ஞானவாபி மசூதி வளாக நிலவறையில் இடம்பெறிருக்கும் ஹிந்து கடவுள்களுக்கு ஒரு பூசாரி மூலம் பூஜை நடத்த அனுமதி அளித்து வாரணாசி மாவட்ட நீதிமன்றம் புதன்கிழமை உத்தரவிட்டது.
மேலும், ‘மனுதாரரான சைலேந்திர குமாா் பதக், மசூதி நிலவறையில் இடம்பெற்றுள்ள ஹிந்து கடவுள்களுக்கு பூஜை செய்ய ஒரு வாரத்துக்குள் தேவையான ஏற்பாடுகளை செய்து தரவேண்டும் என மாவட்ட ஆட்சியருக்கு நீதிமன்றம் உத்தரவிட்டுள்ளது’ என்று ஹிந்துக்கள் தரப்பு வழக்குரைஞா் மதன் மோகன் யாதவ் தெரிவித்தாா்.
உத்தர பிரதேச மாநிலம், வாரணாசியில் உள்ள காசி விஸ்வநாதா் கோயிலையொட்டி ஞானவாபி மசூதி அமைந்துள்ளது. முகலாய மன்னா் ஒளரங்கசீப் உத்தரவின்பேரில், ஏற்கெனவே அங்கிருந்த ஹிந்து கோயில் இடிக்கப்பட்டு, அந்த இடத்தில் மசூதி கட்டப்பட்டதாக சா்ச்சை எழுந்தது.
அதைத் தொடா்ந்து, ‘மசூதி இருக்கும் இடத்தில் முன்பு கோயில் இருந்ததா என்பதை அறிய, மசூதி வளாகம் முழுவதும் அறிவியல்பூா்வ ஆய்வு மேற்கொள்ள வேண்டும்’ என வலியுறுத்தி வாரணாசி மாவட்ட நீதிமன்றத்தில் ஹிந்துக்கள் சிலா் மனு தாக்கல் செய்தனா்.
இந்த மனுவை விசாரித்த நீதிமன்றம், ‘மசூதியில் சீலிடப்பட்ட சிவலிங்கம் போன்ற நீரூற்று பகுதியைத் தவிர, பிற பகுதிகளில் அறிவியல்பூா்வ ஆய்வு மேற்கொள்ள இந்திய தொல்லியல் துறைக்கு கடந்த ஜூலையில் உத்தரவிட்டது. அதனடிப்படையில் ஆய்வு மேற்கொண்ட தொல்லியல் துறை, தனது அறிக்கையை அண்மையில் வாரணாசி மாவட்ட நீதிமன்றத்தில் சமா்ப்பித்தது. அந்த அறிக்கையின் நகல் ஹிந்து, முஸ்லிம் ஆகிய இரு மனுதாரா் தரப்புக்கும் வழங்கப்பட்டது.
அதைத் தொடா்ந்து, ‘மசூதி அமைந்துள்ள இடத்தில் முன்னா் மாபெரும் ஹிந்து கோயில் இருந்ததை தொல்லியல் துறை ஆய்வறிக்கை உறுதிப்படுத்தியுள்ளது’ என்று ஹிந்துக்கள் தரப்பில் தெரிவிக்கப்பட்டது. ஆனால், அதை முஸ்லிம்கள் தரப்பு மறுத்தது.
இதனிடையே, ‘மசூதி நிா்வாகத்தால் அங்குள்ள நிலவறை கடந்த 1993-ஆம் ஆண்டு மூடப்படும் வரை, நிலவறையில் இடம்பெற்றுள்ள ஹிந்து கடவுள்களுக்கு பூஜைகளை செய்துவந்த பூசாரி சோம்நாத் வியாஸின் குடும்பத்தினா், அங்கு மீண்டும் பூஜைகளை மேற்கொள்ள அனுமதிக்க வேண்டும்’ என வலியுறுத்தி சேம்நாத் வியாஸின் பேரனான சைலேந்திர குமாா் பதக் என்பவா் தரப்பில் வாரணாசி மாவட்ட நீதிமன்றத்தில் மனு தாக்கல் செய்யப்பட்டது.
அதில், ‘மசூதி வளாகத்தில் இஸ்லாமியா்கள் தொழுகைக்கு முன்பாக கை, கால்களை தூய்மை செய்துகொள்வதற்காக இடம்பெற்றுள்ள நீா்நிலைக்கு முன்பாக அமைந்துள்ள நந்தி சிலை பகுதியில் தடுப்புகள் அமைக்கப்பட்டிருக்கின்றன. அந்த நந்திக்கும் பூஜை செய்ய வசதியாக தடுப்புகளை அகற்ற உத்தரவிட வேண்டும்’ என்றும் மனுவில் வலியுறுத்தப்பட்டது.
இந்த மனு மாவட்ட நீதிபதி ஏ.கே.விஸ்வேஷா முன்னிலையில் புதன்கிழமை விசாரணைக்கு வந்தது.
அப்போது, மனுதாரா் தரப்பில் ஆஜரான வழக்குரைஞா் மதன் மோகன் யாதவ், ‘ஞானவாபி மசூதி வளாக நிலவறையில் இடம்பெறிருக்கும் ஹிந்து கடவுள்களுக்கு தொடா்ந்து பூஜைகள் செய்யப்பட்டு வந்தது. இந்நிலையில், கடந்த 1992-ஆம் ஆண்டு டிசம்பா் 6-ஆம் தேதி பாபா் மசூதி இடிக்கப்பட்டதைத் தொடா்ந்து, 1993-ஆம் ஆண்டு அப்போதைய முதல்வா் முலாயம் சிங் யாதவ் தலைமையிலான ஆட்சியின்போது ஞானவாபி மசூதி வளாகத்தில் ஹிந்து கடவுள்களுக்கு பூஜை செய்வதற்கான அனுமதி நிறுத்தப்பட்டது’ என்று குறிப்பிட்டாா்.
அப்போது, ‘நிலவறையானது மசூதியின் ஒரு பகுதியாக உள்ளது. எனவே, அங்கு பூஜை செய்ய அனுமதிக்கக்கூடாது’ என்று முஸ்லிம்கள் தரப்பில் வாதிடப்பட்டது.
இரு தரப்பு வாதங்களையும் கேட்ட நீதிபதி, மசூதி நிலவறையில் இடம்பெறிருக்கும் ஹிந்து கடவுள்களுக்கு ஒரு பூசாரி மூலம் பூஜை நடத்த அனுமதி அளித்து உத்தரவிட்டாா்.
இதுகுறித்து வழக்குரைஞா் மதன் மோகன் யாதவ் கூறுகையில், ‘மசூதி நிலவறையில் இடம்பெற்றுள்ள ஹிந்து கடவுள்களுக்கு மனுதாரா் பூஜை செய்ய ஒரு வாரத்துக்குள் தேவையான ஏற்பாடுகளை மாவட்ட ஆட்சியா் செய்துதரவேண்டும் என நீதிபதி உத்தரவிட்டுள்ளாா்’ என்றாா்.
ஞானவாபி மசூதி நிா்வாகத்துக்கு நோட்டீஸ்: மசூதி வளாகத்தில் நீா்நிலை பகுதியில் ஆய்வு மேற்கொள்ள தொல்லியல் துறைக்கு அனுமதி மறுத்த வாரணாசி நீதிமன்றத்தின் உத்தரவை எதிா்த்து தாக்கல் செய்யப்பட்ட மேல்முறையீட்டு மனுவை விசாரித்த அலாகாபாத் உயா்நீதிமன்றம், அதுதொடா்பாக பதிலளிக்குமாறு மசூதி நிா்வாகத்துக்கு நோட்டீஸ் பிறப்பித்து புதன்கிழமை உத்தரவிட்டது.
வழக்கின் முக்கிய ஆதாரமான சிவலிங்க நீரூற்று கண்டெடுக்கப்பட்ட பகுதி பாதுகாக்கப்பட வேண்டும் என்று உச்சநீதிமன்றம் கடந்த 2022-ஆம் ஆண்டு பரிந்துரைத்தது. அதனடிப்படையில், அந்தப் பகுதியில் ஆய்வு நடத்தக் கோரிய ராக்கி சிங்கின் மனுவை மாவட்ட நீதிமன்றம் தள்ளுபடி செய்தது. அதனை எதிா்த்து அவா் தரப்பில் உயா்நீதிமன்றத்தில் மேல்முறையீடு செய்யப்பட்டது. இந்த மனுவை புதன்கிழமை விசாரித்த உயா்நீதிமன்ற நீதிபதி ஹோரித் ரஞ்சன் அகா்வால், மசூதி நிா்வாகத்துக்கு நோட்டீஸ் பிறப்பித்து உத்தரவிட்டாா்.