வக்ஃப் மசோதா குறித்து 1.25 கோடி கருத்துகள்: வெளிநாட்டு அமைப்புகளின் பங்கு குறித்து விசாரணை

‘வக்ஃப் சட்டத்திருத்த மசோதா தொடா்பாக நாடாளுமன்ற கூட்டுக் குழுவுக்கு 1.25 கோடி கருத்துகள் அனுப்பப்பட்டிருப்பதில் வெளிநாட்டு அமைப்புகளின் பங்கு குறித்து மத்திய உள்துறை அமைச்சகம் விசாரணை நடத்த வேண்டும்’ என்று அக்குழுவில் இடம்பெற்றுள்ள பாஜக எம்.பி. நிஷிகாந்த் துபே கோரிக்கை விடுத்துள்ளாா்.

நாடு முழுவதும் முஸ்லிம்கள் தொண்டு பணிகளுக்கு அா்ப்பணிக்கப்படும் வக்ஃப் சொத்துகளை மற்றவா்களின் பெயருக்கு மாற்ற முடியாது. இவற்றை வக்ஃப் வாரியங்கள் நிா்வகித்து வருகின்றன. இந்நிலையில், வக்ஃப் சொத்துகள் தொடா்பான முக்கிய அம்சங்களுடன் வக்ஃப் சட்டத்திருத்த மசோதாவை மத்திய அரசு கொண்டு வந்தது.

எதிா்க்கட்சிகளின் கடும் எதிா்ப்பைத் தொடா்ந்து, தற்போது இந்த மசோதாவை நாடாளுமன்ற கூட்டுக் குழு (ஜேபிசி) ஆராய்ந்து வருகிறது. இந்நிலையில், மசோதா தொடா்பாக கடிதம் அல்லது மின்னஞ்சல் மூலம் கருத்து தெரிவிக்குமாறு நாடாளுமன்ற கூட்டுக் குழு கடந்த மாதம் கேட்டுக்கொண்டது. அதன்படி, இதுவரை 1.25 கோடி கருத்துகள் கிடைத்துள்ளதாக தகவலறிந்த வட்டாரங்கள் தெரிவித்தன.

இதில் வெளிநாட்டு அமைப்புகளின் பங்கு இருப்பதாக குற்றஞ்சாட்டி கூட்டுக் குழு உறுப்பினரும் பாஜக எம்.பி.யுமான நிஷிகாந்த் துபே, குழுத் தலைவா் ஜெகதாம்பிகா பாலுக்கு கடிதம் எழுதியுள்ளாா்.

அந்த கடிதத்தில், ‘மசோதா தொடா்பாக இந்தியாவில் இருந்து மட்டும் இவ்வளவு அதிக எண்ணிக்கையிலான கருத்துகள் சமா்ப்பிக்கப்படுவதற்கு வாய்ப்பில்லை. உலக அளவில் முன்னெப்போதும் இந்த எண்ணிக்கையில் கருத்துகள் சமா்பிக்கப்பட்டதாக வரலாறு இல்லை.

எனவே, 1.25 கோடி கருத்துகளில் போலியானவற்றை அடையாளம் காண வேண்டும். அதற்கு பின்னணியில் பாகிஸ்தானின் ‘ஐஎஸ்ஐ’ உளவு அமைப்பு மற்றும் சீனா போன்ற வெளிநாட்டு சக்திகள் அல்லது முஸ்லிம் அடிப்படைவாத அமைப்புகளின் பங்கு குறித்து மத்திய உள்துறை அமைச்சகம் விரிவாக விசாரிக்க வேண்டும்.

ஜனநாயக நடைமுறையைச் சீா்குலைக்க இத்தகைய முயற்சிகளில் அவா்கள் ஈடுபட்டுள்ளனரா என சந்தேகம் எழுகிறது. எனவே, அவா்களின் நோக்கம் மற்றும் தொலைத்தொடா்புக்கான ஆதாரங்களை விசாரணையில் கண்டறிய வேண்டும். வெளிப்படைத்தன்மையை உறுதிசெய்ய விசாரணையின் முடிவுகளை குழுவின் அனைத்து உறுப்பினா்களுக்கும் பகிர வேண்டும்.

இந்தியா ஒரு வலுவான நாடாளுமன்ற அமைப்பைக் கொண்டுள்ளது. அதன்மீது ஆதிக்கம் செலுத்த முயற்சிக்கும் எந்த வெளிநாட்டுத் தலையீடுகளும் நமது தேசத்தின் இறையாண்மைக்கான நேரடி அச்சுறுத்தல் ஆகும்.

இந்த புதிய கவலையளிக்கும் போக்கை புறக்கணிக்கக்கூடாது. நாடாளுமன்ற நடைமுறையில் சுதந்திரம் மற்றும் ஒருமைப்பாட்டை உறுதிசெய்ய நாடாளுமன்ற கூட்டுக் குழு இவ்விவகாரத்தில் தலையிடுவது இன்றியமையாதது’ என்று வலியுறுத்தியுள்ளாா்.

ஜேபிசி முடிவெடுக்கும்...: பாஜக எம்.பி. துபேவின் குற்றச்சாட்டு குறித்து நாடாளுமன்ற விவகாரத் துறை அமைச்சா் கிரண் ரிஜிஜு கூறுகையில், ‘நாடாளுமன்ற கூட்டுக் குழுவின் செயல்பாடு குறித்து என்னால் கருத்து தெரிவிக்க முடியாது. போதிய அதிகாரம் வழங்கப்பட்டுள்ளது. இவ்விவகாரத்தில் அவா்களே உரிய முடிவெடுக்க வேண்டும்’ என்றாா்.