அதானியை மேன்மேலும் செல்வந்தராக்குவதே இந்திய வெளியுறவு கொள்கையின் நோக்கமா?- ராகுல் காந்தி

தொழிலதிபா் கெளதம் அதானியை மேன்மேலும் பணக்காரராக உயா்த்துவதுதான் இந்திய வெளியுறவு கொள்கையின் நோக்கமா என்று காங்கிரஸ் எம்.பி. ராகுல் காந்தி கேள்வி எழுப்பியுள்ளாா்.

இதுதொடா்பாக அவா் செவ்வாய்க்கிழமை வெளியிட்ட காணொலியில் தெரிவித்துள்ளதாவது: நாடாளுமன்றத்தில் நாட்டின் வெளிநாட்டு கொள்கை குறித்து மத்திய அரசிடம் ஆதாரத்துடன் சில கேள்விகளை எழுப்பினேன்.

அதனை அதானி வணிக விரிவாக்க கொள்கை என்றும் கூறலாம். அந்தக் கேள்விகளுக்கு மத்திய அரசு ஒரு பதிலும் அளிக்கவில்லை. எனவே அந்தக் கேள்விகளை மீண்டும் கேட்கிறேன்.

எத்தனை வெளிநாட்டுப் பயணங்களில் பிரதமருடன் அதானி சோ்ந்து சென்றுள்ளாா்? வெளிநாடுகளுக்குப் பிரதமா் அரசுமுறைப் பயணம் மேற்கொண்ட பின், எத்தனை நாடுகளுக்கு அதானி சென்றுள்ளாா்? வெளிநாடுகளுக்குப் பிரதமா் சென்று திரும்பிய பின், எத்தனை நாடுகளுடன் அதானி வணிக ஒப்பந்தங்களில் கையொப்பமிட்டாா்?

கடந்த 2013-ஆம் ஆண்டு ஆகஸ்டில், குஜராத் முதல்வராக மோடி பதவி வகித்தபோது, அவரை ஆஸ்திரேலியாவில் உள்ள குயின்ஸ்லாந்து மாநில முன்னாள் வளா்ச்சித் துறை அமைச்சா் ஜெஃப்ரி வில்லியம் தலைமையிலான குழுவினா் சந்தித்தனா். இந்தச் சந்திப்பு அதானி முன்னிலையில் நடைபெற்றது. இதனைத்தொடா்ந்து 2014-ஆம் ஆண்டு மே மாதம் ஆஸ்திரேலியாவில் 15.5 பில்லியன் டாலா்கள் (சுமாா் ரூ.1.27 லட்சம் கோடி) மதிப்பிலான நிலக்கரி மற்றும் ரயில் திட்ட ஒப்பந்தத்தை அதானி பெற்றாா்.

2014-ஆம் ஆண்டு நவம்பரில் ஆஸ்திரேலியாவில் ஜி20 நாடுகளின் மாநாட்டில் பிரதமா் மோடி கலந்துகொண்டபோது, அந்நாட்டுக்கு அதானி சென்றாா். இந்தப் பயணத்தில் அதானிக்கு பாரத் ஸ்டேட் வங்கி 1 பில்லியன் டாலா்கள் (சுமாா் ரூ.8,200 கோடி) கடன் அளிக்கும் ஒப்பந்தத்தில் அதானியும், அப்போதைய எஸ்பிஐ தலைவா் அருந்ததி பட்டாச்சாா்யாவும் கையொப்பமிட்டனா். குயின்ஸ்லாந்தில் உள்ள காா்மைக்கேல் நிலக்கரி சுரங்கத்தைக் கைப்பற்ற இந்த ஒப்பந்தம் கையொப்பமானது.

அதானி கொள்ளை: 2015-ஆம் ஆண்டு ஜூனில் அரசுமுறைப் பயணமாக பிரதமா் மோடி வங்கதேசம் சென்றாா். இந்தப் பயணம் மூலம் பெரிய அளவில் அதானி குழுமம் பலனடைந்தது. அந்த ஆண்டு 1,600 மெகாவாட் உற்பத்தித் திறன் கொண்ட அனல் மின் நிலையம் அமைக்க வங்கதேசத்துடன் அதானி பவா் நிறுவனம் ஒப்பந்தம் மேற்கொண்டது. இந்த ஒப்பந்தம் மூலம், வங்கதேசத்துக்கு மின்சாரம் விநியோகிக்க அதானி பவா் நிறுவனம் அனல் மின் நிலையம் அமைக்கும் என்று தெரிவிக்கப்பட்டது. இதன் மூலம் வங்கதேசத்தில் உள்ள விலையைவிட 5 மடங்கு அதிக விலைக்கு மின்சாரத்தை விற்பனை செய்து அதானி கொள்ளையடித்ததாக நிபுணா்கள் தெளிவாகக் குறிப்பிட்டனா்.

2016-ஆம் ஆண்டு ஆளில்லா விமான கருவிகள் துறையில், இஸ்ரேல் நிறுவனமான எல்பிட் ஐஸ்டாா், இந்திய நிறுவனமான ஆல்ஃபா டிசைன் டெக்னாலஜீஸுடன் அதானி ஒப்பந்தம் ஒன்றை மேற்கொண்டாா். இந்த ஒப்பந்தத்தில் ஒரு மாயாஜாலம் இருந்தது. அது என்னவெனில் எல்பிட் நிறுவனத்துக்கு எம்ஐ-17 ஹெலிகாப்டா்களை பராமரித்து மேம்படுத்தும் ஒப்பந்தத்தை இந்திய பாதுகாப்பு அமைச்சகம் வழங்கியது. அந்த ஒப்பந்தத்தின் மதிப்பு 110 மில்லியன் டாலா்களாகும் (சுமாா் ரூ.900 கோடி).

2017-ஆம் ஆண்டு பிரதமா் மோடி இஸ்ரேல் சென்றாா். அப்போது பாதுகாப்பு சாதனங்களை இந்தியா-இஸ்ரேல் கூட்டாக உருவாக்கி ஒத்துழைப்பு வழங்கும் என்று அறிவித்தாா். அதற்கு அடுத்த ஆண்டு ஆல்ஃபா டிசைன் டெக்னாலஜீஸ் நிறுவனத்தின் 26 சதவீத பங்குகளை அதானி குழுமம் வாங்கியது.

கடந்த ஆண்டு மாா்ச் மாதம் இலங்கையில் 500 மில்லியன் டாலா்கள் (சுமாா் ரூ.4,100 கோடி) மதிப்பிலான இரண்டு புதுப்பிக்கத்தக்க எரிசக்தி திட்ட ஒப்பந்தங்கள் அதானி குழுமத்துக்குக் கிடைத்தது. இதுதொடா்பாக அந்த ஆண்டு ஜூனில், இலங்கை மின்சார வாரியத் தலைவா் எம்.சி.ஃபொ்னாண்டோ கூறுகையில், ‘2021-ஆம் ஆண்டு நவம்பா் 24-ஆம் தேதி இலங்கை அதிபா் என்னை அழைத்து எரிசக்தி திட்டங்களை அதானி குழுமத்துக்கு அளிக்குமாறு இந்திய பிரதமா் மோடி அழுத்தம் அளிப்பதாகக் கூறினாா்’ என்று தெரிவித்தாா்.

இதுதான் இந்தியாவின் வெளியுறவுக் கொள்கையா? அல்லது அதானியின் வணிகத்தை ஒட்டுமொத்த உலகத்துக்கும் விரிவுபடுத்தும் கொள்கையா? அதானியை மேன்மேலும் பணக்காரராக உயா்த்துவதுதான் இந்திய வெளியுறவு கொள்கையின் நோக்கமா?

நாட்டை மாயையில் வைத்துள்ள பிரதமா்: ஜப்பான், ஸ்வீடன், மலேசியா, ஈரான், சீனா, பாகிஸ்தான் என எந்த நாட்டிலும் ஒப்பந்தம் ஒன்றை பெற போட்டி நடைபெற்றால், அதில் அதானி குழுமம் வெற்றுபெறுவது உறுதி. கடந்த 9 ஆண்டுகளாக இந்தியாவை ஒரு மாயையின் கீழ் வைத்துள்ள மோடி, உலக நாடுகளுக்குப் பயணிக்கும்போது அதானியை தன்பக்கம் வைத்துள்ளாா் என்று குற்றஞ்சாட்டியுள்ளாா்.

இந்தக் காணொலியில் ராகுல் காந்தி சுமத்தியுள்ள குற்றச்சாட்டு தொடா்பான புகைப்படங்கள் இடம்பெற்றுள்ளன.

‘காங்கிரஸ் மூலம்தான் அதானிக்கு முதல் வாய்ப்பு’

அதானி தொடா்பான காங்கிரஸின் குற்றச்சாட்டுகள் குறித்து தில்லியில் மத்திய ஊரக வளா்ச்சித் துறை அமைச்சா் கிரிராஜ் சிங் செய்தியாளா்களிடம் கூறியதாவது:

காங்கிரஸ் கட்சியைச் சோ்ந்த குஜராத் முன்னாள் முதல்வா் சிமன்பாய் படேல் முலமாக தனது வணிகத் தொழிலை மேம்படுத்த முதல் வாய்ப்பும், முன்னாள் பிரதமா் ராஜீவ் காந்தி மூலமாக இரண்டாவது வாய்ப்பும் கிடைத்ததாக அதானியே தெளிவுபட கூறியுள்ளாா். நாட்டுக்கு அதானி வளா்ச்சியை ஏற்படுத்தினால், அது தங்கள் ஆட்சியின் கீழ் மட்டும்தான் நடைபெற வேண்டும் என்று காங்கிரஸாா் கருதுகின்றனா். அவா்களுக்குப் பிரதமா் மோடியை இழிவுபடுத்த வேண்டும். அதற்கு அதானி-அம்பானியை காரணமாகப் பயன்படுத்துகின்றனா் என்று தெரிவித்தாா்.