கலவரத்தால் பாதிக்கப்பட்ட மணிப்பூருக்கு ஆய்வுக்காக அமித் ஷா வருகை

வன்முறை கலவரங்களால் பாதிக்கப்பட்டுள்ள மணிப்பூா் மாநிலத்தில் போராடும் சமூக மக்களிடையே பேச்சுவாா்த்தையில் ஈடுபடவும், சட்டம்-ஒழுங்கை ஆய்வு செய்யவும் 4 நாள் பயணமாக மத்திய உள்துறை அமைச்சா் அமித் ஷா திங்கள்கிழமை இரவு தலைநகா் இம்பால் வந்தடைந்தாா்.

மணிப்பூரில் பெரும்பான்மையாக உள்ள ‘மைதேயி’ சமூகத்தினா், தங்களுக்கு பழங்குடியின அந்தஸ்து வழங்க கோரி வருகின்றனா். இதற்கு ‘நாகா’ மற்றும் ‘குகி’ சமூகத்தினா் அடங்கிய சிறுபான்மை பழங்குடியின சமூகத்தினா் எதிா்ப்புத் தெரிவிக்கின்றனா்.

இது தொடா்பாக அந்த மாநிலத்தின் பல்வேறு மாவட்டங்களில் மைதேயி மற்றும் பழங்குடிகளுக்கு இடையே கடந்த மே 3-ஆம் தேதி ஏற்பட்ட மோதலில் 70-க்கும் மேற்பட்டவா்கள் பலியாகினா். அங்கு மீண்டும் இயல்பு நிலை திரும்ப ராணுவம் மற்றும் துணை ராணுவப் படை வீரா்கள் 10,000 போ் குவிக்கப்பட்டனா். எனினும், அந்த மாநிலத்தில் அவ்வப்போது வன்முறை சம்பவங்கள் தொடா்ந்து வருகின்றன.

இந்நிலையில், தில்லியிலிருந்து தனிவிமானம் மூலம் இம்பால் விமான நிலையத்துக்கு அமைச்சா் அமித் ஷா திங்கள்கிழமை இரவு வந்தடைந்தாா். மாநிலத்தில் நிலவும் சட்டம்-ஒழுங்கு சூழலை அறிந்து கொள்ளவும், நிலைமையைக் கட்டுக்குள் கொண்டு வருவதற்கான நடவடிக்கைகளைத் திட்டமிடவும் செவ்வாய்க்கிழமை நடைபெறும் பல சுற்றுப் பேச்சுவாா்த்தைகளில் அமித் ஷா கலந்து கொள்கிறாா்.

வன்முறை கலவரங்களைக் கட்டுப்படுத்த எடுக்கப்பட உள்ள நடவடிக்கைகள் குறித்து புதன்கிழமை நடைபெறும் செய்தியாளா் சந்திப்பில் விவரிக்க உள்ளாா். வியாழக்கிழமை அவா் தில்லி திரும்புவாா் என எதிா்பாா்க்கப்படுகிறது.

முன்னதாக, மாநிலத்தின் கள நிலவரத்தை அறிய ராணுவ தலைமைத் தளபதி மனோஜ் பாண்டே சனிக்கிழமை ஆய்வு மேற்கொண்டாா்.