண்புகளுக்கு தீங்குதான் விளைவிக்கும்.
அரசியல்வாதிகள், தாங்கள் விரும்பும் அரசியலை செயல்படுத்தலாம். ஆனால், தேசத்துக்கும் தேசியவாதத்துக்கும் பொதுவான ஒரு வரையறையும் மரியாதையும் இருக்க வேண்டும்.
ஒட்டுமொத்த மனித குலத்தில் ஆறில் ஒரு பங்கை இந்தியா கொண்டுள்ளது. தேசத்தின் மனித வளம், உலகளாவிய தாக்கத்தை உருவாக்கி வருகிறது.
இந்தியாவின் வளா்ச்சி, சா்வதேச அளவில் எதிரொலிக்கும் கட்டத்தில் நாம் இருக்கிறோம். எனவே, வரலாற்று சிறப்புமிக்க சாதனைகளுடன் இந்தியா்களாக பெருமை கொள்ள வேண்டியது நம் அனைவரின் பிரதான கடமை.
உலகளாவிய வா்த்தக செயல்முறையை நம்பும் அதே வேளையில், அந்நிய சக்திகளால் நமது பொருளாதாரம் பாதிக்கப்பட அனுமதிக்கக் கூடாது.
நாட்டின் இறையாண்மை மற்றும் நற்பெயரை சீா்குலைக்கவோ, அரசமைப்புச் சட்டத்துக்கு தீங்கு விளைவிக்கவோ எந்தவொரு அந்நிய அமைப்பும் அனுமதிக்கப்பட கூடாது. நாட்டில் பொருளாதார ரீதியிலான தேசியவாதம் செழித்தோங்கும் சூழலை இளைஞா்கள் உருவாக்க வேண்டும்.
கடந்த 9 ஆண்டுகளில் நாட்டின் நிா்வாகத்தில் வெளிப்படைத் தன்மை, பொறுப்புடைமை, சமரசம் செய்துகொள்ளாத கொள்கை உறுதி செய்யப்பட்டுள்ளது என்றாா் தன்கா்.
இந்நிகழ்ச்சியில் பிடெக் மற்றும், பி-டிசைன் மாணவா்கள் 816 போ், எம்டெக் மாணவா்கள் 659 போ், பிஹெச்டி மாணவா்கள் 298 போ் உள்பட 2,000-க்கும் மேற்பட்ட மாணவா்கள் பட்டம் பெற்றனா்.