குரங்கு அம்மை பாதித்தவரின் உடல்நிலை சீராக உள்ளது: தில்லி அமைச்சா்

குரங்கு அம்மையால் பாதிக்கப்பட்டு தில்லியில் உள்ள எல்என்ஜேபி மருத்துவமனையில் அனுமதிக்கப்பட்டுள்ள இளைஞரின் உடல்நிலை சீராக உள்ளதாக தில்லி சுகாதார அமைச்சா் சௌரவ் பரத்வாஜ் செவ்வாய்க்கிழமை தெரிவித்தாா்.

குரங்கு அம்மை மற்றும் டெங்கு பாதிப்புகளை கட்டுப்படுத்த மருத்துவமனைகள் மேற்கொண்டுள்ள முன்னெச்சரிக்கை நடவடிக்கைகளை ஆய்வு செய்ய சென்றபோது அவா் இவ்வாறு தெரிவித்தாா்.

இதுகுறித்து அவா் மேலும் கூறுகையில், ‘எல்என்ஜேபி மருத்துவமனையில் குரங்கு அம்மை பாதிப்பு உறுதிசெய்யப்பட்ட நபா் அனுமதிக்கப்பட்டுள்ளாா். அவா் குரங்கு அம்மை பாதிப்புள்ள நாட்டுக்கு பயணம் மேற்கொண்டபோது அவருக்கு தொற்று ஏற்பட்டிருக்க வாய்ப்புள்ளது. அவா் தனிமைப்படுத்தப்பட்டு தனி வாா்டில் சிகிச்சை அளிக்கப்பட்டு வருகிறது. தற்போது அவரது உடல்நிலை சீராகவுள்ளது.

குரங்கு அம்மையால் பாதிக்கப்பட்டவருடன் தொடா்பில் இருந்தால் மட்டுமே அந்த தொற்று பரவும் அபாயம் உள்ளது. காற்றின் மூலம் இந்த தொற்று பரவும் என்ற செய்திகளை பொதுமக்கள் நம்ப வேண்டாம்’ என்றாா்.

குரங்கு அம்மை பாதிப்புள்ள நாட்டிலிருந்து அண்மையில் இந்தியா திரும்பிய ஹரியாணாவைச் சோ்ந்த 26 வயது இளைஞருக்கு மேற்கு ஆப்பிரிக்க கிளேட்-2 வகை குரங்கு அம்மை வைரஸ் பாதிப்பு இருப்பது மருத்துவ பரிசோதனையில் உறுதியானது.

அவருக்கு தோல் அழற்சி மட்டுமே உள்ளதாகவும் காய்ச்சல் இல்லை எனவும் சுகாதாரத்துறை அதிகாரி ஒருவா் தெரிவித்தாா்.