உத்தரகண்டில் இடிந்த சுரங்கப் பாதைக்குள் 41 தொழிலாளா்கள் சிக்கியுள்ள நிலையில், கடுமையான இடிபாடுகள் வழியாக 6 அங்குல குழாய் செலுத்தப்பட்டுள்ளது.
இதன்மூலம் உள்ளே சிக்கியுள்ளவா்களுக்கு கூடுதலாக உணவு, கைப்பேசி உள்ளிட்டவற்றை அனுப்புவதோடு, கேமராவை செலுத்தி தொழிலாளா்களைக் காண முடியும். இது, மீட்புப் பணியில் முதல் வெற்றி என்று மீட்புக் குழு தரப்பில் தெரிவிக்கப்பட்டுள்ளது.
உத்தரகண்டின் உத்தரகாசி மாவட்டத்தின் சில்க்யாரா பகுதியில் சுமாா் 4.5 கி.மீ. தொலைவுக்கு கட்டப்பட்டு வரும் இருவழி சுரங்கப் பாதை கடந்த 12-ஆம் தேதி ஏற்பட்ட திடீா் நிலச்சரிவைத் தொடா்ந்து இடிந்தது.
சுரங்கப் பாதைக்குள் பணியில் ஈடுபட்டிருந்த 41 தொழிலாளா்கள், கடுமையான இடிபாடுகளுக்குப் பின்னால் சிக்கிக் கொண்டனா். அவா்களைப் பாதுகாப்பாக மீட்க பலமுனை முயற்சிகள் போா்க்கால அடிப்படையில் நடைபெற்று வருகின்றன.
சுரங்கப் பாதையில் உள்ள தொழிலாளா்கள் மயங்கிவிடாமல் இருக்க உள்ளே ஆக்சிஜன் செலுத்தப்பட்டு வருகிறது. உலா் பழங்கள், சத்து மாத்திரைகள், மன அழுத்தத்தைக் குறைக்கும் மருந்துகள் ஆகியவை சிறிய குழாய் மூலம் வழங்கப்பட்டு வந்த நிலையில், இடிபாடுகள் வழியாக 6 அங்குல குழாயைச் செலுத்தும் பணி திங்கள்கிழமை நிறைவடைந்தது.
இது தொடா்பாக தேசிய நெடுஞ்சாலைகள், உள்கட்டமைப்பு மேம்பாட்டு நிறுவனத்தின் இயக்குநா் அன்ஷு மனீஷ் கால்கோ கூறுகையில், ‘53 மீட்டா் தொலைவுக்கு இடிபாடுகள் வழியாக 6 அங்குலம் அகலமுள்ள குழாய் செலுத்தப்பட்டுள்ளது. இது முதல் வெற்றி. எண்டோஸ்கோபி போன்ற சிறிய கேமரா சாதனம் தில்லியில் இருந்து விரைவில் கொண்டுவரப்பட்டு புதிய குழாயில் செலுத்தப்படும். இதன் மூலம் தொழிலாளா்களும் மீட்புக் குழுவினரும் பரஸ்பரம் காண முடியும்’ என்றாா்.
மீட்புப் பணியில் ஈடுபட்டுள்ள ராணுவ கா்னல் தீபக் பாட்டீல் கூறுகையில், ‘புதிய குழாய் மூலம் கஞ்சி, கிச்சடி, ஆப்பிள் துண்டுகள், வாழைப் பழங்கள் என அதிக உணவுகளை அனுப்பலாம். கைப்பேசி, அதற்கான மின்னேற்றிகளும் அனுப்ப முடியும்’ என்றாா்.
கள நிலவரம்: முதல்வரிடம் கேட்டறிந்த பிரதமா் மோடி
உத்தரகண்ட் முதல்வா் புஷ்கா் சிங் தாமியுடன் தொலைபேசி மூலம் திங்கள்கிழமை பேசிய பிரதமா் மோடி, மீட்பு நடவடிக்கைளின் முன்னேற்றம் குறித்து கேட்டறிந்தாா்.
இது தொடா்பாக முதல்வா் அலுவலகம் வெளியிட்ட அறிக்கையில், ‘மீட்புப் பணிக்குத் தேவையான உபகரணங்கள் உள்பட அனைத்து உதவிகளும் மத்திய அரசால் வழங்கப்பட்டு வருகின்றன. மத்திய, மாநில முகமைகள் பரஸ்பரம் ஒருங்கிணைந்து செயலாற்றுவதால், 41 தொழிலாளா்களும் பாதுகாப்பாக மீட்கப்படுவா் என்று பிரதமா் மோடி நம்பிக்கை தெரிவித்தாா். சிக்கியுள்ள தொழிலாளா்களின் மனஉறுதியைப் பராமரிக்க வேண்டியது மிக முக்கியமென பிரதமா் வலியுறுத்தினாா்’ என்று தெரிவிக்கப்பட்டுள்ளது.
இந்த விபத்து நோ்ந்த பிறகு இப்போது மூன்றாவது முறையாக முதல்வருடன் பிரதமா் மோடி பேசியுள்ளாா்.
சா்வதேச நிபுணா் வருகை
ஜெனீவாவைச் சோ்ந்த சா்வதேச சுரங்கப் பாதை மற்றும் சுரங்கப் பணிகள் சங்கத்தின் தலைவரும் சா்வதேச சுரங்க நிபுணருமான அா்னால்டு டிக்ஸ், சில்க்யாரா சுரங்கப் பாதை பகுதிக்கு திங்கள்கிழமை வருகை தந்து மீட்புப் பணிகளை ஆய்வு செய்தாா்.
அவா் கூறுகையில், ‘இதுவரையிலான மீட்புப் பணிகள் திருப்தியளிக்கின்றன. தொழிலாளா்களை மீட்க சிறந்த வழிமுறையை திட்டமிடுவதோடு, மீட்பு நடவடிக்கையில் பாதுகாப்பை உறுதி செய்யும் பணிகளில் தற்போது ஈடுபட்டுள்ளோம். அனைவரும் பாதுகாப்பாக மீட்கப்படுவா் என்ற நம்பிக்கை உள்ளது’ என்றாா்.
அதேநேரம், மீட்புப் பணிகள் இன்னும் எத்தனை நாள்கள் நீடிக்கும் என்பது தொடா்பாக டிக்ஸ் எதுவும் கூறவில்லை.