வக்ஃப் சட்டத்திருத்த மசோதா தொடா்பான நாடாளுமன்ற கூட்டுக் குழுவின் (ஜேபிசி) முடிவுகளை அதன் தலைவரான பாஜக எம்.பி. ஜெகதாம்பிகா பால் தன்னிச்சையான எடுப்பதாக குற்றம்சாட்டி குழுவில் இடம்பெற்றுள்ள எதிா்க்கட்சி எம்.பி.க்கள் மக்களவைத் தலைவா் ஓம் பிா்லாவிடம் புகாா் அளித்தனா்.
காங்கிரஸ் எம்.பி.க்கள் முகமது ஜாவேத், இம்ரான் மசூத், திமுக எம்.பி. ஆ.ராசா, திரிணமூல் காங்கிரஸ் எம்.பி கல்யாண் பானா்ஜி, ஆம் ஆத்மி எம்.பி. சஞ்சய் சிங், அகில இந்திய மஜ்லீஸ் எம்.பி. அசாதுதீன் ஒவைசி ஆகிய எதிா்க்கட்சி எம்.பி.க்கள் கையொப்பமிட்ட புகாா் மனு மக்களவைத் தலைவா் ஓம் பிா்லாவிடம் அளிக்கப்பட்டது.
அந்த மனுவில், குழு அமா்வுகளை தொடா்ந்து மூன்று நாள்களுக்கு நடத்துவது உள்பட குழு நடவடிக்கைகளில் எடுக்கப்படும் தன்னிச்சை முடிவுகளால் தாங்கள் புறக்கணிக்கப்படுவதாக எதிா்க்கட்சி எம்.பி.க்கள் குற்றஞ்சாட்டினா்.
அறிக்கைகளை ஆய்வு செய்து, ஜேபிசி கூட்டங்களுக்குத் தயாராவதற்கு உறுப்பினா்களுக்கு போதிய அவகாசம் கிடைக்கும் வகையில் கூட்டத்தின் தேதிகளை நிா்ணயிக்க வேண்டும். 15 நாள்களுக்கு ஒன்று அல்லது இரண்டு கூட்டங்களை நடத்தலாம். முக்கிய முடிவுகளை எடுப்பதற்கு முன் குழு உறுப்பினா்களுடன் முறையாக கலந்தாலோசிக்க குழுத் தலைவருக்கு உத்தரவிடுமாறு மக்களவைத் தலைவரிடம் வலியுறுத்தப்பட்டுள்ளது.
இந்தச் சந்திப்பைத் தொடா்ந்து செய்தியாளா்களிடம் பேசிய எதிா்க்கட்சி எம்.பி.க்கள், ‘எங்களின் கோரிக்கைகளை பொறுமையாகக் கேட்டுக்கொண்ட மக்களவைத் தலைவா் ஓம் பிா்லா, எங்கள் கோரிக்கையைப் பரிசீலிப்பதாகக் கூறினாா்’ என்றனா்.
நாடு முழுவதும் முஸ்லிம்கள் தொண்டு பணிகளுக்கு அா்ப்பணிக்கப்படும் வக்ஃப் சொத்துகளை மற்றவா்களின் பெயருக்கு மாற்ற முடியாது. இவற்றை வக்ஃப் வாரியங்கள் நிா்வகித்து வருகின்றன. இந்நிலையில், வக்ஃப் சொத்துகள் தொடா்பான முக்கிய அம்சங்களுடன் வக்ஃப் சட்டத்திருத்த மசோதாவை மத்திய அரசு கொண்டு வந்தது.
எதிா்க்கட்சிகளின் கடும் எதிா்ப்பைத் தொடா்ந்து, தற்போது இந்த மசோதாவை நாடாளுமன்ற கூட்டுக் குழு ஆராய்ந்து வருகிறது.
நாடாளுமன்ற குளிா்கால கூட்டத்தொடா் நவம்பா் 25-ஆம் தேதி தொடங்கும் நிலையில், வக்ஃப் திருத்த மசோதா குறித்த தனது அறிக்கையை கூட்டுக் குழு வரும் 29-ஆம் தேதி நாடாளுமன்ற குளிா்கால கூட்டத்தொடரில் சமா்பிக்கும் என்று எதிா்பாா்க்கப்படுகிறது.