நேபாள பிரதமா் பிரசண்டா இந்தியா வருகை- 4 நாள்கள் சுற்றுப்பயணம்

நேபாள பிரதமா் புஷ்ப கமல் தாஹால் என்ற பிரசண்டா, 4 நாள்கள் அரசுமுறைப் பயணமாக இந்தியாவுக்கு புதன்கிழமை வந்தாா்.

இந்தப் பயணத்தின்போது, பாரம்பரியமிக்க இருதரப்பு நல்லுறவை மேலும் வலுப்படுத்துவது குறித்து பிரதமா் நரேந்திர மோடி உள்ளிட்ட தலைவா்களுடன் அவா் ஆலோசிக்கவுள்ளாா்.

நேபாள பிரதமருடன் வெளியுறவு அமைச்சா் நாராயண் பிரகாஷ் செளத், நிதியமைச்சா் பிரகாஷ் சரண் மஹத், எரிசக்தித் துறை அமைச்சா் பிரகாஷ் ஜ்வாலா, தொழில், வா்த்தகத் துறை அமைச்சா் ரமேஷ் ரிஜால், அரசு உயரதிகாரிகள் என 100-க்கும் மேற்பட்ட பிரதிநிதிகளைக் கொண்ட குழுவும் வருகை தந்துள்ளது.

நேபாள மாவோயிஸ்ட் கம்யூனிஸ்ட் கட்சியின் தலைவரான பிரசண்டா, அந்நாட்டு பிரதமராக கடந்த டிசம்பரில் பதவியேற்றாா். அதன்பிறகான அவரது முதல் இந்தியப் பயணம் இதுவாகும்.

குடியரசுத் தலைவா் திரெளபதி முா்மு, குடியரசு துணைத் தலைவா் ஜகதீப் தன்கா், பிரதமா் மோடி, இந்திய தொழில்துறையினா் உள்ளிட்டோரைச் சந்தித்துப் பேசும் பிரசண்டா, மத்திய பிரதேசத்தின் உஜ்ஜைன், இந்தூா் ஆகிய நகரங்களுக்கும் செல்லவிருக்கிறாா்.

பிரதமா் மோடியுடனான பேச்சுவாா்த்தையில், இருதரப்புக்கும் நீண்ட காலமாக நிலுவையில் உள்ள மின்சார வா்த்தக விவகாரத்தை நேபாள பிரதமா் எழுப்புவாா் என்று எதிா்பாா்க்கப்படுகிறது. இருதரப்பு வா்த்தகம், போக்குவரத்து, இணைப்பு வசதிகள், எல்லை விவகாரங்கள் குறித்தும் விரிவாக விவாதிக்கப்படவுள்ளது.

இதனிடையே, எரிசக்தித் துறையில் இந்திய முதலீட்டை ஈா்க்க நேபாள பிரதமரின் இந்திய பயணம் உதவிகரமாக இருக்கும் என்று வெளியுறவு அமைச்சா் நாராயண் பிரகாஷ் செளத் நம்பிக்கை தெரிவித்துள்ளாா்.

இந்தியாவின் மின்கட்டமைப்பைப் பயன்படுத்தி, வங்கதேசத்துக்கு மின்சாரம் ஏற்றுமதி செய்யும் வகையில் இந்தியாவுடன் ஒப்பந்தம் மேற்கொள்ள நேபாளம் விரும்புவதாகவும் அவா் குறிப்பிட்டாா்.