பொது சிவில் சட்டத்தில் பழங்குடியினருக்கு விலக்கு: ஜாா்க்கண்டில் பாஜக தோ்தல் வாக்குறுதி

‘ஜாா்க்கண்ட் மாநிலத்தில் பாஜக ஆட்சிக்கு வந்தால் பொது சிவில் சட்டம் அமல்படுத்தப்படும்; ஆனால், பழங்குடியினருக்கு அதிலிருந்து விலக்கு அளிக்கப்படும்’ என்று மத்திய உள்துறை அமைச்சா் அமித் ஷா ஞாயிற்றுக்கிழமை அறிவித்தாா்.

ஜாா்க்கண்டில் நடைபெறவுள்ள சட்டப் பேரவைத் தோ்தலுக்கான பாஜகவின் தோ்தல் அறிக்கையை வெளியிட்ட அமித் ஷா, ‘ஏழை மற்றும் பிற்படுத்தப்பட்ட சமூகத்தைச் சோ்ந்த பெண்களுக்கு ஆரம்பக் கல்வி முதல் கல்லூரி வரை இலவசமாக வழங்கப்படும்’ என்றும் தெரிவித்தாா்.

ஜாா்க்கண்டில் 81 இடங்களைக் கொண்ட அந்த மாநில சட்டப் பேரவைக்கு வரும் 13, 20-ஆகிய தேதிகளில் இருகட்டங்களாக தோ்தல் நடைபெறுகிறது. இதில் ஆளும் ஜாா்க்கண்ட் முக்தி மோா்ச்சா (ஜேஎம்எம்), காங்கிரஸ் அடங்கிய கூட்டணிக்கும் எதிா்க்கட்சியான பாஜக தலைமையிலான கூட்டணிக்கும் கடும் போட்டி நிலவுகிறது.

இந்நிலையில், ராஞ்சியில் ஞாயிற்றுக்கிழமை நடைபெற்ற நிகழ்ச்சியில் பாஜகவின் தோ்தல் அறிக்கையை மத்திய அமைச்சா் அமித் ஷா வெளியிட்டுப் பேசியதாவது:

ஜாா்க்கண்டில் பாஜக ஆட்சி அமைத்தால் பொது சிவில் சட்டம் (யுசிசி) அறிமுகப்படுத்தப்படும். பொது சிவில் சட்டம் பழங்குடியினரின் உரிமைகளையும் கலாசாரத்தையும் பாதிக்கும் என முதல்வா் ஹேமந்த் சோரன் தவறான பிரசாரத்தில் ஈடுபட்டுள்ளாா். அது முற்றிலும் அடிப்படையற்றது.

பொது சிவில் சட்டத்திலிருந்து பழங்குடியினருக்கு முழு விலக்கு அளிக்கப்படும். மேலும், பழங்குடியினரின் உரிமைகள் எந்த வகையிலும் பாதிக்கப்படாமல் இருப்பதை உறுதி செய்வோம்.

5 லட்சம் வேலைகள்: 2.87 லட்சம் அரசு வேலைகள் உள்பட 5 லட்சம் புதிய வேலைவாய்ப்புகள் உருவாக்கப்படும். மாநிலத்தில் அமைக்கப்பட்ட தொழிற்சாலைகள் மற்றும் சுரங்கங்களால் இடம்பெயா்ந்த மக்களின் மறுவாழ்வை உறுதிசெய்ய ஆணையம் அமைக்கப்படும்.

மேற்கு வங்கம் மற்றும் ஜாா்க்கண்டில் உள்ளூா் நிா்வாகங்கள் ஊடுருவலை ஊக்குவிக்கின்றன. பாஜக ஆட்சியில் மாநிலத்தில் சட்டவிரோதமாக குடியேறியவா்களை அடையாளம் கண்டு நாடு கடத்தவும் அவா்களிடமிருந்து நிலத்தை திரும்பப் பெறவும் நடவடிக்கை எடுக்கப்படும்.

2 ஆண்டுகளில் நக்ஸல் ஒழிப்பு: ஹேமந்த் சோரன் அரசின் கடந்த 5 ஆண்டு ஆட்சிக்காலத்தில் பெண்களுக்கு எதிரான குற்றங்கள் 29 சதவீதமும் பாலியல் வன்கொடுமை வழக்குகள் 42 சதவீதமும் அதிகரித்துள்ளன. அடுத்த இரண்டு ஆண்டுகளில் ஜாா்க்கண்டில் இருந்து நக்ஸல் தீவிரவாதம் ஒழிக்கப்படும்.

ரூ.10 லட்சம் மருத்துவக் காப்பீடு: ‘ஆயுஷ்மான் பாரத் ஜீவன் தாரா’ திட்டத்தின்கீழ் 70 வயதுக்கு மேற்பட்ட முதியோா்களுக்கான மருத்துவக் காப்பீட்டை ரூ.5 லட்சத்தில் இருந்து ரூ.10 லட்சமாக உயா்த்துவோம். ஆரம்ப சுகாதார மையங்களில் படுக்கைகளின் எண்ணிக்கையை 25,000-ஆக உயா்த்துவோம்.

மேலும், ஒவ்வொரு கா்ப்பிணிப் பெண்ணுக்கும் 6 சத்துணவுப் பெட்டிகளும், ரூ.21,000 நிதியுதவியும் வழங்கப்படும். முதியவா்கள், விதவைகள் மற்றும் மாற்றுத் திறனாளிகளுக்கான மாதாந்திர ஓய்வூதியமாக ரூ.2,500 வழங்கப்படும்.

உள்கட்டமைப்பு: ஒவ்வொரு மாவட்டத் தலைமையகத்தையும் தலைநகா் ராஞ்சியுடன் இணைக்கும் வகையில் ரயில் அமைப்பு விரிவுபடுத்தப்படுத்தப்படும். பிரதமரின் வீடு திட்டத்தின் ஏழைகளுக்கு 21 லட்சம் வீடுகள் கட்டித்தரப்படும் என்றாா்.

வளா்ச்சிக்கான வாக்குறுதிகள்!

பாஜக தோ்தல் அறிக்கை வெளியீட்டையொட்டி பிரதமா் நரேந்திர மோடி ‘எக்ஸ்’ வலைதளத்தில் வெளியிட்ட பதிவில், ‘ஜாா்கண்ட் மக்களிடையே ஒரு புதிய நம்பிக்கையுடன் நாங்கள் நிற்கிறோம். பழங்குடியின சகோதர, சகோதரிகளுக்கான மரியாதையுடன் மாநிலத்தின் வளா்ச்சி, இளைஞா்களுக்கான வேலைவாய்ப்பு மற்றும் பெண்களுக்கு அதிகாரம் அளிப்பது ஆகியவையின் அடிப்படையில் பாஜகவின் தோ்தல் அறிக்கை அமைந்துள்ளது. ஜாா்க்கண்டின் நிலம், பெண், உணவு ஆகியவற்றின் பாதுகாப்பில் நாங்கள் உறுதியாக உள்ளோம்’ என்று பதிவிட்டுள்ளாா்.

பொது சிவில் சட்டம் செயல்பாட்டுக்கு வராது: முதல்வா் சோரன்

ஜாா்க்கண்டில் பொது சிவில் சட்டம் அல்லது தேசிய குடிமக்கள் பதிவேடு (என்ஆா்சி) ஆகியவை ஒருபோதும் செயல்பாட்டுக்கு வராது என்று முதல்வா் ஹேமந்த் சோரன் பிரசாரக் கூட்டத்தில் உறுதியளித்தாா்.

மேலும், ‘பாஜக வெறுப்பைப் பரப்புகிறது. பழங்குடியினா், ஒடுக்கப்பட்டோா் அல்லது பிற்படுத்தப்பட்ட சமூகங்கள் பற்றி அவா்கள் கவலைப்படுவதில்லை.

கனிம வளங்களை எடுப்பதற்காக உள்ளூா்வாசிகளை இடம்பெயரச் செய்த பாஜக தலைமையிலான மத்திய அரசு, மாநிலத்துக்கு நிலக்கரி நிலுவைத் தொகையான ரூ.1.36 லட்சம் கோடியை இன்னும் வழங்கவில்லை.

வங்கதேச ஊடுருவல் குறித்த கவலைப்படும் பாஜக, அந்நாட்டின் முன்னாள் பிரதமா் ஷேக் ஹசீனாவுக்கு ஏன் இந்தியா அடைக்கலம் கொடுக்க வேண்டும்? எந்த ஒப்பந்தங்கள் இதை அனுமதிக்கின்றன? எல்லைப் பாதுகாப்புக்கான பொறுப்பு மத்திய அரசிடமே உள்ளது’ என்றாா்.

பெண்களுக்கு மாதம் ரூ.2,100: பெண்களுக்கு அதிகாரமளிக்கும் லட்சியத்தின் ஒரு பகுதியாக அவா்களுக்கு மாதம் ரூ.2,100 உதவித் தொகை வழங்கும் திட்டம் தொடங்கப்படும்.