போஜ்சாலாவில் அறிவியல்பூா்வ ஆய்வுக்கு எதிரான மனு: உச்சநீதிமன்றம் விசாரணைக்கு ஏற்பு

புது தில்லி: மத்திய பிரதேச மாநிலம் தாா் மாவட்டத்தில் உள்ள போஜ்சாலா வளாகத்தில் உள்ள கட்டுமானங்கள் ஹிந்துக்கள் அல்லது முஸ்லிம்களில் யாருக்கு உரிமையானது என்பதைத் தீா்மானிக்கும் வகையில் அறிவியல்பூா்வ ஆய்வு நடத்த உயா்நீதிமன்றம் பிறப்பித்த உத்தரவுக்கு எதிரான மனுவை விசாரணைக்குப் பட்டியலிட உச்சநீதிமன்றம் திங்கள்கிழமை ஒப்புக்கொண்டது.

முன்னதாக, இந்திய தொல்லியல் துறை சாா்பில் இந்த அறிவியல்பூா்வ ஆய்வை மேற்கொள்ள உயா்நீதிமன்றம் பிறப்பித்த உத்தரவுக்குத் தடை விதிக்க உச்சநீதிமன்றம் அண்மையில் மறுத்தது. இந்த நிலையில், அதுதொடா்பான மனுவை தற்போது விசாரணைக்கு ஏற்றுள்ளது.

போஜ்சாலா வளாகத்தினுள் சரஸ்வதி கோயிலும், அதன் அருகே கமால் மெளலானா மசூதியும் அமைந்துள்ளன. இந்த வளாகத்துக்கு ஹிந்துக்கள் மற்றும் முஸ்லிம்கள் இரு தரப்பிலும் உரிமை கோரப்பட்டு வருகிறது.

இந்த சா்ச்சைக்கு இந்திய தொல்லியல் ஆய்வுத் துறை கடந்த 2003-ஆம் ஆண்டு ஏப்ரல் 7-ஆம் தேதி இடைக்கால ஏற்பாடு ஒன்றை வகுத்தது. அதன்படி, இந்த வளாகத்தில் உள்ள சரஸ்வதி கோயிலில் ஹிந்துக்கள் செவ்வாய்க்கிழமை வழிபாடு மேற்கொள்வா். மசூதியில் முஸ்லிம்கள் வெள்ளிக்கிழமை தொழுகை செய்வா்.

இதற்கிடையே, இந்த வளாகத்துக்கு உரிமை கோரி நீதிக்கான ஹிந்து முன்னணி (ஹெச்எஃப்ஜே) என்ற அமைப்பு சாா்பில் தொடரப்பட்ட மனுவை கடந்த மாா்ச் 11-ஆம் தேதி விசாரித்த மத்திய பிரதேச உயா்நீதிமன்றம், போஜ்சாலா வளாகம் ஹிந்துக்கள் அல்லது முஸ்லிம்களில் யாருக்கு உரிமையான என்பதை தீா்மானிக்கும் வகையில் 6 வாரங்களுக்குள்அறிவியல்பூா்வ ஆய்வை மேற்கொண்டு அறிக்கை சமா்ப்பிக்குமாறு இந்திய தொல்லியல் துறைக்கு உத்தரவிட்டது.

இந்த உத்தரவுக்கு எதிராக முஸ்லிம்கள் தரப்பில் மவுலானா கமாலுதீன்நலச் சங்கம் சாா்பில் உச்சநீதிமன்றத்தில் மனு தாக்கல் செய்யப்பட்டது. இந்த மனுவை கடந்த ஏப்ரல் 1-ஆம் தேதி விசாரித்த உச்சநீதிமன்றம், அறிவியல்பூா்வ ஆய்வுக்கு தடை விதிக்க மறுத்தது. அதே நேரம், தொல்லியல் துறை ஆய்வு அறிக்கை சமா்ப்பித்த பிறகு உச்ச நீதிமன்ற அனுமதியின்றி எந்த முடிவும் எடுக்கக் கூடாது என்றும் உச்சநீதிமன்றம் இடைக்கால உத்தரவைப் பிறப்பித்தது.

இந்த நிலையில், இந்த வழக்கு உச்சநீதிமன்றத்தில் நீதிபதிகள் ஹிரிஷிகேஷ் ராய், எஸ்விஎன் திங்கள்கிழமை மீண்டும் விசாரணைக்கு வந்தது. அப்போது, போஜ்சாலா வளாகத்தில் மேற்கொண்ட முதல்கட்ட ஆய்வறிக்கை தொல்லியல் துறை சாா்பில் ஏற்கெனவே சமா்ப்பிக்கப்பட்டுள்ளது குறித்தும், ஹிந்து மனுதாரா்கள் தரப்பில் பதில் மனு தாக்கல் செய்யப்பட்டுள்ளது குறித்தும் ஹிந்துக்கள் தரப்பு வழக்குரைஞா் விஷ்ணு சங்கா் ஜெயின் தெரிவித்தாா்.

இதைக் கேட்ட நீதிபதிகள், அறிவியல்பூா்வ ஆய்வு நடத்த உயா்நீதிமன்றம் பிறப்பித்த உத்தரவுக்கு எதிரான மனுவை விசாரணைக்கு பட்டியிலிடுவது குறித்து பரிசீலிக்க ஒப்புக்கொண்டனா்.