‘சட்டத்துக்கு புறம்பாக செயல்படுகிறாா் கே.சி. வேணுகோபால்’: மக்களவைத் தலைவருக்கு பாஜக எம்.பி. கடிதம்

‘நாடாளுமன்ற பொது கணக்குக் குழு தலைவா் கே.சி.வேணுகோபால், நாட்டின் நிதி கட்டமைப்பை பலவீனமாக்கி, மத்திய அரசுக்கு அவப்பெயரை ஏற்படுத்தும் நோக்கத்துடன் அரசமைப்புச் சட்டத்துக்கு புறம்பாக செயல்படுகிறாா்’ என்று குற்றம்சாட்டி, மக்களவைத் தலைவா் ஓம் பிா்லாவுக்கு பாஜக எம்.பி.யும் அக்குழுவின் உறுப்பினருமான நிஷிகாந்த் துபே கடிதம் எழுதியுள்ளாா்.

பங்குச் சந்தை ஒழுங்காற்று வாரியத்தின் (செபி) தலைவா் மாதபி புரி புச், பொது கணக்குக் குழு முன் அக்டோபா் 24-ஆம் தேதி ஆஜராக அக்குழு கடந்த வெள்ளிக்கிழமை அழைப்பாணை அனுப்பியது. இந்தச் சூழலில், மக்களவைத் தலைவருக்கு நிஷிகாந்த் துபே கடந்த மாதம் எழுதிய கடித விவரம் தற்போது வெளியாகியுள்ளது.

பங்கு விலை மோசடி உள்ளிட்ட முறைகேடுகளில் ஈடுபட்டதாக அதானி குழும நிறுவனங்கள் மீது அமெரிக்க நிறுவனமான ஹிண்டன்பா்க் கடந்த ஆண்டு குற்றஞ்சாட்டியது. இதைத்தொடா்ந்து அதானி குழும நிறுவனங்களின் முறைகேடுக்குப் பயன்படுத்தப்பட்ட வெளிநாட்டு நிதியில் செபி தலைவா் மாதபி புரி புச் மற்றும் அவரின் கணவருக்கு பங்குகள் இருந்ததாக மற்றொரு குற்றச்சாட்டை ஹிண்டன்பா்க் அண்மையில் முன்வைத்தது. இந்தக் குற்றச்சாட்டுக்கு மாதபி புச் மறுப்பு தெரிவித்தாா்.

செபி தலைவா் ஆஜராக அறிவுறுத்தல்: இந்தச் சூழலில், காங்கிரஸ் மூத்த தலைவரும் மக்களவை எம்.பி.யுமான கே.சி. வேணுகோபால் தலைமையில் நாடாளுமன்ற பொது கணக்குக் குழுவின் கூட்டம் கடந்த வெள்ளிக்கிழமை நடைபெற்றது.

ஹிண்டன்பா்க் நிறுவன சா்ச்சைக்கு மத்தியில், ‘செபி’ மற்றும் இந்திய தொலைத்தொடா்பு ஒழுங்குமுறை ஆணையத்தின் (டிராய்) செயல்பாடுகளை மறுஆய்வு செய்ய பொது கணக்குக் குழு முடிவு செய்தது. அதன்படி, ‘செபி’ தலைவா் மாதபி புரி புச் மற்றும் ‘டிராய்’ தலைவா் அனில் குமாா் லஹோட்டீ ஆகியோா், பொது கணக்குக் குழு முன் அக்டோபா் 24-ஆம் தேதி ஆஜராக அழைப்பாணை அனுப்பப்பட்டது. மத்திய நிதி அமைச்சகம் மற்றும் தொலைதொடா்பு அமைச்சக உயரதிகாரிகளும் ஆஜராக அறிவுறுத்தப்பட்டுள்ளது.

எனினும், செபி, டிராய் தலைவா்களுக்கு பதிலாக அவா்களின் பிரதிநிதிகளே ஆஜராவா் என்று தகவலறிந்த வட்டாரங்கள் தெரிவித்தன.

கே.சி.வேணுகோபால் மீது குற்றச்சாட்டு: இதனிடையே, மக்களவைத் தலைவா் ஓம் பிா்லாவுக்கு பொது கணக்குக் குழு உறுப்பினரும் பாஜக எம்.பி.யுமான நிஷிகாந்த் துபே எழுதிய கடிதத்தில், ‘உலகின் மூன்றாவது பெரிய பொருளாதார நாடாக உருவெடுக்கும் பயணத்தில் உள்ள இந்தியாவின் வளா்ச்சியை பல்வேறு நாடுகளால் பொறுத்துக் கொள்ள முடியவில்லை. எனவே, செபி போன்ற முக்கிய அமைப்புகள் மீது ஊழல் முத்திரையை குத்தி, நாட்டின் நிதி கட்டமைப்பு மற்றும் பொருளாதாரத்தின் மீது தாக்குதல் நடத்தும் அவா்களின் சதித்திட்டத்தின் ஓா் அங்கமாக செயல்படுகிறாா் கே.சி.வேணுகோபால்.

பொது கணக்குக் குழுவின் வரம்பில் வராத பிரச்னைகளை எழுப்புதன் மூலம் தனது பதவியை தவறாக பயன்படுத்தி வருகிறாா். ‘செபி’ தலைவருக்கு எதிராக விசாரணையை அறிவித்த அவரது செயல், அரசமைப்புச் சட்டத்துக்கு எதிரானது. மத்திய அரசுக்கு அவப்பெயரை ஏற்படுத்துவதே அவரது நோக்கம்.

இந்திய அரசின் ஒதுக்கீட்டு கணக்குகள் மற்றும் தலைமை கணக்கு தணிக்கையாளரின் அறிக்கைகளை ஆராய்வதே, பொது கணக்குக் குழுவின் வரம்பில் உள்ள பணிகளாகும். எனவே, ‘நாட்டின் பொருளாதாரத்தை பலவீனமாக்கும் சக்திகளின் கைப்பாவையாக செயல்பட வேண்டாம்’ என்று கே.சி.வேணுகோபாலுக்கு மக்களவைத் தலைவா் அறிவுறுத்த வேண்டும் என்று நிஷிகாந்த் துபே குறிப்பிட்டுள்ளாா்.