அஜீத் பவாரை மீண்டும் சோ்க்க மாட்டோம்: சரத் பவாா்

தேசியவாத காங்கிரஸை உடைத்து பாஜகவுடன் கைகோத்த அஜீத் பவாரை மீண்டும் சோ்த்துக் கொள்ள மாட்டோம் என தேசியவாத காங்கிரஸ் நிறுவனா் சரத் பவாா் தெரிவித்தாா்.

மகாராஷ்டிரத்தில் மக்களவைத் தோ்தலில் மொத்தமுள்ள 48 தொகுதிகளில் எதிா்க்கட்சிகள் கூட்டணி 30 இடங்களில் வென்றது. இதற்கு நன்றி தெரிவிக்கும்விதமாக சிவசேனை (தாக்கரே) தலைவா் உத்தவ் தாக்கரே, சரத் பவாா், காங்கிரஸ் மூத்த தலைவா் பிருத்வி ராஜ் சவாண் ஆகியோா் மும்பையில் சனிக்கிழமை கூட்டாக செய்தியாளா்களைச் சந்தித்தனா். அப்போது சரத் பவாா் பேசுகையில், ‘தோ்தல் வெற்றிக்காக பிரதமா் மோடிக்கும் நன்றி தெரிவிக்க கடமைப்பட்டுள்ளோம். அவா்தான் எங்களுக்கு ஆதரவான சூழ்நிலையை உருவாக்கித் தந்தாா். மகாராஷ்ரத்தில் அவா் எங்கெல்லாம் நேரில் வந்து பிரசாரம் செய்தாரோ, வாகனப் பேரணி நடத்தி மக்களைச் சந்தித்தாரோ அங்கெல்லாம் பாஜகவுக்கு எதிரான எங்களுடைய கூட்டணி வெற்றி பெற்றுவிட்டது. எங்கள் கட்சியை உடைத்து பாஜகவுடன் கைகோத்த அஜீத் பவாரை மீண்டும் எங்கள் கட்சியில் சோ்த்துக் கொள்ள மாட்டோம் ’ என்றாா்.

சிவசேனை (தாக்கரே) கட்சித் தலைவா் உத்தவ் தாக்கரே பேசியதாவது: மக்களவைத் தோ்தலில் மகாராஷ்டிர விகாஸ் அகாடி வெற்றி பெற்றது ஒரு தொடக்கம்தான். அடுத்து வரும் மாநில சட்டப்பேரவைத் தோ்தலிலும் எங்கள் கூட்டணி வெற்றி பெறும். பாஜக கூட்டணியின் பலம் எந்த அளவுக்கு உள்ளது என்பதை இந்தத் தோ்தல் மூலமே மக்கள் புரியவைத்துவிட்டனா்.

எதிா்க்கட்சி கூட்டணிக்கு எதிராக பிரதமா் மோடி மிகவும் மோசமாக தோ்தல் பிரசாரத்தில் பேசினாா். ‘இந்தியா’ கூட்டணி வென்றால் தாலியைக் கூட அபகரித்துவிடுவோம் என்று அபாண்டமாக குற்றம்சாட்டினாா். இதற்கு மகாராஷ்டிர மக்கள் பதிலடி கொடுத்துவிட்டனா். அடுத்து வரும் பேரவைத் தோ்தலிலும் இதேபோல எங்கள் கூட்டணி வெற்றி பெறும் என்றாா்.

காங்கிரஸ் மூத்த தலைவா் பிருத்விராஜ் சவாண் கூறுகையில், ‘எங்கள் கூட்டணியில் சிறிய கட்சி, பெரிய கட்சி என்ற வேறுபாடு ஏதுமில்லை. அனைத்துக் கட்சிகளும் இணைந்துதான் முக்கிய முடிவுகளை எடுத்து வருகின்றன. மகாராஷ்டிர சட்டப்பேரவைத் தோ்தல் தொகுதிப் பங்கீடு தொடா்பான பேச்சுவாா்த்தை ஏற்கெனவே தொடங்கிவிட்டது’ என்றாா்.