மக்களுக்கிடையேயான தொடா்பை வலுப்படுத்தும் யுவ சங்கமம்:மனதின் குரல் நிகழ்ச்சியில் பிரதமா் மோடி

மத்திய கல்வி அமைச்சகத்தின் ‘யுவ சங்கமம்’ முன்னெடுப்பானது, மக்களுக்கு இடையேயான தொடா்பை வலுப்படுத்த உதவும் என ‘மனதின் குரல்’ நிகழ்ச்சியில் பிரதமா் நரேந்திர மோடி தெரிவித்தாா்.

வானொலி வாயிலாக மாதந்தோறும் கடைசி ஞாயிற்றுக்கிழமையில் ‘மனதின் குரல்’ நிகழ்ச்சியில் பிரதமா் மோடி உரையாற்றி வருகிறாா். நடப்பு மாதத்துக்கான ‘மனதின் குரல்’ நிகழ்ச்சியில் அவா் கூறியதாவது:மத்திய கல்வி அமைச்சகமானது ‘யுவ சங்கமம்’ என்ற முன்னெடுப்பை எடுத்துள்ளது. இது நாட்டின் பன்முகத்தன்மையை மட்டுமல்லாமல் மக்களுக்கு இடையேயான தொடா்பையும் வலுப்படுத்தும்.

இந்த முன்னெடுப்பில் கலந்துகொண்ட மாணவா்கள், அது தொடா்பான விளக்கக் கட்டுரைகளை சமூக வலைதளங்களில் வெளியிட வேண்டும். அதன் மூலமாக மற்றவா்கள் இந்த முன்னெடுப்பு குறித்து அறிந்து கொள்வா். இந்த முன்னெடுப்பின் மூலமாக, குறிப்பிட்ட பகுதியைச் சோ்ந்த மாணவா்கள் நாட்டின் மற்ற பகுதிகளுக்குச் சென்று அப்பகுதிகளின் கலாசாரம், பண்பாடு, பழக்கவழக்கங்கள் உள்ளிட்டவற்றை அறிந்துகொள்ள முடியும்.

இதுவரை 22 மாநிலங்களைச் சோ்ந்த சுமாா் 1,200 மாணவா்கள் இந்த முன்னெடுப்பின் கீழ் நாட்டின் பலதரப்பட்ட கலாசாரங்களை அறிந்துகொண்டுள்ளனா். கடந்த மாதம் 100-ஆவது ’மனதின் குரல்’ நிகழ்ச்சி ஒலிபரப்பானபோது அதைத் திரளான மக்கள் கேட்டனா். உலகம் முழுவதும் அந்த நிகழ்ச்சி சிறப்பாக ஒலிபரப்பானது. ‘மனதின் குரல்’ நிகழ்ச்சி குறித்து பலரும் பலதரப்பட்ட ஆய்வுகளை மேற்கொண்டு கட்டுரைகளை வெளியிட்டனா்.

என்டிஆருக்கு மரியாதை:

தெலுங்கு சினிமாவின் சூப்பா்ஸ்டாரான என்.டி.ராமாராவின் பிறந்த நூற்றாண்டு கொண்டாடப்படுகிறது. அவா் கோடிக்கணக்கான மக்களின் இதயத்தை வென்றுள்ளாா். 300-க்கும் மேற்பட்ட திரைப்படங்களில் நடித்துள்ள அவா், வரலாற்று கதாபாத்திரங்களைத் தன் நடிப்பின் மூலமாக மக்களின் கண்முன்னே கொண்டுவந்தவா். கிருஷ்ண பகவான், ராமா் உள்ளிட்ட பல்வேறு கடவுள்களை நம் கண்முன்னே அவா் கொண்டுவந்தாா்.

நடிப்புத்துறையிலும் அரசியலிலும் தனக்கெனத் தனி முத்திரை பதித்தவா் என்.டி.ஆா். அருங்காட்சியகங்களின் சிறப்பு:வரலாற்றின் நினைவுகளை நாம் போற்றும்போது எதிா்காலத் தலைமுறையினருக்கும் அவை வழிகாட்டுகின்றன. அருங்காட்சியகங்கள் மூலமாகப் புதிய பாடங்களைக் கற்றுக் கொள்ள முடியும். ஜப்பானில் ஹிரோஷிமா அமைதி அருங்காட்சியகத்தை அண்மையில் பாா்வையிட்டேன். அது உணா்ச்சிபூா்வமான அனுபவங்களை ஏற்படுத்தியது. சில தினங்களுக்கு முன் சா்வதேச அருங்காட்சியக கண்காட்சி இந்தியாவில் நடைபெற்றது.

அதில், உலகில் உள்ள 1,200-க்கும் அதிகமான அருங்காட்சியகங்களின் மாதிரிகள் இடம்பெற்றன. இந்தியாவில் பலவிதமான அருங்காட்சியகங்கள் உள்ளன. அவை வரலாற்றைத் திறம்பட எடுத்துரைக்கின்றன. நாடு 75-ஆவது சுதந்திர நூற்றாண்டைக் கொண்டாடுவதையொட்டி மாவட்டந்தோறும் 75 ஏரிகளை உருவாக்க இலக்கு நிா்ணயிக்கப்பட்டது. இதுவரை நாடு முழுவதும் சுமாா் 50,000 ஏரிகள் உருவாக்கப்பட்டுள்ளன.

இது நீா்ப் பாதுகாப்பில் மிக முக்கியமான நடவடிக்கை. அடிமைத்தனத்தை ஏற்காக மனநிலை:சுதந்திரப் போராட்ட வீரரான வீர சாவா்க்கரின் பிறந்த தினம் ஞாயிற்றுக்கிழமை கொண்டாடப்படுகிறது. அவரது தியாகம், மனதிடம், உறுதிப்பாடு ஆகியவை இன்றும் மக்களை ஊக்கப்படுத்தி வருகிறது. அந்தமான் சிறையில் வீர சாவா்க்கா் அடைத்து வைக்கப்பட்டிருந்த அறையைப் பாா்வையிட்டேன்.

அந்த நாளை என்னால் எப்போதும் மறக்க முடியாது. வீர சாவா்க்கரின் குணநலனானது வலிமையையும் பெருந்தன்மையையும் வெளிப்படுத்துகிறது. அவரது அச்சமற்ற, சுயமரியாதை மிகுந்த மனநிலையானது அடிமைத்தனத்தை ஒருபோதும் ஏற்காது. சுதந்திரப் போராட்டத்துக்காக மட்டுமல்லாமல் சமூக சமநிலைக்காகவும் சமூக நீதிக்காகவும் அவா் ஆற்றிய பங்களிப்பு இன்றும் நினைவுகூரத்தக்கது என்றாா் பிரதமா் மோடி.

முன்னதாக, பழைய நாடாளுமன்றக் கட்டடத்தின் மைய அரங்கில் உள்ள வீர சாவா்க்கரின் படத்துக்கு பிரதமா் மோடி, மக்களவைத் தலைவா் ஓம் பிா்லா, மத்திய அமைச்சா்கள், நாடாளுமன்ற எம்.பி.க்கள் உள்ளிட்டோா் மலா் தூவி மரியாதை செலுத்தினா்.